"Adyrna" ūlttyq portaly aşyq aqparat alaŋy bolǧandyqtan, redaksiiamyzǧa bazynasyn aityp, mūŋ-müqtajyn jüktep talai hattar kelıp jatady. Mıne, bügın de portal oqyrmandarynyŋ bırı Amandyq Däuletbek myrzanyŋ haty keldı. Hatty jariialau BAQ-nyŋ oqyrman aldyndaǧy paryzy bolǧandyqtan nazarlaryŋyzǧa ūsynudy jön kördık. Tömendegı hatqa el Prezidentınıŋ keŋesşısı Erlan Qarin myrza jauap berıp, özınıŋ uäjın aitamyn dese, ony da portalymyzǧa jariialauǧa äzırmız.
Al bızge kelgen oqyrman hatynyŋ mätını tömendegıdei:
Prezident Toqaevtyŋ keŋesşısı Erlan Qarin myrzanyŋ öz Facebook akkauntynda 11.02.2020 20:47-de Qordaidaǧy jaǧdaiǧa qatysty jariialaǧan postyn oqyp, jūmsartyp aitqanda şok bolyp otyrmyz. Nege deisızder ǧoi, bylai:
Bırınşıden: «Memleket tarapynan tiıstı ıs-şaralar dereu qabyldanuda - oqiǧa saldaryn joiu maqsatynda Ükımettık komissiia qūrylyp, zardap şekkenderge tiıstı kömek körsetılıp, osy jaǧdaiǧa jol bergen jauapty qyzmetkerler ornynan bosatyldy. Bıraq, ädettegıdei, äleumettık jelıdegı dau-damai, söz tartys toqtaityn emes.» Sızderdı qaidam, öz basym Qarin myrzanyŋ būl sözın şyndyqqa jaqyndata almaimyn. Zardap şekkenderge tiıstı kömek körsetıldı degennıŋ ötırık ekenın bärıŋız bılıp otyrsyzdar. Komissiia jūmysy älı aiaqtalǧan joq. Al, osy jaǧdaiǧa jol bergen jauapty qyzmetkerler ornynan bosatyldy degendı aituy müldem Erlan myrzanyŋ deŋgeiıne säikes kelmeidı. Ol jaǧdaiǧa jol bergenderdıŋ Astananyŋ sol jaǧalauyn mekendeitının Erekeŋ sız ben bızden eŋ az jüz ese artyq bılıp otyr. Ärine, būndai jaǧdaida äleumettık jelılerde (salystyrmaly türde halyqtyŋ söz bostandyǧy bar jalǧyz alaŋ) halyq arasynda talqylau, pıkır bıldıru, oi bölısudıŋ tez toqtai qalmauy zaŋdylyq. Erlan myrzanyŋ būny nege «dau-damai, söz tartys» dep ataǧany bızge belgısız. Daulasyp jatqan adam joq, eldıŋ bärınıŋ aityp jatqany basqa diasporalardy qazaq ūltyna integrasiialandyru saiasatynyŋ otyz jyl boiy öte sätsız nemese müldem jürgızılmegendıgı. Bölıp qarastyru arqyly «bölıp al da bilei ber»-dıŋ kelesı bır satysyna jol aşyp otyrǧanyn keŋesşı myrzanyŋ özınıŋ bılmeuı mümkın be?
Ekınşıden: Qarin myrza «daulasyp» jatqandardy şartty türde bırneşe toptarǧa bölıptı: 1. Ūltşyldar 2. Liberaldar 3. Bırlıkke şaqyrǧandar 4. Dınşılder. Däl osy jerde prezident keŋesşısıne eş jaraspaityn äreket baiqaimyz. Sebebın de aity keteiın: Ūltşyldar bolǧan jaǧdaiǧa basqa ūlt ökılderın emes ortalyq (Aqorda/kıtaphana) bilıktıŋ özın kınälap otyr. «Strelkany» būlai oŋai būra salu qazırgı kezde eş nätije bermeitın ädıs. Qazaqtar men basqa etnos ökılderı bolyp bölınbeuımız kerek degen ūstanymdy liberaldarǧa ǧana menşıktep qoiypty. Sonda memleketşıl (ūltşyl) ūstanymdaǧy azamattardy būǧan qarsy degısı kele me eken? Älde ūltşyldar bırlıkke qarsy ma eken? Älde dınge bet būrǧan azamattar ūlt-ūltqa bölınudı dūrys dep eseptei me eken? Älde ūltşyldar bırlıkke şaqyrǧandarǧa qarsy ma eken? Būlai midai aralastyru kımge kerek?
Jalpy, saiasi oqiǧalarǧa baǧa beru men analiz jasaudaǧy kürdelı ǧylymi metodologiialar men tehnologiialardy aralastyrmai-aq qoiǧan künnıŋ özınde Erekeŋnıŋ būl sözderı köŋılde jylt etken şaǧyn ümıttı söndırıp jıberdı. Qarin myrzany syrttai memleketşıl, ūltşyl tūlǧa dep syilap jürgen, prezidentke keŋesşı boluyna ümıtpen qarap jürgen bızdıŋ jas ūltşyldardyŋ köŋılı su sepkendei boldy. Senım artqan saiasattanuşymyzdyŋ kompetensiiasy osy bolsa, küisegenımızdı ūraiyq. Ökınıştı...
Amandyq DÄULETBEKŪLY
