بۋراباي اۋدانىندا 2025 جىلدىڭ العاشقى بەس ايىنداعى اۋداننىڭ نەگىزگى دامۋ باعىتتارى تۋرالى باياندالدى. اۋدان اكىمى ونەركاسىپ، اگروسەكتور، تۋريزم جانە الەۋمەتتىك ينفراقۇرىلىم سالالارىنداعى كورسەتكىشتەرگە توقتالدى، دەپ حابارلايدى وڭىرلىك كوممۋنيكاتسيالار قىزمەتىنەن.
اۋدان اكىمنىڭ ايتۋىنشا، بەس ايدا وندىرىلگەن ءونىم كولەمى 51,1 ملرد تەڭگەنى قۇرادى، ونىڭ ىشىندە 43 ملرد تەڭگەدەن استامى وڭدەۋ ونەركاسىبىنە تيەسىلى.
«كوپتەگەن كورسەتكىشتەر بويىنشا ءوسىم بايقالادى. سونىڭ ىشىندە شاعىن جانە ورتا بيزنەس سۋبەكتىلەرىنىڭ سانى جىل باسىنان بەرى 5%-عا ارتتى. اۋدانداعى ورتاشا جالاقى 401 مىڭ تەڭگەگە جەتىپ، 13,2%-عا ءوستى»، – دەدى اراي سادىقوۆ.اگروونەركاسىپتىك كەشەن بۋراباي اۋدانى ءۇشىن باستى باعىتتاردىڭ ءبىرى بولىپ وتىر. بيىل 173 مىڭ گەكتار القاپقا ەگىس ەگىلدى، مايلى داقىلداردىڭ ۇلەسى ارتتى. مەملەكەتتىك قولداۋ اياسىندا شارۋالارعا 2,5 ملرد تەڭگە سۋبسيديا بەرىلىپ، 13 اۋىل شارۋاشىلىعى تەحنيكاسى ساتىپ الىنعان.سونداي-اق ءسۇت ءوندىرىسى بويىنشا بىرقاتار جوبالار جۇزەگە اسۋدا. «Burabay Milk» فەرماسى قايتا جاڭعىرتىلىپ، مال باسى 1600 باسقا دەيىن كوبەيەدى. «اينا» زاۋىتى جاڭارتىلىپ جاتىر، ال 6 ملرد تەڭگەگە باعالانعان جاڭا ءسۇت كەشەنىنىڭ قۇرىلىسى جوسپارلانۋدا. بۇدان بولەك، 50 مىڭ توننالىق استىق قويماسى مەن ەتتى تەرەڭ وڭدەيتىن كاسىپورىن سالۋ دا كۇن تارتىبىندە تۇر. بۋراباي تۋريزم سالاسى قارقىندى دامىپ كەلەدى. بەس ايدا اۋدانعا 355 مىڭنان استام تۋريست كەلگەن. اعىمداعى جىلى بەس ينفراقۇرىلىمدىق جوبا اياقتالادى. ولاردىڭ قاتارىندا ششۋچە كولىندەگى جاعاجايدى اباتتاندىرۋ، بۋرابايدا سەرۋەن ايماعىن سالۋ جانە 119 بەينەباقىلاۋ كامەراسىن ورناتۋ بار.
«تۋريزم – تەك دەمالىس ەمەس. بۇل – جاڭا جۇمىس ورىندارى، سالىق جانە ءوڭىردىڭ تانىمالدىعى. ششۋچينسك قالاسىندا ۆوكزال مەن كۋرورت ايماقتارىن بايلانىستىراتىن جاڭا اۆتوبۋس باعىتى ىسكە قوسىلدى»، – دەدى اۋدان اكىمى.اۋداندا 18 شاقىرىم جول جوندەۋ جوسپارلانعان، جۇمىستار اۋىلدىق وكرۋگتەردە جانە ششۋچينسك قالاسىندا جۇرگىزىلۋدە. سونىمەن قاتار جەتى اۋىلدا سۋ قۇبىرى جەلىلەرى جاڭارتىلىپ جاتىر. جىل سوڭىنا دەيىن ءتورت مىڭعا جۋىق تۇرعىن تازا اۋىزسۋعا قول جەتكىزەدى. قىزۋ دايىندىق جىلىتۋ ماۋسىمىنا دا جۇرگىزىلۋدە – ششۋچينسكىدەگى بەس قازاندىق جاڭارتىلىپ جاتىر. الەۋمەتتىك سالادا ەكى اۋىلدىق كلۋب، سپورت زالى جانە مەكتەپتەردى جوندەۋ جۇمىستارى قولعا الىنعان. سونىمەن قاتار الەۋمەتتىك جاعىنان وسال توپتارعا قولداۋ شارالارى جالعاسۋدا. اۋدان باسشىسى بيۋدجەتتى تولىقتىرۋ بويىنشا دا ناقتى ناتيجەلەردى اتاپ ءوتتى. تسيفرلاندىرۋ مەن كولەڭكەلى ەكونوميكانى ازايتۋ ەسەبىنەن سالىقتىق بازا ۇلعايعان. بيىلعى ءبىرىنشى توقساندا تۋريزمنەن تۇسكەن تابىس عانا 1 ملرد تەڭگەگە جۋىقتادى. ال بارلىق دەڭگەيدەگى بيۋدجەتكە تۇسكەن كىرىس 23 ملرد تەڭگەدەن استى.
«ارينە، پروبلەمالار بار. جول، كوممۋنالدىق قىزمەت، جۇمىسسىزدىق سياقتى ماسەلەلەر تۇرعىنداردى تولعاندىرادى. ءبىز سيقىرلى شەشىم ۋادە ەتپەيمىز، بىراق ناقتى، جۇيەلى جۇمىس جۇرگىزۋدەمىز. اشىقتىق پەن تۇراقتى بايلانىس – باستى قاعيدامىز»، – دەدى اراي سادىقوۆ.بۋراباي اۋدانى بيىل دا الەۋمەتتىك-ەكونوميكالىق ءوسىمدى ساقتاپ، جاڭا جوبالاردى جۇزەگە اسىرۋعا نيەتتى. اكىمنىڭ بايانداماسىنان اۋداننىڭ دامۋ الەۋەتى جوعارى ەكەنى اڭعارىلادى.
