پەتروپاۆلدا ءجاسوسپىرىم قىزدى ۇرىپ، اقشا بوپسالاعان التى قىز انىقتالدى

پەتروپاۆل قالاسىندا بىرنەشە ءجاسوسپىرىمنىڭ 14 جاستاعى قىزدى ۇرىپ-سوعىپ، اقشا بوپسالاعانى تۋرالى شۋلى بەينەجازبا تارادى، دەپ حابارلايدى "ادىرنا" ۇلتتىق پورتالى. قۇقىق قورعاۋ ورگاندارى بۇل جاعدايدى راستاپ، وقيعاعا قاتىسى بار التى قىزدىڭ تۇلعاسى انىقتالعانىن مالىمدەدى. Halyqstan Telegram-ارناسىندا جاريالانعان بەينەجازبادا التى قىز ءبىر قۇربىسىن كەزەكپەن ۇرىپ، ارتىنان اقشا تالاپ ەتىپ جاتقانى كورىنەدى. جابىرلەنۋشى قارسىلىق كورسەتپەگەن. ولار قىزدان «كاسسا» نەمەسە «تاعى دا سوققى تاڭدا» دەپ قىسىم جاساعان. «ەگەر اقشا اكەلمەسەڭ... تۋعان كۇنىڭدە ءبارىبىر ساعان اقشا بەرەدى. سول اقشانى 10-ى كۇنى اكەلمەسەڭ، ءبارىمىز جابىلىپ سەنى سابايمىز»، – دەيدى قىزداردىڭ ءبىرى. سولتۇستىك قازاقستان وبلىسى پوليتسيا دەپارتامەنتى وقيعا 2024 جىلدىڭ 31 تامىزىندا بولعانىن راستادى. الايدا ۆيدەو 2025 جىلدىڭ ماۋسىمىندا كەڭ تارالىپ، قوعام نازارىن اۋدارعان. «پەتروپاۆل قالاسىندا تۇراتىن 14 جاستاعى قىزعا جۇيەلى تۇردە پسيحولوگيالىق جانە فيزيكالىق قىسىم جاسالعانى انىقتالدى. بەينەجازبالارداعى كورىنىستەر ناقتى دالەل رەتىندە تىركەلدى»، – دەلىنگەن دەپارتامەنت مالىمدەمەسىندە. 2 ءجاسوسپىرىم مەن 4 اتا-اناعا قاتىستى اكىمشىلىك ءىس قوزعالىپ، بوپسالاۋ بابى بويىنشا سوتقا دەيىنگى تەرگەۋ باستالدى.