دونالد ترامپ يلون ماسكپەن تاتۋلاسقىسى كەلمەيتىنىن مالىمدەدى

681
Adyrna.kz Telegram
https://adyrna.kz/content/uploads/2025/03/img_6529-960x500.jpeg?token=314546c543c61195887d746d08f71d36

اقش پرەزيدەنتى دونالد ترامپ سەنبى كۇنى ءوزىنىڭ بۇرىنعى وداقتاسى ءارى سايلاۋالدى ناۋقانىنىڭ دەمەۋشىسى يلون ماسكپەن قارىم-قاتىناستى قالپىنا كەلتىرۋگە نيەتتى ەمەس ەكەنىن ءبىلدىردى، دەپ حابارلايدى "ادىرنا" ۇلتتىق پورتالى.

NBC ارناسىنىڭ ءجۋرناليسى كريستەن ۋەلكەرگە  تەلەفون ارقىلى بەرگەن سۇحباتىندا ترامپ ماسكپەن تاتۋلاسقىسى كەلمەيتىنىن اشىق ايتتى. ال قارىم-قاتىناستارىنىڭ اياقتالعان-اياقتالماعانى جونىندە سۇرالعاندا: "مەنىڭشە، ءيا", - دەپ جاۋاپ بەرگەن.

"مەنىڭ ۋاقىتىم باسقا ىستەرگە كەتىپ جاتىر. بىلەسىز بە، مەن سايلاۋدا ۇلكەن باسىمدىقپەن جەڭىسكە جەتتىم. مەن وعان بۇل مۇمكىندىكتەردى بۇرىن بەرگەنمىن. ءبىرىنشى اكىمشىلىگىم كەزىندە وعان ءبىراز جەڭىلدىك جاسادىم، ءومىرىن ساقتاپ قالدىم. ەندى مەن ونىمەن سويلەسكىم كەلمەيدى" - دەدى ترامپ.

اقش پرەزيدەنتى سونىمەن قاتار ماسك 2026 جىلعى ارالىق سايلاۋدا دەموكراتيالىق پارتيا وكىلدەرىن نەمەسە زاڭ شىعارۋشىلاردى قولدايتىن بولسا، سالدارى بولاتىنىن ەسكەرتتى.

"ەگەر ول مۇنى جاساسا، وعان جاۋاپ بەرۋىنە تۋرا كەلەدى", - دەدى ترامپ. بىراق قانداي سالدار بولاتىنىن ناقتىلامادى.

ايتا كەتەيىك، ماسكتىڭ كاسىپورىندارى مەملەكەتپەن ءتيىمدى كەلىسىمشارتتارعا يە.

بۇل مالىمدەمە ترامپ پەن الەمدەگى ەڭ باي ادام ماسك اراسىنداعى قارىم-قاتىناستىڭ بۇزىلۋى اياسىندا ايتىلدى. سەبەبى ماسك اپتا باسىندا ترامپتىڭ بيۋدجەت تۋرالى زاڭ جوباسىن ءوزىنىڭ الەۋمەتتىك جەلىسى X ارقىلى سىنعا العان بولاتىن.

پىكىرلەر