M.Áýezov atyndaǵy Qazaq memlekettik akademııalyq drama teatrynyń akteri, QR eńbek sińirgen qaıratkeri Baýyrjan Qaptaǵaı «Qojaıyndar» (rej. Á.Erjanov) fılmimen Germanııanyń Zıgbýrg qalasynda ótetin Halyqaralyq kınofestıvalge qatyspaq.
Buǵan deıin «Partızandyq kıno» qozǵalysynyń ókilderiniń biri Ádilhan Erjanov túsirgen «Qojaıyndar» fılmi álemdegi eń abyroıly elderdegi (Kann, Toronto, Avstralııa, Ońtústik Koreıa) kınofestıvalderde kórsetilgen bolatyn.
Shalǵaıdaǵy aýyldaǵy ultaraqtaı jerge talasqan jandardyń tartysy beınelenetin «Qojaıyndar» fılminde qazaqtyń burynnan búginge deıin joıylmaı kele jatqan jer daýy, úı talasy máseleleri kórinis tabady.
«Men – kınonyń emes, teatrdyń akteri ekendigimdi atap aıtqym keledi. Túsirilim barysynda rejıssermen oıymyz sáıkespeı, bir-birimizben túsinise almaı qalǵan kezderimiz de boldy. Fılmde beıittiń basynda qaıtys bolǵan adamdy jerlep jatyp, aýyldyń úlkeni retinde sóz sóılep, sońynda: «ómirde bıden basqa ne bar» dep bıleıtin tusym bar. Al, ol – qazaqqa jat dúnıe. Biraq, tereńirek úńilip qarasaq, qazir ólimniń ózi oıynshyqqa aınalyp bara jatyr. Ólim shyqqan úıge «oı, baýyrymdap» jylap, ún shyǵaryp kirýge qalany qoıyp aýyldyń ózinde tosyrqaıtyn boldyq. Soǵan qaramastan, óz basym ómir boıy qaza ústine «oı, baýyrymdap» kiremin. Mine, rejısser búgingi kúnniń shyndyǵyn sýretteıtin osyndaı elementterdi fılmde utymdy paıdalanǵan», – deıdi B.Qaptaǵaı.
«Sonymen qatar, jas rejısser Á.Erjanovqa bir tańǵalatynym – óziniń ishki oıyn kıno arqyly kórsete alatyndyǵy. Onyń joly bólek, dara jáne ol betke alǵan tusynan aınymaıdy. Sol sebepti moıyndasańyz da, moıyndamasańyz da Qazaqstandaǵy on rejısserdiń qataryna kiretin Á.Erjanovtyń fılmi Germanııadaǵy kınofestıvalge qatyspaq» degen akter osy saparynda álem elderiniń úzdik kıno-týyndylary kórsetiletin festıvalde kıno salasynyń damý baǵyttaryn baqylap qaıtpaq.
Daıyndaǵan Móldir BEKJAN
