ورتالىق ازيانىڭ تاريحي گەوگرافياسىن تالقىلاۋ بيىل دا جالعاستى

3 ماۋسىمدا الماتىداعى ۇلتتىق كىتاپحانادا قوجا احمەت ياسساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ ەۋرازيا عىلىمي-زەرتتەۋ ينستيتۋتى ۇلتتىق عىلىم اكادەمياسىنىڭ قولداۋىمەن «ورتالىق ازيانىڭ تاريحي گەوگرافياسى: ۋاقىت، كەڭىستىك، جادى» اتتى ءىى حالىقارالىق عىلىمي كونفەرەنتسيا وتكىزدى.  بۇل حالىقارالىق عىلىمي ءىس-شارا  قازاقستان رەسپۋبليكاسىنىڭ عىلىم جانە جوعارى ءبىلىم مينيسترلىگى قارجىلاندىرىپ وتىرعان «ورتالىق ازيانىڭ تاريحي گەوگرافياسى» اتتى ىرگەلى عىلىمي باعدارلامانى ىسكە اسىرۋ اياسىندا ۇيىمداستىرىلىپ وتىرعانى ايتىلادى. عىلىمي كونفەرەنتسيا ورتا عاسىرلار مەن جاڭا زامان كەزەڭىندەگى كونە تاريحي كارتالار، كارتوگرافيالىق جانە تاريحي-گەوگرافيالىق دەرەكتەردىڭ نەگىزىندەگى ورتالىق ازيانىڭ گەوگرافيالىق كەڭىستىكتەگى ساياسي، الەۋمەتتىك-ەكونوميكالىق، رۋحاني-مادەني وزگەرۋى مەن دامۋىن، تاريحي-مادەني جانە گەوگرافيالىق لاندشافتتار ەۆوليۋتسياسىنىڭ بەينەلەنۋىن، قورشاعان ورتا تۋرالى تۇسىنىك پەن ءبىلىمنىڭ جيناقتالۋى مەن كەڭەيۋىن، تاريحي گەوگرافيانىڭ داستۇرلەرى مەن جاڭا زەرتتەۋ باعىتتارىن تالقىلاۋعا ارنالىپ، اشىق عىلىمي پىكىر الماسۋ مەن بايلانىس قۇرۋ ماقساتىن كوزدەيدى. كونفەرەنتسيانىڭ مازمۇنى كوپ قىرلى، تاريحي گەوگرافيامەن تۇيىندەس عىلىمداردىڭ وزەكتى سالالارىن، وتاندىق جانە شەتەلدىك عالىمداردىڭ باسىن بىرىكتىرۋ ارقىلى ايماقتىڭ تاريحي دامۋى، كەڭىستىك سەرپىنى مەن مادەني بايلانىستارى تۋرالى كەڭىرەك تۇسىنىك قالىپتاستىرۋعا باعىتتالعان جان-جاقتى تالقىلاۋدى قامتيدى. كونفەرەنتسيانىڭ جۇمىسىنا اۆستريا، پورتۋگاليا، ۇلىبريتانيا، چەحيا، تۇركيا، يران، موڭعوليا، جاپونيا، رەسەي، ازەربايجان، قىرعىزستان، تاجىكستان، وزبەكستان جانە قازاقستان ەلدەرىنەن بەلگىلى عالىمدار مەن جاس زەرتتەۋشىلەر قاتىستى. جيىن بارىسىندا ورتالىق ازيا ايماعىنداعى تاريحي، ارحەولوگيالىق، مادەني قاباتتار جايى تالقىلانىپ، بۇگىنگى ساياسي قىرى دا ءسوز بولدى. وتىرىستا كوبىرەك ءمان بەرىلگەنى دە نەگىزىنەن تاريحي تاقىرىپتار بولدى. عالىمدار وزدەرىن تولعانتقان ءتيىست تاقىرىپتار بويىنشا پىكىر تالاستىرىپ، قورتىندى، ناتيجەلەرىمەن دە تانىستىردى. بىلتىر ءدال وسى ۋاقىتتا  «ورتالىق ازيانىڭ تاريحي گەوگرافياسى» حالىقارالىق عىلىمي-كونفەرەنتسياسىنىڭ العاشقى وتىرىسى وتكەن بولاتىن. مۇنداي جيىنداردى تۇراقتى تۇردە وتكىزۋ بىرتىندەپ داستۇرگە اينالىپ كەلەدى. باسقوسۋ بارىسىندا دا عالىمدار قالىپتاسقان ماسەلەلەردى بىرىگىپ تاقىلاپ شەشۋدىڭ ماڭىزىنا توقتالدى.