قازىر قوردايداعى قاقتىعىس قىزۋ تالقىعا ءتۇسىپ تۇرعان ءسات. رەسمي، بەيرەسمي اقپاراتار قارشا بوراپ، قاراپايىم حالىققا اق پەن قارانى اجىراتۋ دا قيىنداۋ بولىپ تۇر. كەشەلى بەرى قورداي اۋدانىنا بىرقاتار باق وكىلدەرى باردى.
«ادىرنا» ۇلتتىق پورتالىنىڭ ءتىلشىسى وڭعار قابدەن دە وقيعا ورنىنا بارىپ، شىنايى اقپاراتتار بەرىپ وتىر.
ءتىلشىمىزدىڭ ايتۋىنشا، قازىر كەشەگى قاقتىعىستا ۇستالعانداردى بوساتا باستاعان. وقيعا ورنىندا ارنايى جاساق، قاۋىپسىزدىك قىزمەتكەردەرى جۇمىستارىن جالعاستىرۋدا. قاماۋدان بوساپ شىققانداردىڭ اراسىندا تىلشىمىزگە سۇحبات بەرگەندەر دە بولعان.
«اۋقاتتى اۋىلىنان 36 بالا قامالدىق. قوردايدان 47 بالا قامالدى. حالىققا راحمەت. بىزگە كومەكتەستى. 12 ساعات قامالىپ وتىردىق. ەشقانداي قورعاۋشى بەرىلمەدى. ارامىزدا جان-جاقتان كەلگەن جىگىتتەر بولدى. شىمكەنت، الماتى، تارازدان، قىزىلوردا، جاركەنت، مەركىدەن ازاماتتار كەلدى. حالىققا راحمەت»،-دەيدى نۇربول الماحانبەت.
تىلشىمىزگە سۇحبات بەرگەن قاراكەمەر اۋىلىنىڭ تۇرعىندارىنىڭ ايتۋىنشا، قازاقتار دۇڭگەندەرمەن بۇلاي قاقتىعىسۋ تۋرالى ويلاماعان.
«قازاقتار دۇڭگەندەرمەن سويلەسۋگە ەشقانداي دايىندىقسىز بارعان. ولار توبەلەسەمىز دەپ ويلاماعان، ءجاي تىلدەسۋگە بارعان. ولاردىڭ قولىندا كۇرەك، تاس بولسا، دۇڭگەندەردىڭ قولىندا مىلتىق، اۆتومات بولدى. ولار اتتى، ءتۇنى بويى اتتى. ەگەر كومەكتەسپەگەندە جان-جاقتان كەلمەگەندە مۇنىڭ ارتى قانداي بولار ەدى؟! دۇڭگەندەر «مەشىتكە بارامىز، يماندىمىز» دەيدى. ول وتىرىك، ادامشى ءسوز. ءبىزدىڭ قارۋسىز جۇرگەن بالالارىمىز قامالدى. ال مىلتىق ۇستاعان ولار قامالعان جوق، قاشىپ ءجۇر. بۇلاردى كوشىرۋ كەرەك» ،- دەيدى قاراكەمەر اۋىلىنىڭ تۇرعىندارى.
ەسكە سالايىق، 7 اقپاندا كەشكى ساعات 19:00-دە جامبىل وبلىستىق پوليتسيا دەپارتامەنتىنە "قورداي اۋدانىنىڭ ماسانچي اۋىلىنىڭ جانىندا 70-تەن استام ادام توبەلەسىپ جاتىر" دەگەن اقپارات تۇسكەن. زاڭسىز ارەكەتتەردى توقتاتۋ ءۇشىن دەرەۋ پوليتسيا قىزمەتكەرلەرى جىبەرىلەدى. سول جەردە بولعان ادامدار توبەلەستى ۆيدەوعا ءتۇسىرىپ، الەۋەمەتتىك جەلى ارقىلى تاراتقان.
سونىڭ سالدارىنان جاقىن جەردەگى اۋقاتتى جانە بۇلان باتىر اۋىلدارىنان كەلگەن 300-دەن استام ازامات توبەلەسكە قوسىلادى. ەكى جاق ءبىر-بىرىنە تاس لاقتىرىپ، تاياقپەن ۇرعان. ءتىپتى، قارۋ دا قولدانعان. سالدارىنان 8 ادام قازا بولدى. 40-تان استامى جاراقات الدى. ولاردىڭ ىشىندە وق تيگەن ەكى پوليتسەي بار.
جاپپاي توبەلەستىڭ ارتى تارتىپسىزدىكتەرگە ۇلاسقان. قازىرگى مالىمەتكە سايكەس، 30-دان استام جەكە ءۇي، 15 ساۋدا ءۇيى مەن 23 كولىك زاقىمداندى.
ىشكى ىستەر مينيسترلىگى 47 ادام ۇستالعانىن حابارلادى. سوتقا دەيىنگى تەرگەۋ شارالارى قىلمىستىق كودەكستىڭ 272-بابى (جاپپاي تارتىپسىزدىكتەردى ۇيىمداستىرۋ جانە قاتىسۋ) مەن 99-بابى (ادام ءولتىرۋ) بويىنشا جۇرگىزىلىپ جاتىر.
قارلىعاش زارىققانقىزى،
"ادىرنا" ۇلتتىق پورتالى
