"ادىرنا" ۇلتتىق پورتالى اشىق اقپارات الاڭى بولعاندىقتان، رەداكتسيامىزعا بازىناسىن ايتىپ، مۇڭ-مۇقتاجىن جۇكتەپ تالاي حاتتار كەلىپ جاتادى. مىنە، بۇگىن دە پورتال وقىرماندارىنىڭ ءبىرى اماندىق داۋلەتبەك مىرزانىڭ حاتى كەلدى. حاتتى جاريالاۋ باق-نىڭ وقىرمان الدىنداعى پارىزى بولعاندىقتان نازارلارىڭىزعا ۇسىنۋدى ءجون كوردىك. تومەندەگى حاتقا ەل پرەزيدەنتىنىڭ كەڭەسشىسى ەرلان قارين مىرزا جاۋاپ بەرىپ، ءوزىنىڭ ءۋاجىن ايتامىن دەسە، ونى دا پورتالىمىزعا جاريالاۋعا ءازىرمىز.
ال بىزگە كەلگەن وقىرمان حاتىنىڭ ءماتىنى تومەندەگىدەي:
پرەزيدەنت توقاەۆتىڭ كەڭەسشىسى ەرلان قارين مىرزانىڭ ءوز Facebook اككاۋنتىندا 11.02.2020 20:47-دە قوردايداعى جاعدايعا قاتىستى جاريالاعان پوستىن وقىپ، جۇمسارتىپ ايتقاندا شوك بولىپ وتىرمىز. نەگە دەيسىزدەر عوي، بىلاي:
بىرىنشىدەن: «مەملەكەت تاراپىنان ءتيىستى ءىس-شارالار دەرەۋ قابىلدانۋدا - وقيعا سالدارىن جويۋ ماقساتىندا ۇكىمەتتىك كوميسسيا قۇرىلىپ، زارداپ شەككەندەرگە ءتيىستى كومەك كورسەتىلىپ، وسى جاعدايعا جول بەرگەن جاۋاپتى قىزمەتكەرلەر ورنىنان بوساتىلدى. بىراق، ادەتتەگىدەي، الەۋمەتتىك جەلىدەگى داۋ-داماي، ءسوز تارتىس توقتايتىن ەمەس.» سىزدەردى قايدام، ءوز باسىم قارين مىرزانىڭ بۇل ءسوزىن شىندىققا جاقىنداتا المايمىن. زارداپ شەككەندەرگە ءتيىستى كومەك كورسەتىلدى دەگەننىڭ وتىرىك ەكەنىن ءبارىڭىز ءبىلىپ وتىرسىزدار. كوميسسيا جۇمىسى ءالى اياقتالعان جوق. ال، وسى جاعدايعا جول بەرگەن جاۋاپتى قىزمەتكەرلەر ورنىنان بوساتىلدى دەگەندى ايتۋى مۇلدەم ەرلان مىرزانىڭ دەڭگەيىنە سايكەس كەلمەيدى. ول جاعدايعا جول بەرگەندەردىڭ استانانىڭ سول جاعالاۋىن مەكەندەيتىنىن ەرەكەڭ ءسىز بەن بىزدەن ەڭ از ءجۇز ەسە ارتىق ءبىلىپ وتىر. ارينە، بۇنداي جاعدايدا الەۋمەتتىك جەلىلەردە (سالىستىرمالى تۇردە حالىقتىڭ ءسوز بوستاندىعى بار جالعىز الاڭ) حالىق اراسىندا تالقىلاۋ، پىكىر ءبىلدىرۋ، وي ءبولىسۋدىڭ تەز توقتاي قالماۋى زاڭدىلىق. ەرلان مىرزانىڭ بۇنى نەگە «داۋ-داماي، ءسوز تارتىس» دەپ اتاعانى بىزگە بەلگىسىز. داۋلاسىپ جاتقان ادام جوق، ەلدىڭ ءبارىنىڭ ايتىپ جاتقانى باسقا دياسپورالاردى قازاق ۇلتىنا ينتەگراتسيالاندىرۋ ساياساتىنىڭ وتىز جىل بويى وتە ءساتسىز نەمەسە مۇلدەم جۇرگىزىلمەگەندىگى. ءبولىپ قاراستىرۋ ارقىلى «ءبولىپ ال دا بيلەي بەر»-ءدىڭ كەلەسى ءبىر ساتىسىنا جول اشىپ وتىرعانىن كەڭەسشى مىرزانىڭ ءوزىنىڭ بىلمەۋى مۇمكىن بە؟
ەكىنشىدەن: قارين مىرزا «داۋلاسىپ» جاتقانداردى شارتتى تۇردە بىرنەشە توپتارعا ءبولىپتى: 1. ۇلتشىلدار 2. ليبەرالدار 3. بىرلىككە شاقىرعاندار 4. دىنشىلدەر. ءدال وسى جەردە پرەزيدەنت كەڭەسشىسىنە ەش جاراسپايتىن ارەكەت بايقايمىز. سەبەبىن دە ايتى كەتەيىن: ۇلتشىلدار بولعان جاعدايعا باسقا ۇلت وكىلدەرىن ەمەس ورتالىق (اقوردا/كىتاپحانا) بيلىكتىڭ ءوزىن كىنالاپ وتىر. «سترەلكانى» بۇلاي وڭاي بۇرا سالۋ قازىرگى كەزدە ەش ناتيجە بەرمەيتىن ءادىس. قازاقتار مەن باسقا ەتنوس وكىلدەرى بولىپ بولىنبەۋىمىز كەرەك دەگەن ۇستانىمدى ليبەرالدارعا عانا مەنشىكتەپ قويىپتى. سوندا مەملەكەتشىل (ۇلتشىل) ۇستانىمداعى ازاماتتاردى بۇعان قارسى دەگىسى كەلە مە ەكەن؟ الدە ۇلتشىلدار بىرلىككە قارسى ما ەكەن؟ الدە دىنگە بەت بۇرعان ازاماتتار ۇلت-ۇلتقا ءبولىنۋدى دۇرىس دەپ ەسەپتەي مە ەكەن؟ الدە ۇلتشىلدار بىرلىككە شاقىرعاندارعا قارسى ما ەكەن؟ بۇلاي ميداي ارالاستىرۋ كىمگە كەرەك؟
جالپى، ساياسي وقيعالارعا باعا بەرۋ مەن اناليز جاساۋداعى كۇردەلى عىلىمي مەتودولوگيالار مەن تەحنولوگيالاردى ارالاستىرماي-اق قويعان كۇننىڭ وزىندە ەرەكەڭنىڭ بۇل سوزدەرى كوڭىلدە جىلت ەتكەن شاعىن ءۇمىتتى ءسوندىرىپ جىبەردى. قارين مىرزانى سىرتتاي مەملەكەتشىل، ۇلتشىل تۇلعا دەپ سىيلاپ جۇرگەن، پرەزيدەنتكە كەڭەسشى بولۋىنا ۇمىتپەن قاراپ جۇرگەن ءبىزدىڭ جاس ۇلتشىلداردىڭ كوڭىلى سۋ سەپكەندەي بولدى. سەنىم ارتقان ساياساتتانۋشىمىزدىڭ كومپەتەنتسياسى وسى بولسا، كۇيسەگەنىمىزدى ۇرايىق. وكىنىشتى...
اماندىق داۋلەتبەكۇلى
