مەملەكەت باسشىسىنىڭ الەۋمەتتىك ينفراقۇرىلىمدى قۇرۋ جونىندەگى تاپسىرماسىن ورىنداۋ شەڭبەرىندە اقمولا وبلىسىندا ەكى دەنساۋلىق ساقتاۋ مەكەمەسى – ارشالى اۋدانى ارناساي اۋىلىندا دارىگەرلىك امبۋلاتوريا جانە بۇلاندى اۋدانى التىندى اۋىلىندا فەلدشەرلىك-اكۋشەرلىك پۋنكت اشىلدى. نىساندار ەلگە قايتارىلعان اكتيۆتەر ەسەبىنەن سالىنعان. وسى ماقساتقا ارناۋلى مەملەكەتتىك قوردان 295 ملن تەڭگە ءبولىندى. دەنساۋلىق ساقتاۋ مەكەمەلەرى مەديتسينا قىزمەتكەرلەرى كۇنى قارساڭىندا اشىلدى.
ارناساي اۋىلىنداعى دارىگەرلىك امبۋلاتوريا ەلتوق، قويگەلدى، باباتاي ستانتسياسى مەن 42-رازەزد سىندى ماڭايداعى ەلدى مەكەندەردە تۇراتىن 2 مىڭنان استام تۇرعىنعا قىزمەت كورسەتەدى. جالپى اۋدانى 450 شارشى مەتردى قۇرايتىن جاڭا عيمارات ءبىر اۋىسىمدا 45 كەلۋشىنى قابىلداۋعا قاۋقارلى.
بۇلاندى اۋدانى التىندى اۋىلىندا اشىلعان فەلدشەرلىك-اكۋشەرلىك پۋنكت التىندى، بوياركا، الاكول، جاڭاتالاپ جانە ەلتاي اۋىلدارىندا تۇراتىن مىڭعا جۋىق ادامعا العاشقى مەديتسينالىق كومەك كورسەتەتىن بولادى.
اتالعان مەديتسينالىق مەكەمەلەر زاماناۋي قۇرال-جابدىقتارمەن تولىق جابدىقتالعان. اتاپ ايتقاندا، ەكگ اپپاراتى، دەفيبريللياتورلار، فيزيوتەراپيا جانە وڭالتۋ قۇرىلعىلارى ورناتىلعان. بۇل اۋىل تۇرعىندارىنا ساپالى باستاپقى مەديتسينالىق-سانيتارلىق كومەك كورسەتۋگە مۇمكىندىك بەرەدى.
اقمولا وبلىسىنىڭ اكىمى مارات احمەتجانوۆ جاڭا مەديتسينالىق نىسانداردى ەلىمىزدىڭ باس پروكۋرورىنىڭ ورىنباسارى عالىمجان قويگەلديەۆ پەن قر دەنساۋلىق ساقتاۋ ۆيتسە-ءمينيسترى تيمۋر مۇراتوۆپەن بىرگە بارىپ كوردى.
ءوڭىر باسشىسى اۋىل تۇرعىندارى ءۇشىن مەديتسينالىق قىزمەتتەردىڭ قولجەتىمدىلىگى مەن ساپاسىن ارتتىرۋ جولىندا بۇل نىسانداردىڭ ماڭىزدىلىعىنا توقتالدى.
«مۇنداي نىسانداردىڭ قۇرىلىسى – حالقىمىزدىڭ دەنساۋلىعىنا سالىنعان ينۆەستيتسيا. مەملەكەت باسشىسىنىڭ قولداۋىنىڭ ارقاسىندا اۋىل تۇرعىندارىنا اۋرۋدىڭ الدىن الۋ جانە ەمدەلۋ ءۇشىن قولايلى جاعداي جاسالۋدا. بۇل – اۋىلدىق ەلدى مەكەندەردەگى ءومىر ساپاسىن جاقسارتۋعا جانە مەديتسينالىق كومەكتىڭ قولجەتىمدىلىگىن ارتتىرۋعا باعىتتالعان مەملەكەتتىك ساياساتتىڭ ناقتى ناتيجەسى»، — دەدى مارات احمەتجانوۆ.«اقمولا وبلىسىندا جالپى سانى 33 الەۋمەتتىك جوبا ىسكە اسىرىلادى. ونىڭ ىشىندە 10 جوبا – مەديتسينالىق نىساندار. قايتارىلعان اكتيۆتەردىڭ ماقساتتى جۇمسالۋىن قاداعالاۋ – پروكۋراتۋرا ورگاندارىنىڭ نەگىزگى مىندەتتەرىنىڭ ءبىرى. ءار قايتارىلعان تەڭگە – قازاقستاننىڭ دامۋىنا قىزمەت ەتۋى كەرەك»، — دەدى باس پروكۋروردىڭ ورىنباسارى عالىمجان قويگەلديەۆ. دەنساۋلىق ساقتاۋ ۆيتسە-ءمينيسترى تيمۋر مۇراتوۆتىڭ ايتۋىنشا، اۋىلدىق دەنساۋلىق ساقتاۋ جۇيەسىن جاڭعىرتۋ باعدارلاماسى اياسىندا اقمولا وبلىسىندا 38 نىسان سالىنادى. ونىڭ 28-ءى بۇگىندە ىسكە قوسىلعان. مەديتسينالىق قىزمەت ساپاسىنا ەرەكشە نازار اۋدارىلۋدا. ايتا كەتەيىك، مەملەكەت باسشىسىنىڭ تاپسىرماسىن ورىنداۋ اياسىندا ۇكىمەت ەلگە زاڭسىز شىعارىلعان اكتيۆتەردى قايتارۋ ارقىلى الەۋمەتتىك ينفراقۇرىلىم جوبالارىن جۇزەگە اسىرۋدا. قازىرگى تاڭدا وڭىردە تاعى 3 دارىگەرلىك امبۋلاتوريا، 4 فەلدشەرلىك-اكۋشەرلىك پۋنكت پەن 1 مەديتسينالىق پۋنكتتىڭ قۇرىلىسى جۇرگىزىلۋدە.