ءماجىلىس قىلمىستىق كودەكسكە قالىڭدىق ۇرلاۋعا قاتىستى قىلمىستىق جاۋاپكەرشىلىكتى قاراستىراتىن وزگەرىستەردى ەكىنشى وقىلىمدا قابىلدادى، دەپ حابارلايدى "ادىرنا" ۇلتتىق پورتالى.
دەپۋتاتتار قىلمىستىق كودەكسكە جاڭا 125-1-باپتى — «نەكەگە ماجبۇرلەۋ» دەگەن اتاۋمەن تولىقتىرۋدى ۇسىندى. بۇل ارەكەت ءۇشىن ايىپپۇل، تۇزەۋ جۇمىستارى، بوستاندىقتى شەكتەۋ نەمەسە ەكى جىلعا دەيىن باس بوستاندىعىنان ايىرۋ جازاسى قاراستىرىلعان. ەگەر ارەكەت زورلىق-زومبىلىقپەن، كامەلەتكە تولماعاندارعا قاتىستى، توپپەن نەمەسە قىزمەتتىك وكىلەتتىكتى پايدالانۋ ارقىلى جاسالسا، جازا مەرزىمى ءۇش جىلدان جەتى جىلعا دەيىن ارتادى. ال اۋىر زارداپتار بولسا، جازا بەس جىلدان ون جىلعا دەيىن باس بوستاندىعىنان ايىرۋعا دەيىن كۇشەيتىلەدى، — دەپ حابارلادى ءماجىلىس ءباسپاسوز قىزمەتى.
سونداي-اق ادامدى ۇرلاپ، ءوز ەركىمەن بوساتقان تۇلعا دا قىلمىستىق جاۋاپكەرشىلىكتەن بوساتىلمايدى.
زاڭ جوباسى ازاماتتى ەركىنەن تىس اڭدۋ، حابارلاسۋعا تىرىسۋ، ىزىنە ءتۇسۋ ارەكەتتەرىنە قاتىستى دا قىلمىستىق جاۋاپكەرشىلىك ەنگىزۋدى كوزدەيدى.
ابزال قۇسپاننىڭ ايتۋىنشا، سوڭعى جىلدارى قازاقستاندا قالىڭدىق ۇرلاۋ جاعدايلارى جيىلەگەن، اسىرەسە ەلدىڭ وڭتۇستىك وڭىرلەرىندە. كەيبىر جاستاردىڭ كەلىسىممەن، توي شىعىنىن ازايتۋ ماقساتىندا «ۇرلاعان بولىپ» ۇيلەنەتىنى كەزدەسەدى. بىراق كەيدە مۇلدە بەيتانىس ەر ادامدار كوشەدەن قىزدى كولىككە كۇشتەپ وتىرعىزىپ، توپپەن الىپ كەتەدى. مۇنداي ارەكەتتەردى داستۇرگە جاسىرادى، الايدا تاريحشىلاردىڭ ايتۋىنشا، قازاق داستۇرىندە ونداي ۇعىم بولماعان.
2019–2023 جىلدار ارالىعىندا ايەلدەردى ۇرلاۋ فاكتىلەرى بويىنشا 214 سوتقا دەيىنگى تەرگەۋ باستالعان، بىراق ونىڭ 201-ءى توقتاتىلعان، سەبەبى قىلمىستىق كودەكستىڭ 125-بابىنداعى (ادام ۇرلاۋ) ەسكەرتپەگە سايكەس، ەگەر ۇرلاۋشى جابىرلەنۋشىنى ءوز ەركىمەن بوساتسا، ءىس توقتاتىلادى.
ۇلتتىق قۇرىلتايدىڭ اتىراۋداعى وتىرىسىندا پرەزيدەنت قاسىم-جومارت توقاەۆ بۇل ماسەلەگە نازار اۋدارىپ، قالىڭدىق ۇرلاۋدى «ماسقارا ناداندىق» دەپ اتاپ، وعان زاڭدى باعا بەرۋدى تاپسىرعان. وسىدان كەيىن قىلمىستىق كودەكسكە وزگەرىستەر ەنگىزۋ باستاماسى كوتەرىلگەن. ءماجىلىس ماقۇلداعاننان كەيىن زاڭ جوباسى پارلامەنتتىڭ سەناتىنا جولدانادى.
