Alqabiler soty Atbasar türmesındegı azaptau ısıne qatysy bar dep aiyptalǧan qyzmetkerlerdı aqtady, dep habarlaidy «Adyrna» tılşısı.
24 jeltoqsanda Aqmola oblysynyŋ mamandandyrylǧan audanaralyq qylmystyq ıster jönındegı sotynda alqabilerdıŋ qatysuymen qylmystyq-atqaru jüiesı komitetınıŋ 12 qyzmetkerıne qatysty qylmystyq ıs qaraldy.
Qylmystyq qudalau organy QAJK qyzmetkerlerın Atbasar qalasyndaǧy mekemede jazasyn ötep jatqan sottalǧandarǧa tyiym salynǧan yqpal etu ädısterın qoldandy dep aiyptaǧan edı.
Alqabiler ıstı qarau qorytyndysy boiynşa sottaluşylardyŋ kınäsızdıgı turaly şeşım şyǧardy. Qylmys oqiǧasynyŋ bolmauy jäne sottaluşylardyŋ kınäsızdıgı turaly şeşım keŋesu bölmesınde dauys beru arqyly qabyldandy.
«Dauys beruge 10 alqabi jäne 1 sudia qatysyp, ärqaisysy bır dauystan ie. Dauys beru kezınde artyqşylyq qarastyrylmaǧan. Sot ükımımen QAJK-nyŋ 12 qyzmetkerı kınäsız dep tanyldy. Aqtalǧandarǧa oŋaltu qūqyǧy tanyldy»,-delıngen habarlamada.
Aita keteiık, 2023 jyldyŋ qyrküiegınde jelıde türme qyzmetkerlerınıŋ därethanany juudan bas tartqany üşın sottalǧandarǧa küş qoldanǧan videosy paida bolǧan edı. Būl oqiǧaǧa bailanysty türmenıŋ 12 qyzmetkerıne aiyp taǧylyp, sot prosesı 2024 jylǧy şıldede bastalǧan. Aiyptaluşylar sotta koloniianyŋ ışkı tärtıbın saqtaǧandaryn, qarsylyq tanytqan sottalǧandarǧa qatysty arnaiy qūraldardy qoldanuǧa mäjbür bolǧanyn aityp, öz äreketterınıŋ zaŋ aiasynda jüzege asqanyn mälımdegen jäne özderın tolyq aqtaudy sūraǧan.
Al biyl aqpan aiynda bırınşı satydaǧy sot türme qyzmetkerlerın kınäsız dep tanydy. Būl şeşım qūqyq qorǧauşylar men azamattyq belsendılerdıŋ narazylyǧyn tudyrǧan bolatyn.
