بۇگىن جامبىل وبلىسى اكىمى اسقار مىرزاحمەتوۆ جۋالى اۋدانىنا جۇمىس ساپارىمەن بارىپ، «قاراالما» تاۋ شاڭعى بازاسىنىڭ قۇرىلىسىمەن تانىستى.
بۇگىندە تاۋ شاڭعى بازاسىنىڭ قۇرىلىس جۇمىستارى 85 پايىزى اياقتالعان. قوناق ءۇي-كوتەدجدەرى، تۋريستەرگە قىزمەت كورسەتۋ سەرۆيستىك كەشەنىنىڭ قۇرىلىسى سالىنۋدا. سونداي-اق، جەتى شاقىرىمدىق جول سالىنىپ، ينفراقۇرىلىم تارتۋ جۇمىستارى اياقتالعان. كەرەك قۇرال-جابدىقتاردىڭ دەنى جەتكىزىلگەن. قۇرىلىس باسىندا 100-دەن استام جۇمىسشى اۋا-رايىنىڭ قولايسىزدىعىنا قاراماستان، كۇن-ءتۇن دەمەي بىلەك-سىبانا ەڭبەكتەنۋدە.
ايتا كەتۋ كەرەك، مۇندا دەمالىس كەشەنىندە قوناقتار جىل ون ەكى اي بويى دەمالۋعا مۇمكىندىك الادى. جاز مەزگىلدەرىندە ساۋمالمەن، قىمىزبەن ەمدەيتىن، اتپەن سەرۋەن قۇراتىن ورىندار اشىلادى دەپ كۇتىلۋدە.
جالپى، نىسان مەملەكەتتىك-جەكەمەنشىك ارىپتەستىك نەگىزىندە سالىنۋدا. جوبانىڭ جالپى قۇنى – 4 ميلليارد تەڭگە. تۋريستىك نىسان «باتىس ەۋروپا-باتىس قىتاي» كۇرەجولىنىڭ بويىنان 7 شاقىرىم قاشىقتىقتا، الاتاۋ تاۋىنىڭ باۋرايىندا تەڭىز دەڭگەيىنەن 1600 مەتر بيىكتىكتە بوي كوتەرۋدە. سونىمەن قاتار، الاتاۋ تاۋىنىڭ ۇشار باسىنان كەشەنگە دەيىن 2 500 مەتر سىرعاناۋ جولاعى تۇسۋدە. سول سياقتى 2050 جانە 350 مەترلىك اسپالى جولداردىڭ قۇرىلىستارى دا جۇزەگە اسىرىلۋدا. اسپالى جول قۇرىلىسىنا قاجەتتى قوندىرعىلار اۆستريا ەلىنەن جەتكىزىلگەن.
اسقار يسابەكۇلى جاۋاپتىلارعا مۇنداعى بارلىق جۇمىستاردى ساپالى اتقارۋدى، 350 مەترلىك اسپالى جولدىڭ مونتاجداۋ، ورناتۋ شارالارىن اعىمداعى جىلدىڭ 16 جەلتوقسانعا دەيىن اياقتاۋدى تاپسىردى. ال، ۇزىندىعى 2 مىڭ مەتردەن اساتىن اسپالى جولدىڭ قۇرىلىسىن ءبىر-ەكى ايدا تولىعىمەن ءبىتىرۋ كەرەكتىگىن ەسكەرتتى.
ماماندار «قاراالما» تاۋ-شاڭعى كەشەنى وبلىستىڭ ەكونوميكالىق دامۋىنا وڭ اسەر ەتەتىنىن ايتادى. سەبەبى شىمكەنت قالاسى مەن تۇركىستان وبلىسىنىڭ تۇرعىندارىنا جۋالى اۋدانى جاقىن. سوندىقتان دا ولار الماتىداعى شىمبۇلاق تاۋ-شاڭعى كەشەنىنە سابىلماي، ىرگەدەگى قاراالما كەشەنىنە كەلۋى مۇمكىن. سونداي-اق جامبىل وبلىسىنىڭ تۇرعىندارى دا وسىندا كەلىپ، ءبىر ءسات دەمالىپ كەتە الاتىن بولادى. ءبىر سوزبەن ايتقاندا، جامبىل وبلىسىنان مۇنداي كەشەننىڭ سالىنۋى وبلىس ءۇشىن عانا ەمەس، سونىمەن قاتار ەلىمىز ۇشىندە وتە ماڭىزدى شارا بولماق.
«ادىرنا»
ۇلتتىق پورتالى
