ىشكى ىستەر ءمينيسترى ەرلان تۇرعىمباەۆ قوردايداعى جاپپاي تارتىپسىزدىكتەر كەزىندە 47 ادام ۇستالعانىن بۇدان بۇرىن دا ايتقان بولاتىن.
"قازىرگى كەزدە 47 ادام ۇستالىپ، پوليتسيا بولىمشەسىنە جەتكىزىلدى. ولاردان ەكى اڭشى مىلتىعى تاركىلەندى. سوتقا دەيىنگى تەرگەۋ شارالارى قىلمىستىق كودەكستىڭ 272-بابى (جاپپاي تارتىپسىزدىكتەردى ۇيىمداستىرۋ جانە قاتىسۋ) مەن 99-بابى (ادام ءولتىرۋ) بويىنشا جۇرگىزىلىپ جاتىر", - دەدى تۇرعىمباەۆ ءباسپاسوز ءماسليحاتىندا.
بۇل ماسەلەگە قاتىستى وقيعا ورنىنان "ادىرنا" ۇلتتىق پورتالىنىڭ ءتىلشىسى وڭعار قابدەن بىلاي دەپ حابارلادى.
قازىر حالىق ۇستالعانداردىڭ بارلىعىن بوساتۋدى تالاپ ەتىپ، توپتاسىپ وتىر. ءتىلشىمىزدىڭ ايتۋىنشا، وقيعا ورنىنا وبلىس اكىمى اسقار مىرزاحمەتوۆ كەلىپ، قاماۋعا الىنعاندار بوساتىلاتىنىن ايتىپ حالىقتى تىنىشتاندىرعان.
"بىراق جينالعان ەل سوندا دا تاراماي، «جىگىتتەر الدىمىزعا كەلمەيىنشە كەتپەيمىز، قامالعاندار تۇگەل بوسامايىنشا تارامايمىز» دەپ توپتاسىپ وتىر. بۇل اراعا جينالعانداردىڭ سانى شامامەن 300 ادام. جەرگىلىكتى تۇرعىندار رەسمي مالىمەتتەرگە سەنبەيدى. ولاردىڭ ايتۋىنشا، جارالانعاندار مەن قايتىس بولعانداردىڭ سانى رەسمي دەرەكتەن الدەقايدا كوپ بولۋى دا مۇمكىن",-دەيدى وڭعار قابدەن.
وسى وقيعاعا بايلانىستى قورداي اۋدانى، سورتوبە اۋىلىندا ساعان 17:00-دە پرەمەر ءمينيستردىڭ ورىنباسارى بەردىبەك ساپارباەۆپەن بريفينگ بولادى. ماسەلەنىڭ ءمان-جايى سول جەردە ناقتى ايتىلادى.