قازاقستان رەسپۋبليكاسى ۇلتتىق مۋزەيىندە «ۇلتتىق مۋزەيگە سىي تارتۋ» اكتسياسىنىڭ جالعاسى رەتىندە جادىگەرلەردى قابىلداۋ شاراسى ءوتتى، دەپ حابارلايدى ۇلتتىق مۋزەيدىڭ اقپاراتتىق-يميدجدىك قىزمەتى. جيىندا ءسوز العان ۇلتتىق مۋزەي ديرەكتورىنىڭ ورىنباسارى جاكەن تايماعامبەتوۆ «ۇلتتىق مۋزەيگە سىي تارتۋ» اكتسياسى قۇندى جارىگەرلەردى جوعالىپ كەتۋدەن ساقتاپ قالۋ ءۇشىن جانە ولاردى ءبىر ورىندا توپتاستىرۋ ماقساتىندا ءجۇرىپ جاتقانىن ايتتى.
«وسىدان ءبىر جىلداي ۋاقىت بۇرىن ءدال وسى جەردە «ۇلتتىق مۋزەيگە سىي» اكتسياسى باستاۋ العان بولاتىن. وسى وتكەن ءبىر جىلدا اكتسيا استانا، الماتى جانە قىزىلوردا قالاسىندا ءۇش دۇركىن ءوتىپ، ناتيجەسىندە مۋزەي قورىنا تۇسكەن 1305 جادىگەردەن جەلتوقسان ايىندا «ۇلتتىق مۋزەيگە سىي» كورمەسى ۇيىمداستىرىلدى. سول العاشقى اكتسيا بارىسىندا قوعام جانە ساياسات قايراتكەرى ەرلان كارين جەبەنىڭ وقتارىن، ادىلەت ءمينيسترىنىڭ ورىنباسارى باقىتجان ءابدىرايىم بيلەر سوتىنىڭ لاۋازىمدىق بەلگىسى سىندى تاريحي جادىگەرلەردى مۋزەيگە تاپسىردى. سونىمەن قاتار كەز-كەلگەن قازاق ەسىمدەرىن ماقتانىپ ايتاتىن ءشامشى قالداياقوۆ، كەنەن ازىرباەۆ، قادىر مىرزا ءالى، جاقسىلىق ۇشكەمپىروۆ جانە كوپتەگەن باسقا تاريحي تۇلعالاردىڭ پايدالانعان بۇيىمدارىن، ەڭبەكتەرىن ەندى مۋزەي ەكسپوزيتسياسىنان كورۋگە بولادى» – دەدى ج.تايماعامبەتوۆ.
بۇل جولعى قابىلدانعان جادىگەرلەردىڭ قاتارىندا ءابىش كەكىلباەۆ، روزا باعلانوۆا، زەينۋللا الشىنباەۆ، مادينا ەراليەۆا، الەكساندر ۆينوكۋروۆ قاتارلى داڭقتى تۇلعالاردىڭ جانە تاعىدا باسقا تانىمال ادامداردىڭ جەكە ءومىرى مەن شىعارماشىلىعىنا قاتىستى زاتتار بار.
مارال ساعىنايقىزى باعلانوۆا، (ر.باعلانوۆانىڭ كەلىنى):
-ءبىز انامىزدىڭ 1960 جىلداردىڭ اياق شەنىندە تىگىلگەن ساحنالىق كويلەگى، قولىنا ۇستاعان ورامالىن جانە ساحنالىق اياق كيىمىن بۇگىن مۋزەيگە تابىستاپ جاتىرمىز. بۇل كيىمدەردىڭ بارلىعىن اپامىزدىڭ جەكە تىگىنشىسى تىككەن بولاتىن. سونىمەن قاتار ءوزىمىزدىڭ سۋرەتشى سالعان اپامىزدىڭ پورترەتى، شاعىن كارتينالارى بار. ۇلت تاريحىنا قاتىستى جادىگەرلەردى جيناپ جاتقان ۇلتتىق مۋزەيگە العىسىمىز شەكسىز.
ارسەن ەراليەۆ، (م.ەراليەۆانىڭ ۇلى):
-1997 جىلى دايىندالعان انامنىڭ ساحنالىق كيىمىن جانە تاعى باسقا تۇتىنعان زاتتارىن تابىستاپ وتىرمىز. سونىمەن قاتار ءبىز ءۇشىن ەڭ قۇندى جادىگەر انامنىڭ ۇستاعان بايانىن ۇلتتىق مۋزەيگە سىيعا تارتتىق. انام 1970 جىلداردان باستاپ 1995 جىلدارعا دەيىن بايانمەن قوسىلىپ ءان ايتقان. تالاي گاسترولدىك ساپارلاردا وسى باياندى ارقالاپ جۇرگەن بولاتىن. سوندىقتان دا بۇل باياننىڭ حالقىمىز ءۇشىن دە، ءبىز ءۇشىن دە ورىنى ەرەكشە دەپ ويلايمىز.
سونىمەن قاتار قر كوركەمونەر اكادەمياسىنىڭ اكادەميگى، قازاقستاننىڭ ەڭبەك سىڭىرگەن قايراتكەرى، ۇلتتىق ناقىشپەن ورنەكتەلگەن شىعارمالارى اڭىز بەن ەرتەگىلەر الەمىن ەلەستەتەتىن تىلەۋجان باتانوۆ، قازاقستاننىڭ ەڭبەك سىڭىرگەن قايراتكەرى، سيمۆوليست-سۋرەتشى، مونۋمەنتاليست، «قازاق ەلى» مونۋمەنتىنىڭ اۆتورى، ءمۇسىنشى سەمبىعالي سماعۇلوۆ، قر سۋرەتشىلەر وداعىنىڭ مۇشەسى. قر مادەنيەتىنە ەڭبەك سىڭىرگەن قايراتكەر، قر ەڭبەك سىڭىرگەن ونەر قايراتكەرى، قر كوركەم ونەر اكادەمياسىنىڭ تولىق مۇشەسى، كەسكىندەمەشى، سۋرەتشى-مونۋمەنتشى، پورترەتشى ەرلان ساحيپۇلى قاتارلى سۋرەتشى، مۇسىنشىلەر دە ءوز تۋىندىلارىن مۋزەيگە سىي رەتىندە تابىستادى.
«ۇلتتىق مۋزەيگە سىي تارتۋ» اكتسياسى 2015 جىلى ناۋرىز ايىندا باستالعان. اكتسيانىڭ اشىلۋ سالتاناتىنا ۇكىمەت باسشىسىنىڭ سول كەزدەگى ورىنباسارى ب.ساپارباەۆ باستاعان لاۋازىمدى تۇلعالار جانە قوعام قايراتكەرلەرى قاتىسقان بولاتىن. اكتسيا وسى ۋاقىتقا دەيىن استانا، الماتى، قىزىلوردا قالالارىندا ۇيىمداستىرىلدى. ناتيجەسىندە 1300-دەي قۇندى جادىگەر ۇلتتىق مۋزەي زالدارىنان ورىن العان بولاتىن. اكتسيا الداعى ۋاقىتتا دا جالعاسىن تاباتىن بولادى.
