الماتى وبلىسىنداعى زاۋىتتا ورىن العان جارىلىس سالدارىنان زارداپ شەككەندەردىڭ بارلىعى قازا تاپتى، دەپ حابارلايدى “ادىرنا” ۇلتتىق پورتالى «ازيااگروفۋد» اق باسقارماسىنىڭ ءباسپاسوز قىزمەتىنە سىلتەمە جاساپ.
«23 مامىردا الماتى وبلىسىنداعى «ازيااگروفۋد» اق قۇراما جەم زاۋىتى اۋماعىندا بولعان قايعىلى وقيعا سالدارىنان ارىپتەستەرىمىز قازا تاپتى. بۇل قايعىلى جاعداي بۇكىل كومپانيامىز ءۇشىن ۇلكەن سوققى بولدى. ءبىز جاي عانا قىزمەتكەرلەرىمىزدى ەمەس، ۇجىمدى بىرىكتىرىپ، ادالدىعى مەن ادامگەرشىلىك قاسيەتتەرىمەن ءىز قالدىرعان جانداردى جوعالتتىق»، – دەلىنگەن حابارلامادا.
«ازيااگروفۋد» اق قازا تاپقانداردىڭ تۋىستارى مەن جاقىندارىنا كومەك كورسەتىلەتىنىن ايتتى.
«ساقتاندىرۋ تولەمدەرىنەن بولەك، كومپانيا تاراپىنان قوسىمشا ماتەريالدىق كومەك كورسەتىلەدى. قازا تاپقان ارىپتەستەرىمىزدىڭ جەرلەۋ راسىمدەرىنە بايلانىستى بارلىق شىعىنداردى ءوز موينىمىزعا الامىز، سونداي-اق ولاردىڭ قارىزدىق مىندەتتەمەلەرىن تولىقتاي وتەيمىز. ءار وتباسىعا پسيحولوگيالىق جانە قۇقىقتىق كومەك ۇسىنىلادى»، – دەپ كورسەتىلگەن حابارلامادا.
كومپانيانىڭ ايتۋىنشا قازىرگى تاڭدا تەرگەۋ جۇرگىزىلىپ جاتىر.
«قازىرگى تاڭدا وقيعانىڭ سەبەپ-سالدارىن انىقتاۋ ماقساتىندا تەرگەۋ ءجۇرىپ جاتىر. ءبىز مەملەكەتتىك ورگاندارمەن جانە جەدەل قىزمەتتەرمەن بەلسەندى ىنتىماقتاستىق ورناتىپ، تەحنولوگيالىق جانە ۇيىمداستىرۋشىلىق پروتسەستەردىڭ بارلىعىنا ىشكى تەكسەرۋ باستادىق. باستى ماقساتىمىز – تەك شىندىقتى انىقتاۋ عانا ەمەس، مۇنداي تراگەديالاردىڭ قايتالانۋىنا جول بەرمەۋ ءۇشىن بارلىق قاجەتتى شارالاردى قابىلداۋ»، – دەلىنگەن حابارلامادا.
ەسكە سالا كەتەيىك، الماتى وبلىسىندا ورنالاسقان «ازيااگروفۋد» قۇراما جەم زاۋىتى اۋماعىندا ۇن توزاڭىنىڭ جارىلىسى بولىپ، وقيعا سالدارىنان 4 ادام زارداپ شەككەن ەدى.
