كوروناۆيرۋستىڭ جاڭا ءتۇرى ادام اعزاسىنا كوزدىڭ شىرىشتى قابىعىمەن بايلانىس ارقىلى ەنۋى مۇمكىن. بۇل تۋرالى قحر-نىڭ دەنساۋلىق ساقتاۋ ىستەرى بويىنشا مەملەكەتتىك كوميتەتىنىڭ وكىلى لي سينۆان بۇگىن وتكەن بريفينگتە مالىمدەدى دەپ حابارلايدى KAZ.NUR.KZ حابار 24-كە سىلتەمە جاساپ.
"پنەۆمونيانىڭ جاڭا ءتۇرىن بايلانىس ارقىلى جۇقتىرۋعا بولادى. ەگەر ۆيرۋس ءسىزدىڭ قولىڭىزدىڭ تەرى قاباتىنا تۇسسە، ال ءسىز ابايسىزدا كوزىڭىزدى سۇرتسەڭىز، وندا ۆيرۋس جۇعۋى مۇمكىن. سول سەبەپتى قورعانىش بەتپەردەلەردى كيىپ، قولدى مۇقيات جۋ كەرەك. بۇل ۆيرۋستىڭ تارالۋ جانە ونى جۇقتىرۋ قاۋپىن تومەندەتەدى", - دەدى لي سينۆان.
ايتا كەتسەك، كوروناۆيرۋستىڭ جاڭا ءتۇرىن جۇقتىرعان قىتايلىقتار سانى سەيسەنبى كۇنى تاعى 32 ادامعا ءوسىپ، جالپى 4547-گە جەتكەن. سونداي-اق، ۆيرۋستان كوز جۇمعاندار سانى 106 ادام بولعان.
ەسكە سالا كەتەيىك، كۇنى كەشە ۆيرۋستىڭ ادامنان ادامعا كوزدىڭ شىرىشتى قاباتى ارقىلى جۇعۋى مۇمكىن ەكەنى حابارلانعان.
ۆيرۋستىڭ ادامنان ادامعا جۇعۋ جولدارى تۋرالى جاڭا اقپارات قىتاي دارىگەرى ۆان گۋانگفانىڭ اڭگىمەسىنەن سوڭ پايدا بولدى.
دارىگەر باق-قا ناۋقاستارمەن جۇمىس بارىسىندا بارلىق ساقتىق شارالارىن جاساعانىن، الايدا كوزىنە قورعانىش كوزىلدىرىگىن كيمەي، كوزىن اشىق قالدىرعانىن ايتقان دەپ جازادى Daily Mail.
ۆان گۋانفانىڭ سوزىنشە، وعان ينفەكتسيا كوزدىڭ شىرىشتى قاباتى ارقىلى جۇققان بولۋى مۇمكىن.
