«ارناۋ» ەتنوگرافيالىق-فولكلورلىق ءانسامبلىنىڭ قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترىنىڭ قاتىسۋمەن ەلىمىزدىڭ 25 جىلدىعىنا ارنالعان «قازاق ەلى» اتتى شىعارماشىلىق كەشى ءوتتى.
نۇرگۇل امانتايقىزى جەتەكشىلىك ەتەتىن «ارناۋ» ەتنوگرافيالىق-فولكلورلىق ءانسامبلى بۇعان دەيىن شەت ەلدەردە جانە ەلىمىزدە بىرنەشە بايقاۋلاردا ۇزدىكتەر قاتارىنان كورىنگەن. اتاپ ايتقاندا، ولار «استانا-مەرەي» حالىقارالىق بايقاۋىندا، «اسىل مۇرا» قالالىق جانە «عۇمىرداريا» رەسپۋبليكالىق بايقاۋلارىندا، ا.زاتاەۆيچ اتىنداعى II رەسپۋبليكالىق جاس مۋزىكانتتار بايقاۋىندا باس جۇلدە، بولگاريادا وتكەن VI حالىقارالىق «كۇن استىنداعى بيبىشىلىك» كونكۋرسىندا ءبىرىنشى ورىن، حالىقارالىق «بوزتورعاي» بايقاۋىندا ءبىرىنشى ورىن، ن.تىلەنديەۆ اتىنداعى رەسپۋبليكالىق بايقاۋدا ءبىرىنشى ورىن يەلەنگەن. ونەرپازدار ادىرنا، جەتىگەن، سازسىرناي، شاڭقوبىز، قوبىز، دومبىرا، ءۇش شەكتى دومبىرا، شىڭكىلدەك، داۋىلپاز سىندى قازاقتىڭ بايىرعى ۇلتتىق اسپاپتارىن جەتىك مەڭگەرگەن. وسىنداي اسپاپتاردى ۇيلەستىرىپ فوننوگرامماسىز كونتسەرت قويۋ ۇلكەن ەڭبەكتى جانە شەبەر ورىنداۋشىلىقتى قاجەت ەتەدى. مەكتەپ جاسىنداعى بالالاردىڭ وسىنداي ۇلكەن كونتسەرتتىك باعدارلاماعا دايىن بولعانىنا تاڭدانىسىن جاسىرماعان كورەرمەندەر، زال ءىشىن قۇلاق تۇندىرار شاپالاقپەن كومكەردى. ەكى ساعاتتان اسا ۋاقىتقا سوزىلعان كونتسەرتتە كۇي دە تارتىلدى، ءان دە ايتىلدى، بي دە بيلەندى. ۇزىن-سانى جيىرما ەكى شىعارما ورىندالدى.
قۇرمانعازى اتىنداعى اكادەميالىق ۇلت اسپاپتار وركەسترىنىڭ جاس ورەندەرمەن بىرگە ونەر كورسەتكەنى دە تالعامى جوعارى كورەرمەندى ەرەكشە سەزىمگە بولەدى. بۇل وقيعاعا كونتسەرت سوڭىندا قۇتتىقتاۋ ءسوز سويلەپ، باعاسىن بەرگەن قازاقستاننىڭ ەڭبەك سىڭىرگەن قايراتكەرى، «قۇرمەت» وردەنىنىڭ يەگەرى، قازاقستان جازۋشىلار وداعىنىڭ مۇشەسى جارقىن شاكارىم ءسوزىن بىلاي تۇيىندەدى. «قازاقتىڭ باعا جەتپەس التىن مۇراسى قۇرمانعازى اتىنداعى ۇلت اسپاپتار وركەستىرىنىڭ جاس ونەرپازداردى قاناتىنىڭ استىنا الىپ، بىرلەسىپ ونەر كورسەتۋى، قازاق مادەنيەتىندە بۇرىن-سوڭدى بولماعان. بۇل ۇلكەن جەتىستىك! ال، مۇنداي دەمەۋ وسكەلەڭ جاستارعا جىگەر بەرەدى» دەپ اتاپ ءوتتى. سونداي-اق وسى كونتسەرتتى ۇيىمداستىرعان «ارناۋ» ەتنوگرافيالىق-فولكلورلىق ءانسامبلىنىڭ جەتەكشىسى نۇرگۇل امانتايقىزىنا، ر.گليەر اتىنداعى بالالار مۋزىكا مەكتەبىنىڭ ديرەكتورى الما شاحزاداقىزىنا العىس ايتتى. الداعى ۋاقىتتا دا جەمىستى ەڭبەك ەتۋگە تىلەكشى ەكەنىن ءبىلدىردى. كونتسەرت اياقتالعان تۇستا كورەرمەندەر ورىندارىنان تۇرعىسى كەلمەي، تاعى ءبىر كۇي ورىنداپ بەرۋىن سۇرادى. كورەرمەن كوڭىلىن جىقپاعان ونەر ۇجىمى «سارىارقا» كۇيىن قايتادان اۋەلەتتى.
كونتسەرتتەن سوڭ نۇرگۇل امانتايقىزىمەن از-كەم تىلدەسكەن ەدىك. «بۇل كونتسەرتتى ەل تاۋەلسىزدىگىنىڭ جيىرما بەس جىلىنا تارتۋ ەتتىك. شاكىرتتەرىمنىڭ تەك بايقاۋلارعا عانا قاتىسىپ قويماي، دەڭگەيلەرىنىڭ ءوسىپ كەلە جاتقاندىعىن سەزىنسىن دەپ قۇرمانعازى اتىنداعى ۇلت اسپاپتار وركەستىرىمەن بىرلەسە وتىرىپ وسى كەشتى ۇيىمداستىردىق. وسى كۇنگە شەيىن ءبىرشاما جەتىستىكتەرگە جەتتىك. بىراق مۇنىمەن توقتالىپ قالۋعا بولمايدى. ءالى دە شەبەرلىگىمىزدى شىڭداي تۇسەمىز. كەلگەن كورەرمەنگە مىڭ العىس، شاكىرتتەرىمنىڭ ونەرگە دەگەن قۇلشىنىسىن ەسەلەپ ارتتىردى» - دەپ ءسوزىن اياقتادى.
ۇلتتىق اسپاپتاردى ۇلىقتاپ، ءداستۇرلى ءان ونەرىن ورگە سۇيرەپ، اسپاپتا كۇي ورىنداۋدى جوعارى دەڭگەيگە كوتەرىپ، ۇلى ونەردى ۇلىقتاۋعا ۇلەس قوسىپ جۇرگەن «ارناۋ» ەتنوگرافيالىق-فولكلورلىق ءانسامبلى ۇرپاققا ۇلگى بولماق.
جاسۇلان ناۋرىءزالى
