باس پروكۋراتۋرا: ەرتەڭگى ميتينگكە قاتىسۋشىلارعا قاتاڭ شارا قولدانىلادى

باس پروكۋراتۋرا "قازاقستاننىڭ دەموكراتيالىق تاڭداۋى" ەكسترەميستىك ۇيىمىنىڭ نارازىلىق اكتسيالارىن ۇيىمداستىرۋشىلار مەن وعان قاتىسۋشىلارعا زاڭمەن بەلگىلەنگەن تارتىپتە قاتاڭ شارالار قولدانىلاتىنىن مالىمدەدى.

"الەۋمەتتىك جەلىلەردە سوتپەن ەكسترەميستىك دەپ تانىلعان "قازاقستاننىڭ دەموكراتيالىق تاڭداۋى" ۇيىمى مەن ونىڭ جاقتاستارى 2019 جىلعى 26 قازاندا كەزەكتى زاڭسىز اكتسيالاردى ۇيىمداستىرىپ، ازاماتتاردى وعان قاتىسۋعا شاقىرىپ جاتىر", - دەدى باس پروكۋروردىڭ ورىنباسارى بولات دەمباەۆ حالىققا ارناعان ۇندەۋىندە.

ايتۋىنشا، بۇل ۇيىمنىڭ مۇشەلەرى اسا اۋىر قىلمىستار جاساعانى ءۇشىن شەتەلدە سوت تورەلىگىنەن جاسىرىنىپ ءجۇر.

ولار تۇرعىنداردى زاڭعا قارسى ءىس-ارەكەتتەرگە ايداپ سالىپ، ادامداردىڭ قاۋىپسىزدىگىنە، ولاردىڭ ءومىرى مەن دەنساۋلىعىنا، قوعامنىڭ قالىپتى تىرشىلىك ارەكەتىنە قاۋىپ تۋدىرىپ وتىر.

"بۇل تۇلعالاردىڭ قوعامدىق قاۋىپسىزدىك پەن تارتىپكە قاتەر توندىرەتىن ءىس-ارەكەتتەرىنە جول بەرىلمەيدى جانە ولار شەكتەلەدى. "ەكسترەميزمگە قارسى ءىس-قيمىل تۋرالى" زاڭنىڭ 13-بابىنا سايكەس ەكسترەميستىك ۇيىمداردى تارتا وتىرىپ، بەيبىت جينالىستار، ميتينگىلەر، شەرۋلەر، پيكەتتەر جانە دەمونستراتسيالار وتكىزۋگە، ولاردىڭ بەلگىلەرىن پايدالانۋعا، ەكسترەميستىك ماتەريالداردى تاراتۋعا جول بەرىلمەيدى", - دەيدى ول.

بولات دەمباەۆ وسىعان بايلانىستى ەكسترەميستىك ۇيىم باستاعان رۇقساتسىز نارازىلىق اكتسيالارىنىڭ ۇيىمداستىرۋشىلارى مەن قاتىسۋشىلارىنا زاڭمەن بەلگىلەنگەن تارتىپتە قاتاڭ شارالار قولدانىلاتىنىن ايتتى.

ميتينگكە قاتىسقاندار قالاي جازالانادى؟

باس پروكۋراتۋرانىڭ حابارلاۋىنشا، زاڭسىز اكتسيالارعا قاتىسۋ فاكتىلەرى راستالعان جاعدايدا قۇقىق بۇزۋشىلارعا قاتىستى اكىمشىلىك قۇقىق بۇزۋشىلىقتار تۋرالى كودەكستىڭ 488-بابى بويىنشا جاۋاپكەرشىلىك قاراستىرىلعان (50 اەك-كە دەيىن ايىپپۇل (126 150 تەڭگە), 15 تاۋلىككە دەيىن قاماققا الۋ).

"ەگەر وسى ءىس-ارەكەتتەر ازاماتتاردىڭ، ۇيىمداردىڭ، قوعامنىڭ نەمەسە مەملەكەتتىڭ قۇقىقتارى مەن زاڭدى مۇددەلەرiنە ەلەۋلى زيان كەلتىرسە، ول قىلمىستىق جاۋاپتىلىققا اكەپ سوعادى (قىلمىستىق كودەكستىڭ 400-بابى – رۇقسات ەتىلمەگەن اكتسيالاردى ۇيىمداستىرۋ جانە قاتىسۋ، ەگەر بۇل ءىس-ارەكەتتەر ەلەۋلi زيان كەلتiرسە)", - دەلىنگەن باس پروكۋراتۋرانىڭ حابارلاماسىندا.

باس پروكۋراتۋرا قۇقىق بۇزۋشىلىقتىڭ الدىن الۋ، ادامنىڭ قۇقىقتارى مەن بوستاندىقتارىن قورعاۋ ماقساتىندا ازاماتتاردى ارانداتۋشىلىققا بوي الدىرماي، ەكسترەميستىك ۇيىمداردىڭ زاڭسىز اكتسيالارىنا قاتىسۋدان باس تارتۋعا شاقىرادى.