جامبىل وبلىسىنىڭ قورداي اۋدانىندا تۋىنداعان تۇرمىستىق كيكىلجىڭ جاپپاي تارتىپسىزدىككە ۇلاسىپ 7 اقپاندا ماسانشى اۋىلىندا جانجال شىعىپ، كەيىن توبەلەسكە كورشى اۋقاتتى جانە بۇلان باتىر اۋىلدارىنان كەلگەن تۇرعىندار قوسىلعان. ەكى جاق ءبىر-بىرىنە تاس لاقتىرىپ، تاياقپەن ۇرعان. ءتىپتى، قارۋ دا قولدانعان. قاقتىعىس سالدارىنان 10 ادامنىڭ قازا بولىپ، 40-تان استامى جاراقات العانى بەلگىلى بولدى.
قازاقستان پرەزيدەنتى قاسىم-جومارت توقاەۆ تىكەلەي ەفيرگە شىعىپ، مالىمدەمە جاسادى. ول قازا بولعانداردىڭ وتباسىنا كوڭىل ايتىپ، زارداپ شەككەندەرگە كومەك كورسەتىلەتىنىن ايتتى. مەملەكەت باسشىسىنىڭ تاپسىرماسىمەن ۇكىمەت كوميسسياسى قۇرىلدى.
قورداي اۋدانىندا بولعان وقيعا كەزىندە 36 تۇرعىن ءۇي، 11 كوممەرتسيالىق نىسان، 44 اۆتوكولىك ورتەنىپ، 40-قا جۋىق ءۇيدىڭ تەرەزەلەرى قيراعان. كەشەلى بەرى اۋىلداردىڭ ءىشىن تازارتۋ جۇمىستارىنا 30 تەحنيكا، 125 ادام جۇمىلدىرىلعان. شىعىن كولەمى ەسەپتەلىپ جاتىر.
"ادىرنا" ۇلتتىق پورتالى
https://youtu.be/cKtyckyMmAw
