اقمولا وبلىسىنىڭ اقكول اۋدانىندا ەلىمىز ءۇشىن بىرەگەي جوبا قازاقستانداعى العاشقى جاساندى ينتەللەكت نەگىزىندە جۇمىس ىستەيتىن ءسۇت-تاۋار فەرماسى ىسكە قوسىلدى. بۇل اۋىل شارۋاشىلىعىن جاڭعىرتۋدىڭ كەزەكتى كەزەڭى عانا ەمەس، بولاشاققا جاسالعان ساپالى قادام. مۇندا ءداستۇرلى ەڭبەك زاماناۋي تسيفرلىق شەشىمدەرمەن ۇشتاسىپ، جاڭا دەڭگەيگە كوتەرىلۋدە.
فەرمانى بىرنەشە جىلدان بەرى جوعارى تەحنولوگيالى ءارى ورگانيكالىق ءوندىرىس باعىتىن جۇيەلى جۇزەگە اسىرىپ كەلە جاتقان «ەڭبەك» جشس ىسكە قوستى. بيىل جوبا جاڭا بەلەسكە كوتەرىلدى: فەرمادا جاساندى ينتەللەكتپەن باسقارىلاتىن اۆتوماتتاندىرىلعان جۇيە، سونىڭ ىشىندە روبوتتى ساۋ تەحنولوگياسى ەنگىزىلدى. اقىلدى الگوريتمدەر ءاربىر جانۋاردىڭ جاعدايىن ساراپتاپ، ساۋ كەستەسىن باقىلاپ، مالدىڭ دەنساۋلىعىن قاداعالاپ، كەز كەلگەن اۋىتقۋعا جەدەل ارەكەت ەتەدى.
نەگىزگى قۇرىلعى رەتىندە الەمدەگى ەڭ ءتيىمدى قۇرالداردىڭ ءبىرى سانالاتىن نەمىستىڭ GEA Westfalia ساۋ كەشەنى ورناتىلعان. بۇل جۇيە ءار سيىرعا جەكە ءتاسىل قولدانا وتىرىپ، ادامنىڭ ارالاسۋىنسىز ساۋ پروتسەسىن جۇزەگە اسىرادى. سونىڭ ناتيجەسىندە ءسۇت ساپاسى تۇراقتى، مال سترەسكە تۇسپەيدى، ونىمدىلىك جوعارى بولادى.
قازىرگى تاڭدا قۇرىلىس جۇمىستارىنىڭ العاشقى كەزەڭى اياقتالدى. 257 باس ءىرى قاراعا ارنالعان قورا، 186 باسقا ارنالعان تولدەۋ جانە سۋالۋ بلوكتارى، سەپاراتسيا تسەحى، لاگۋنا مەن كوڭدى تازالاۋ جۇيەسى سالىندى. بۇل جۇيەگە شارۋاشىلىق ءوز قاراجاتى ەسەبىنەن 160 ميلليون تەڭگە ينۆەستيتسيا سالدى. سونداي-اق قالدىقتاردى وڭدەۋگە ارنالعان بيوكومپلەكس ورناتىلىپ، فەرما ەكولوگيالىق جاعىنان بارىنشا قاۋىپسىز ەتىلگەن.
العاشقى اسىل تۇقىمدى ءىرى قارا 269 باس گولشتين تۇقىمدى سيىر وتكەن جىلى دانيادان اكەلىنگەن. جاقىن ارادا تاعى 547 باس اكەلىنەدى دەپ كۇتىلۋدە. جالپى جوبا 816 باسقا ەسەپتەلگەن. فەرمانى تولىق ىسكە قوسۋ جىل سوڭىنا دەيىن جوسپارلانعان. سول ۋاقىتقا دەيىن 25 تۇراقتى جۇمىس ورنى اشىلىپ، جالپى ينۆەستيتسيا كولەمى 8 ميلليارد تەڭگەدەن اسادى.
«ەڭبەك» جشس-ءنىڭ فەرماسى جاي عانا وندىرىستىك نىسان ەمەس، بۇل ەرتەڭگى اۋىل شارۋاشىلىعىنىڭ ناقتى مودەلى. مۇندا زاماناۋي تەحنولوگيالار ساپا، تيىمدىلىك جانە تۇراقتىلىققا جۇمىس ىستەيدى. جاساندى ينتەللەكت ادامدى الماستىرمايدى، كەرىسىنشە – ونىڭ سەنىمدى سەرىكتەسىنە اينالادى، - دەدى اقكول اۋدانىنىڭ اكىمى ءبىرجان ابدراحمانوۆ جوبانى تانىستىرۋ كەزىندە.جوبا قازىردىڭ وزىندە اۋدان ءۇشىن عانا ەمەس، بۇكىل ەل ءۇشىن ماڭىزدى وقيعاعا اينالدى. ول تسيفرلاندىرۋ اۋىل شارۋاشىلىعىنىڭ بەينەسىن وزگەرتىپ، ونى باسەكەگە قابىلەتتى ءارى ەكولوگيالىق جاۋاپتى سالاعا اينالدىرا الاتىنىن كورسەتتى. بۇگىندە اقكول اۋدانى قازاقستاننىڭ اگرارلىق بولاشاعىنىڭ ىرگەتاسى قالانىپ جاتقان ايماق رەتىندە سەنىمدى تۇردە العا شىقتى.
