م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ اكتەرى، قر ەڭبەك سىڭىرگەن قايراتكەرى باۋىرجان قاپتاعاي «قوجايىندار» (رەج. ءا.ەرجانوۆ) فيلمىمەن گەرمانيانىڭ زيگبۋرگ قالاسىندا وتەتىن حالىقارالىق كينوفەستيۆالگە قاتىسپاق.
بۇعان دەيىن «پارتيزاندىق كينو» قوزعالىسىنىڭ وكىلدەرىنىڭ ءبىرى ءادىلحان ەرجانوۆ تۇسىرگەن «قوجايىندار» ءفيلمى الەمدەگى ەڭ ابىرويلى ەلدەردەگى (كانن، تورونتو، اۆستراليا، وڭتۇستىك كورەيا) كينوفەستيۆالدەردە كورسەتىلگەن بولاتىن.
شالعايداعى اۋىلداعى ۇلتاراقتاي جەرگە تالاسقان جانداردىڭ تارتىسى بەينەلەنەتىن «قوجايىندار» فيلمىندە قازاقتىڭ بۇرىننان بۇگىنگە دەيىن جويىلماي كەلە جاتقان جەر داۋى، ءۇي تالاسى ماسەلەلەرى كورىنىس تابادى.
«مەن – كينونىڭ ەمەس، تەاتردىڭ اكتەرى ەكەندىگىمدى اتاپ ايتقىم كەلەدى. ءتۇسىرىلىم بارىسىندا رەجيسسەرمەن ويىمىز سايكەسپەي، ءبىر-بىرىمىزبەن تۇسىنىسە الماي قالعان كەزدەرىمىز دە بولدى. فيلمدە بەيىتتىڭ باسىندا قايتىس بولعان ادامدى جەرلەپ جاتىپ، اۋىلدىڭ ۇلكەنى رەتىندە ءسوز سويلەپ، سوڭىندا: «ومىردە بيدەن باسقا نە بار» دەپ بيلەيتىن تۇسىم بار. ال، ول – قازاققا جات دۇنيە. بىراق، تەرەڭىرەك ءۇڭىلىپ قاراساق، قازىر ءولىمنىڭ ءوزى ويىنشىققا اينالىپ بارا جاتىر. ءولىم شىققان ۇيگە «وي، باۋىرىمداپ» جىلاپ، ءۇن شىعارىپ كىرۋگە قالانى قويىپ اۋىلدىڭ وزىندە توسىرقايتىن بولدىق. سوعان قاراماستان، ءوز باسىم ءومىر بويى قازا ۇستىنە «وي، باۋىرىمداپ» كىرەمىن. مىنە، رەجيسسەر بۇگىنگى كۇننىڭ شىندىعىن سۋرەتتەيتىن وسىنداي ەلەمەنتتەردى فيلمدە ۇتىمدى پايدالانعان»، – دەيدى ب.قاپتاعاي.
«سونىمەن قاتار، جاس رەجيسسەر ءا.ەرجانوۆقا ءبىر تاڭعالاتىنىم – ءوزىنىڭ ىشكى ويىن كينو ارقىلى كورسەتە الاتىندىعى. ونىڭ جولى بولەك، دارا جانە ول بەتكە العان تۇسىنان اينىمايدى. سول سەبەپتى مويىنداساڭىز دا، مويىنداماساڭىز دا قازاقستانداعى ون رەجيسسەردىڭ قاتارىنا كىرەتىن ءا.ەرجانوۆتىڭ ءفيلمى گەرمانياداعى كينوفەستيۆالگە قاتىسپاق» دەگەن اكتەر وسى ساپارىندا الەم ەلدەرىنىڭ ۇزدىك كينو-تۋىندىلارى كورسەتىلەتىن فەستيۆالدە كينو سالاسىنىڭ دامۋ باعىتتارىن باقىلاپ قايتپاق.
دايىنداعان ءمولدىر بەكجان
