اقش-تىڭ لوس-اندجەلەس قالاسىندا ميگراتسيالىق رەيدتەرگە قارسى باستالعان نارازىلىقتار كۇش قولدانۋ مەن تارتىپسىزدىكتەرگە ۇلاستى. وسىعان بايلانىستى ترامپ اكىمشىلىگى قالاعا ۇلتتىق گۆارديانىڭ ەكى مىڭ ساربازىن جىبەردى، دەپ حابارلايدى "ادىرنا" ۇلتتىق پورتالى.
بۇل شەشىم قوعامدا ۇلكەن داۋ تۋدىردى.
اقش قورعانىس ءمينيسترى پيت حەگسەت ەگەر زورلىق-زومبىلىق جالعاساتىن بولسا، پەنتاگون اسكەر جىبەرۋى مۇمكىن ەكەنىن مالىمدەدى. ونىڭ ايتۋىنشا، كەمپ-پەندلتونداعى تەڭىز جاياۋ اسكەرلەرى جوعارى دايىندىق كۇيىنە كەلتىرىلگەن.
سەنبى كۇنى لوس-اندجەلەستىڭ پاراماۋنت اۋدانىندا اقش-تىڭ كوشى-قون جانە كەدەن قىزمەتى (ICE) اگەنتتەرى مەن نارازىلىق بىلدىرۋشىلەر اراسىندا قاقتىعىس ورىن الدى. دەمونسترانتتاردىڭ ءبىر بولىگى مەكسيكالىق تۋلاردى كوتەرىپ شىققان. قالا ورتالىعىنداعى تاعى ءبىر اكتسياعا شامامەن 60 ادام قاتىسىپ، "ICE, لوس-اندجەلەستەن كەت!" دەپ ۇرانداتتى. پاراماۋنت اۋدانىنىڭ تۇرعىندارىنىڭ 80%-دان استامى لاتينوامەريكالىقتار.
بۇقارانى تاراتۋ ءۇشىن قۇقىق قورعاۋ ورگاندارى كوز جاساۋراتاتىن گاز بەن جارىق-شۋلى گراناتالار قولداندى. شەرۋلەر بارىسىندا ءبىر ادام قاماۋعا الىنىپ، بىرنەشە ادام ۇستالدى. ەكى شەريف كومەكشىسى جارالانىپ، اۋرۋحاناعا جەتكىزىلدى.
پرەزيدەنت ترامپ بۇل تارتىپسىزدىكتەردى «ۇكىمەتكە قارسى بۇلىك» دەپ اتاپ، ۇلتتىق گۆارديا كۇشتەرىن ەنگىزۋ تۋرالى مەموراندۋمعا قول قويدى. اق ءۇيدىڭ مالىمدەۋىنشە، ساربازدار ICE جانە باسقا دا فەدەرالدى ورگانداردىڭ قىزمەتكەرلەرىن قورعاۋ ماقساتىندا 60 كۇنگە ورنالاستىرىلدى.
كاليفورنيا گۋبەرناتورى گەۆين نيۋسوم بۇل شەشىمدى «ارانداتۋشىلىق» دەپ اتادى. ول ترامپتىڭ ارەكەتىن سىنعا الىپ، كۇش قولدانۋعا جول بەرمەۋگە شاقىردى. لوس-اندجەلەس مەرى كارەن باسس تا فەدەرالدى بيلىكتىڭ بۇل ارەكەتى «قورقىنىش تۋعىزۋ ماقساتىندا جاسالىپ وتىر» دەپ مالىمدەدى.
اقش ۆيتسە-پرەزيدەنتى دجەي دي ۆەنس نارازىلىق بىلدىرۋشىلەردى "شەتەلدىك تۋلارمەن شىققان بۇلىكشىلەر" دەپ اتاپ، دەموكراتيالىق پارتيا باسشىلارىن ەلدىڭ شەكاراسىن قورعاۋدى ەلەمەي وتىر دەپ ايىپتادى.
