اۋىل شارۋاشىلىعى ونىمدەرىن سىرتقى نارىققا شىعارۋ – اقمولا وبلىسى اكىمدىگىنىڭ باسىم باعىتتارىنىڭ ءبىرى. ايماق باسشىلىعى اگروونەركاسىپتىك كەشەننىڭ ەكسپورتتىق الەۋەتىن ارتتىرۋ ماقساتىندا حالىقارالىق ارىپتەستىك بايلانىستاردى نىعايتۋ بويىنشا جۇيەلى جۇمىس جۇرگىزۋدە. بۇل باعىتتاعى ماڭىزدى قادامداردىڭ ءبىرى – اقمولا وبلىسى مەن ەستونيا رەسپۋبليكاسىنداعى «Muuga Grain Terminal» استىق تەرمينالى اراسىنداعى ءوزارا ىنتىماقتاستىق جونىندەگى ەكىجاقتى مەموراندۋمنىڭ قابىلدانۋى بولدى.
اتالعان قۇجات اعىمداعى جىلدىڭ اقپان ايىندا وبلىس اكىمىنىڭ ەستونياعا جاساعان جۇمىس ساپارى اياسىندا راسىمدەلىپ، اۋىل شارۋاشىلىعى ونىمدەرىن ەۋروپا نارىعىنا شىعارۋدىڭ جاڭا كەزەڭىنە جول اشتى. جەتكىزىلگەن كەلىسىمدەر ناتيجەسىندە ءوڭىر ديقاندارى ءۇشىن ەستوندىق مۋگا پورتى ارقىلى ەۋروپالىق وداق ەلدەرىنە استىق ەكسپورتتاۋعا مۇمكىندىك تۋدى. بۇل وتاندىق اۋىل شارۋاشىلىعى تاۋارىن وندىرۋشىلەر ءۇشىن جاڭا وتكىزۋ نارىقتارىنا جول اشىپ، شەتەلدىك سەرىكتەستەرمەن ۇزاق مەرزىمدى ىنتىماقتاستىقتى دامىتۋدىڭ بەرىك نەگىزىن قالىپتاستىرۋدا.
بۇگىندە العاشقى ناتيجەلەر دە كورىنە باستادى: 2025 جىلدىڭ باسىنان بەرى اقمولا وبلىسىنىڭ ەكى كاسىپورنى يتالياعا 5,6 مىڭ توننا استىق ەكسپورتتادى. ونىڭ ىشىندە 1,6 مىڭ توننا ءونىم «سودرۋجەستۆو ترەيد ۆوستوك» جشس تاراپىنان ەستونيا ارقىلى جونەلتىلدى. بۇل – جاڭا لوگيستيكالىق باعىتتىڭ تيىمدىلىگىن، ەۋروپا نارىعىنا قازاقستاندىق استىقتى جەتكىزۋدىڭ ناقتى مۇمكىندىگى بار ەكەنىن كورسەتەدى.
«ەۋروپا باعىتىنداعى ەكسپورتتىق لوگيستيكانى دامىتۋ – اۋىل شارۋاشىلىعى تاۋارىن وندىرۋشىلەرگە تەك تۇراقتى وتكىزۋ نارىعىن عانا ەمەس، سونىمەن قاتار ءونىمنىڭ باسەكەگە قابىلەتتىلىگىن ارتتىرۋعا دا مۇمكىندىك بەرەدى»، — دەپ اتاپ ءوتتى اقمولا وبلىسىنىڭ اۋىل شارۋاشىلىعى باسقارماسى.بۇل باعىتتاعى جۇمىس جالعاسۋدا. وبلىس اكىمدىگى بيزنەس وكىلدەرىمەن بىرلەسىپ، جەتكىزۋ گەوگرافياسىن كەڭەيتۋگە، سونىمەن قاتار استىقتان بولەك اۋىل شارۋاشىلىعى ونىمدەرىنىڭ وزگە تۇرلەرىن دە ەكسپورتتاۋعا باعىتتالعان تۇراقتى ارنالار قالىپتاستىرۋ ءۇشىن بەلسەندى ديالوگ جۇرگىزىپ كەلەدى.
