تۇركيا مەن رەسەي اراسىنداعى ەنەرگەتيكالىق ارىپتەستىكتىڭ سيمۆولىنا اينالادى دەگەن «اككۋيۋ» اەس-ءىنىڭ قۇرىلىسىن قارجىلاندىرۋ بەلگىسىز مەرزىمگە سوزىلدى، دەپ حابارلايدى “ادىرنا” قازاقپاراتقا سىلتەپ.
تۇركيانىڭ نەگىزگى ەنەرگەتيكالىق جوباسى قارجىلاندىرۋدىڭ ۇزىلىستەرىنە بايلانىستى ەلەۋلى كىدىرىستەرگە تاپ بولدى. جوباعا قاجەت قاراجات كولەمى شامامەن 7 ملرد دوللاردى قۇرايدى.
جەرورتا تەڭىزىنىڭ جاعالاۋىنداعى مەرسين پروۆينتسياسىندا ورنالاسقان «اككۋيۋ» اەس-ءى رەسەيلىك «روساتوم» مەملەكەتتىك كورپوراتسياسى جۇزەگە اسىراتىن «سال - يەلەن - پايدالان» حالىقارالىق ۇلگىسى بويىنشا سالىنىپ جاتىر. جوبا تولىق اياقتالعان سوڭ، قۋاتى 4800 مۆت بولاتىن ءتورت رەاكتور تۇركيانىڭ ەلەكتر ەنەرگياسىنا دەگەن سۇرانىسىنىڭ شامامەن 10 پايىزىن قامتاماسىز ەتە الادى.
جوبا جوسپارىنا سايكەس، ءبىرىنشى ەنەرگوبلوكتى سىناۋ 2025 جىلدىڭ سوڭىندا نەمەسە 2026 جىلدىڭ باسىندا باستالۋى ءتيىس، ال ەلەكتر ەنەرگياسىن ءوندىرۋ شامامەن 2026 جىلدىڭ ورتاسىنا قاراي قولعا الىنباق. الايدا قارجىلاندىرۋدىڭ شەكتەلۋى سالدارىنان Akkuyu Nuclear JSC باسقارۋشى كومپانياسى بارلىق رەسۋرستارىن ءبىرىنشى بلوكتى اياقتاۋعا باعىتتاپ وتىر. العاشقى بلوكتان تۇسەتىن تابىس جوبانىڭ قالعان كەزەڭدەرىن قارجىلاندىرۋ كوزىنە اينالماق.
مامانداردىڭ ايتۋىنشا، ءبىرىنشى بلوكقا شامامەن 5 ملرد دوللار شىعىن جۇمسالعان. بۇل شىعىندارعا باسقارۋ ورتالىقتارى، قاۋىپسىزدىك جۇيەلەرى جانە بارلىق ءتورت رەاكتور ءۇشىن ورتاق ينفراقۇرىلىمدار كىرەدى.
كەيبىر ساراپشىلار كىدىرىستەردىڭ قارجىلىق قىرلارىنا نازار اۋدارادى. رەسەيلىك تاراپ، اتاپ ايتقاندا «روساتوم» تۇركيادان بىرقاتار قارجىلىق جەڭىلدىكتەر، سونىڭ ىشىندە تابىس سالىعىنان بوساتۋدى تالاپ ەتىپ وتىر. انكارا بۇل تالاپتاردى ازىرگە قاناعاتتاندىرعان جوق، بۇل جاعداي ساراپشىلاردىڭ پىكىرىنشە، تولىققاندى قارجىلاندىرۋدىڭ جالعاسۋىنا باستى كەدەرگى بولۋدا.
بۇعاتتالعان قاراجات پەن شيەلەنىسكەن جاعداي جوعارى دەڭگەيدەگى ارالاسۋدى، اتاپ ايتقاندا، تۇركيا پرەزيدەنتى رەجەپ تايىپ ەردوعان مەن ونىڭ رەسەيلىك ارىپتەسىنىڭ قاتىسۋىن قاجەت ەتۋى مۇمكىن.
قالعان بلوكتارداعى كىدىرىستەر جوبانىڭ جالپى مەرزىمىندە اياقتالۋىنا كۇمان تۋدىرادى. تۇركيا مەن رەسەي اراسىنداعى ەنەرگەتيكالىق ارىپتەستىكتىڭ سيمۆولىنا اينالۋى ءتيىس بولعان «اككۋيۋ» اەس-ءىنىڭ بولاشاعى قوسىمشا قارجىلاندىرۋ مەن ساياسي كەلىسىمدەرسىز بەلگىسىز مەرزىمگە سوزىلىپ جاتىر.
