نازارباەۆ زياتكەرلىك مەكتەبىنە وقۋ جىلىنىڭ بىتىۋىنە ءبىر كۇن قالعاندا مۇعالىمدى بالاعاتتاعانى ءۇشىن وقۋدان شىعارىلعان 11-سىنىپ وقۋشىسى 12 جىلدىق ءبىلىم بەرەتىن جەكەمەنشىك مەكتەپكە اۋىستىرىلادى، دەپ حابارلايدى "ادىرنا" ۇلتتىق پورتالى.
بۇل تۋرالى وقۋشىنىڭ ادۆوكاتى مالىمدەدى. ادۆوكات نۇرجان ماقساتوۆتىڭ ايتۋىنشا، مەكتەپ باسشىلىعى مەن وقۋشىنىڭ وتباسى كەلىسىمگە كەلگەن.
"ۋاكىلەتتى ورگانداردىڭ وكىلدەرى كەلىپ، وقۋشىنى باسقا مەكتەپكە اۋىستىرۋ تۋرالى ۇسىنىس جاسادى. سوت بولمايدى", - دەدى ادۆوكات.
ادۆوكاتتىڭ ايتۋىنشا، بۇل شەشىم بالانىڭ پسيحولوگيالىق جاعدايىن ەسكەرە وتىرىپ قابىلدانعان. ەندى وقۋشى 12 جىلدىق ءبىلىم بەرەتىن جەكەمەنشىك مەكتەپكە اۋىستىرىلادى. ال ونىڭ وقۋ اقىسىن نزم وتەيتىن بولادى.
الايدا وقۋشى كەمبريدج كەڭەسىنىڭ حالىقارالىق ەمتيحانىنا قاتىسا المايدى. ادۆوكاتتىڭ ايتۋىنشا، تاراپتار ءوزارا ىمىراعا كەلگەن. مەكتەپ تاراپىنان وقۋشى مەن اتا-اناسىنا ەشقانداي شاعىم جوق، وقۋشىنىڭ وتباسى دا مەكتەپكە تالاپ قويمايدى.
جاعدايعا قاتىستى الماتى قالاسى بويىنشا بالا قۇقىقتارى جونىندەگى ۋاكىل ديانا ەرلان دا پىكىر ءبىلدىردى
"نزم-دە وقۋ 12 جىلدىق جۇيە بويىنشا جۇرگىزىلەتىندىكتەن جانە بالانىڭ سىنىبى ءبىتىرۋشى سىنىپ بولماعاندىقتان، مەكتەپ اكىمشىلىگى بالانىڭ مۇددەسىن ەسكەرە وتىرىپ، ونى مەملەكەتتىك مەكتەپكە نەمەسە وقۋ اقىسىن وتەۋ شارتىمەن جەكەمەنشىك مەكتەپكە اۋىستىرۋدى ۇسىندى. قالىپتاسقان جاعدايعا بايلانىستى پسيحولوگيالىق كومەك پەن قولداۋ ۇيىمداستىرىلدى", - دەپ جازدى ديانا ەرلان الەۋمەتتىك جەلىدەگى پاراقشاسىندا.
بۇعان دەيىن، نزم-نەن شىعارىلعان ءجاسوسپىرىمنىڭ اۋرۋحاناعا تۇسكەنى تۋرالى جازعان ەدىك.
باسقا ماتەريالدار
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز