موڭعوليادا العاش رەت كۇمىس پايزا تابىلدى، دەپ حابارلايدى «ادىرنا» ءتىلشىسى «مونتسامە» اگەنتتىگىنە سىلتەمە جاساپ.
ونى بايان-ولگي ايماعى بۇلعىن اۋدانىندا تۇراتىن موڭعوليا قازاقتارى — ا.اڭساعان، ح.امانجول جانە ە.امانبەك 2024 جىلدىڭ مامىر ايىندا تاپقان.
مادەني مۇرانى ساقتاۋ ىسىنە قوسقان ۇلەسى ءۇشىن اتالعان ازاماتتار مادەنيەت، سپورت، تۋريزم جانە جاستار ىستەرى مينيسترلىگىنىڭ ارنايى ماقتاۋ قاعازىمەن ماراپاتتالدى.
زەرتتەۋشىلەردىڭ ايتۋىنشا، كۇمىس پايزادا موڭعول يمپەرياسى كەزەڭىنە، ناقتىراق ايتقاندا، ۇلى يۋان اۋلەتى داۋىرىنە ءتان ارىپتەرمەن جازىلعان جازۋ بار. جازبادا «ماڭگى كوكتىڭ كۇشىمەن قاعاننىڭ اتى جاساسىن، ونى قۇرمەتتەمەگەن اداسىپ، ولەدى» دەلىنگەن. سونىمەن قاتار پايزانىڭ دوڭگەلەك ءپىشىندى تەسىگىنىڭ شەتىندە التى قىتاي يەروگليفى جازىلعان.
تاريحي جادىگەردى كوپشىلىككە تانىستىرۋ جانە ناسيحاتتاۋ جۇمىسىنا «شىڭعىس حان» ۇلتتىق مۇراجايى جاۋاپتى بولادى. مۇراجاي وكىلدەرى بارلىق موڭعول حالقىنا مادەني قۇندىلىقتاردى قورعاۋعا بەلسەندىلىكپەن قاتىسۋعا ۇندەۋ تاستادى.
ايتا كەتۋ كەرەك، بۇعان دەيىن رەسەي مەن اقش-تا وسى كۇمىس پايزاعا ۇقساس ءۇش جادىگەر تابىلعان ەدى.
