كوكتەم – اۋىل شارۋاشىلىعى سالاسى ءۇشىن ەڭ قىزۋ كەزەڭ. تسەلينوگراد اۋدانىندا كوكتەمگى دالا جۇمىستارى – ەگىس ناۋقانى ءوز مارەسىنە جەتۋدە. اتالعان ماۋسىمنىڭ ءساتتى اياقتالۋىمەن «رودينا» جشس جانە «اقتىق» اق ەڭبەك ۇجىمدارى قۇتتىقتاۋلار قابىلداپ جاتىر.
«رودينا» جشس بەرگەن مالىمەتكە سايكەس، بيىلعى جىلى جالپى ەگىستىك القابى 30 256 گەكتاردى قۇرادى. ونىڭ ىشىندە 22 665 گەكتارعا ءداندى داقىلدار، 2 000 گەكتارعا مايلى داقىلدار، 1 930 گەكتارعا سۇرلەمگە ارنالعان جۇگەرى، 3 900 گەكتارعا بىرجىلدىق شوپتەر ەگىلدى.
«اقتىق» اق دا كوكتەمگى دالا جۇمىستارىن تابىستى اياقتاپ، ءداندى جانە بۇرشاقتى داقىلداردى 22 000 گەكتار القاپقا سەپتى. بىرجىلدىق شوپتەر 2 500 گەكتار جەرگە ورنالاستىرىلدى.
اۋداندىق اۋىل شارۋاشىلىعى ءبولىمىنىڭ مالىمەتىنشە، 2025 جىلى تسەلينوگراد اۋدانىنداعى جالپى جازدىق ەگىس كولەمى شامامەن 260 000 گەكتاردى قۇراۋى ءتيىس. بۇگىنگى تاڭدا ءداندى جانە بۇرشاقتى داقىلدار 140 000 گەكتارعا جۋىق جەرگە ەگىلگەن. جەم-ءشوپ داقىلدارى، كارتوپ جانە كوكونىس داقىلدارىنىڭ ەگىسى 80%-عا ورىندالدى.
اۋداندىق اۋىل شارۋاشىلىعى ءبولىمىنىڭ باسشىسى ومار ءابۋوۆتىڭ ايتۋىنشا، ونىمدىلىكتى ارتتىرۋ ماقساتىندا شارۋالار شامامەن 2 000 توننا مينەرالدىق تىڭايتقىش ەنگىزگەن. بۇل كۇزدە مول ءونىم الۋعا بەرىك نەگىز قالايدى.
اۋداندا اۋىل شارۋاشىلىعىن تەحنيكالىق جاڭعىرتۋعا ەرەكشە كوڭىل بولىنۋدە. 2024 جىلدىڭ باسىنان بەرى اۋدان شارۋاشىلىقتارى جالپى سوماسى 1,9 ملرد تەڭگەگە 53 بىرلىك زاماناۋي اۋىل شارۋاشىلىق تەحنيكاسى مەن جابدىقتارىن ساتىپ العان. بۇل ەگىنشىلىك جۇمىستارىن ساپالى ءارى ءتيىمدى اتقارۋعا زور مۇمكىندىك بەرەدى.
كوكتەمگى ەگىس ناۋقانىنىڭ اياقتالۋى – بولاشاق مول ءونىمنىڭ نەگىزى. تسەلينوگراد اۋدانىنىڭ اگراريلەرى ۇيلەسىمدى ەڭبەكتىڭ، زاماناۋي اگروتەحنولوگيالاردىڭ جانە مەملەكەتتىك قولداۋدىڭ ارقاسىندا الداعى ماۋسىمعا سەنىممەن قاراپ، ءوڭىردىڭ ازىق-تۇلىك قاۋىپسىزدىگىنە ءوز ۇلەسىن قوسۋدا.
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز