31 مامىر كۇنى اتىراۋدان باكۋگە العاش رەت ۇشىپ كەلگەن قازاقستاننىڭ Air Astana اۋە كومپانياسىنىڭ رەيسىن گەيدار اليەۆ اتىنداعى حالىقارالىق اۋەجايىندا سالتاناتتى تۇردە قارسى الدى، دەپ حابارلايدى "ادىرنا" ۇلتتىق پورتالى.
بۇل تۋرالى جەكسەنبى كۇنى قازاقستاننىڭ ازەربايجانداعى ەلشىلىگىنىڭ ءباسپاسوز قىزمەتى حابارلادى.
العاشقى جولاۋشىلاردى قازاقستاننىڭ ازەربايجانداعى ەلشىسى ءالىم بايەل، Air Astana وكىلدەرى جانە باكۋ اۋەجايىنىڭ باسشىلىعى دومبىرا ۇنىمەن جانە قازاقتىڭ ۇلتتىق تاعامدارىمەن قارسى الدى.
ەلشى ءوز سوزىندە ەكى ەل اراسىنداعى بايلانىستاردىڭ تىعىزدىعىن كورسەتەتىن ماڭىزدى كورسەتكىشتەردىڭ ءبىرى – اۋە رەيستەرىنىڭ سانى ەكەنىن اتاپ ءوتتى.
"سوندىقتان ءبىز رەيستەر سانىنىڭ ارتىپ، ۇشۋ گەوگرافياسىنىڭ كەڭەيىپ جاتقانىنا قۋانىشتىمىز. بيىلعى جازدا قازاقستان مەن ازەربايجان اراسىنداعى رەيستەر سانى اپتاسىنا 34-كە جەتەدى. سونىمەن قاتار، رۇقسات ەتىلگەن رەيستەر سانى 70-كە دەيىن ارتادى. ياعني، ءوسۋ جالعاسادى. قازىر باكۋدەن استانا، الماتى جانە اقتاۋعا ۇشاقتار قاتىنايدى. بۇگىن ولارعا مۇناي استاناسى اتىراۋ قوسىلدى، ال شىلدە ايىندا قازاقستاننىڭ ءۇشىنشى مەگاپوليسى – شىمكەنت قوسىلادى", - دەدى ديپلومات.
اتىراۋ – باكۋ باعىتىنداعى رەيستەر اپتاسىنا ءۇش رەت – دۇيسەنبى، سارسەنبى جانە سەنبى كۇندەرى ۇشاتىن بولادى. ۇشۋ ۋاقىتى 1 ساعات 30 مينۋتتى قۇرايدى.
