Jambyl oblysynyń Qordaı aýdanynda týyndaǵan turmystyq kıkiljiń jappaı tártipsizdikke ulasyp 7 aqpanda Masanshy aýylynda janjal shyǵyp, keıin tóbeleske kórshi Aýqatty jáne Bulan batyr aýyldarynan kelgen turǵyndar qosylǵan. Eki jaq bir-birine tas laqtyryp, taıaqpen urǵan. Tipti, qarý da qoldanǵan. Qaqtyǵys saldarynan 10 adamnyń qaza bolyp, 40-tan astamy jaraqat alǵany belgili boldy.
Qazaqstan prezıdenti Qasym-Jomart Toqaev tikeleı efırge shyǵyp, málimdeme jasady. Ol qaza bolǵandardyń otbasyna kóńil aıtyp, zardap shekkenderge kómek kórsetiletinin aıtty. Memleket basshysynyń tapsyrmasymen úkimet komıssııasy quryldy.
Qordaı aýdanynda bolǵan oqıǵa kezinde 36 turǵyn úı, 11 kommerııalyq nysan, 44 avtokólik órtenip, 40-qa jýyq úıdiń terezeleri qıraǵan. Kesheli beri aýyldardyń ishin tazartý jumystaryna 30 tehnıka, 125 adam jumyldyrylǵan. Shyǵyn kólemi eseptelip jatyr.
"Adyrna" ulttyq portaly
