بۇگىن ەلوردامىزداعى ء"الجان انا" مەشىتىندە ساداقا قابىلداۋعا ارنالعان QIWI ەلەكتروندىق تەرمينالىنىڭ تۇساۋكەسەرى ءوتتى. ادامداردى ساۋاپتى ىسكە، ىزگىلىككە شاقىراتىن بۇل ءىس-شاراعا قر اقپارات جانە قوعامدىق دامۋ ءمينيسترى داۋرەن اباەۆ جانە قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي سەرىكباي قاجى وراز جانە مەشىت يمامدارى ارنايى كەلىپ قاتىستى.
اشىلۋ سالتاناتىندا ءسوز سويلەگەن مينيستر وسىدان ەكى اي بۇرىن رەسپۋبليكالىق يمامدار فورۋمى وتكەنىن ، سوندا وسى تەرمينال ماسەلەسى دە كوتەرىلگەنىن ايتتى.
"العاشقى باستامانى وسى ء"الجان-انا" مەشىتىندە ىسكە اسىرىپ وتىرمىز. مەملەكەت تاراپىنان ءبىز اشىقتىق پەن جاقسىلىقتى قولدايمىز. بۇل ءدىني باسقارمانىڭ بەدەلىن ارتتىرىپ، ەلىمىزدەگى مۇسىلمان قاۋىم ءۇشىن ىزگى ءىس ەكەنىنە سەنەمىن جانە دە قايىرىمدىلىق جاساۋ ماسەلەسىن جاڭا دەڭگەيگە كوتەرەتىنىنە مەن سەنىمدىمىن. سوندىقتان دا ارقاشان قولدايمىز. بۇنداي تەرمينال ءىرى قالالاردا، اۋدانداردا دا مەشىتتەردە ورناتىلاتىن بولادى - دەدى اقپارات جانە قوعامدىق دامۋ ءمينيسترى داۋرەن اباەۆ.
ودان ءارى مينيستر اباەۆ ەلەكتروندىق تەرمينالداردىڭ باس شاھارداعى بارلىق 12 مەشىتتە ورناتىلعانىن اتاپ ءوتتى.
مۇنداي تەرمينالدار بولاشاقتا ەلىمىزدىڭ وبلىس ورتالىقتارى مەن رەسپۋبليكانىڭ بارلىق ءىرى قالاسىنداعى مەشىتتەرىندە ورناتىلاتىن بولادى. قازىر سوعان جۇمىستار جۇرگىزىلۋدە.
بۇل يگى باستاما قمدب-نىڭ بەدەلىن ارتتىرىپ، حالىقتىڭ ءدىني ۇيىمعا دەگەن سەنىمىن نىعايتادى.
مينيستر مەن باس ءمۇفتي ء"الجان انا" مەشىتىندە استانالىق يمامدارىمەن كەزدەسىپ، ولاردىڭ اعارتۋشىلىق قىزمەتىنە قاتىستى ماسەلەلەردى تالقىلادى.
"ادىرنا" ۇلتتىق پورتالى
فوتو اۆتورى inform.kz
