رامازان ستامعازى، قازاقستاننىڭ ەڭبەك سىڭىرگەن قايراتكەرى، ت.جۇرگەنوۆ اتىنداعى قازاق ۇلتتىق ونەر اكادەمياسى «ءداستۇرلى مۋزىكالىق ونەر» كافەدراسىنىڭ مەڭگەرۋشىسى، ءانشى، ۇستاز:
- وتكەن عاسىردا قۇرىلعان ۇلكەن ونەر بىرلەستىكتەرى، ورتالىقتار، كىتاپحانالار جابىلدى. بۇل ءبىزدىڭ جانىمىزدى جەيتىن نارسە. ويتكەنى، ەلدىڭ ءبارى الماتىدان استاناعا كوشىپ كەتكەن جوق. الماتىدا نەگىزىن قالاعان ادامداردىڭ تۇعىرلىق دۇنيەسىن كەيىنگى ۇرپاققا جەتكىزەتىن سانالى ۇرپاق وتىر. 62 تامىرىندا ونەردىڭ ۇلتتىق رۋحى جايىلعان جاستارىمىز بار. ونەر اكادەمياسىندا، كونسەرۋاتوريادا بالەنباي بالا وقيدى. ەندىگى اۋىز سالۋ –سولاردى قىسقارتۋ، قازىرگى مەملەكەتتىڭ ماقساتى. ولاردى قىسقارتسا عاسىردان كەلە جاتقان جىر، تەرمە، داستان، حالىق جانە حالىق كومپوزيتورلارىنىڭ اندەرىن كىم ايتادى؟ وشاعىمىزدىڭ ۇلتتىق الاۋىن وشىرگەننەن نە پايدا؟ قازىر حالىق «سەندەردەن كەيىن كىم بار؟» – دەپ سۇرايدى. نەگە جوق؟ بار. بىراق، ولاردىڭ شىعاتىن، كورىنەتىن جەرى جوق. ال ولاردىڭ بىزگە كەرەگى جوق دەسەك، ەرتەڭ قازاق كىم بولادى؟ ولاردىڭ تامىرىنا بالتا شاپساق ەرتەڭ كىم بولامىز؟ قازىرگى جاستار جاي جاستار ەمەس، ورىنداۋشىلىق مادەنيەتىمەن قوسا عىلىمي ىزدەنىسى جاسايتىن جاستارىمىز بار.
مەملەكەتتىك تاپسىرىس بويىنشا بارلىق دەڭگەيدەن ءوتىپ جوعارى وقۋدى تولىق اياقتاعانشا ونەرپازدارىمىز 30-35 جاسقا كەلەدى. ال كونتسەرتتىك، ونەر بىرلەستىكتەرى ادام قابىلداعاندا «18-20 جاس ارالىعىنداعى جاستار قابىلدانادى» دەگەن شارت قويادى. سوندا سونشا جىل وقۋ وقىپ، ەڭبەك ەتىپ، عىلىممەن اينالىسقان، ۇلكەن ونەر ادامدارىنىڭ ءتالىم-تاربيەسىن العان، ۇستازدارىنىڭ مۇرالارىن جيناعان ادامدار قايدا بارۋ كەرەك؟ ولار وگەيدەن تۋىپ پا ەدى؟ نەگە ولار قايىر تىلەپ بازارعا كەتۋ كەرەك؟ ماماندىعىن اۋىستىرۋ كەرەك پا؟ قازاقتىڭ قاستەرلى، كۇمىس كومەي اق دومبىراسىن ءىلىپ قويىپ نەگە باسقا ماماندىققا كەتۋ كەرەك؟ ءبىزدىڭ مەملەكەت نەگە سوعان قارامايدى؟ مادەنيەت مينيسترلىگى قايدا قارايدى؟ ءبىزدىڭ قازىرگى مادەنيەتىمىز ەسترادا، دجاز، روك، سيمفونيا ەمەس قوي. ءبىز قازاق بولۋ ءۇشىن ءوزىمىزدىڭ ۇلتتىق دۇنيەمىز كەرەك...
جازىپ العان جارقىن سالەنۇلى
20-ءساۋىر كۇنى "ادىرنا" ۇلتتىق-ەتنوگرافيالىق بىرلەستىگى" قوعامدىق قورىنىڭ ۇيىمداستىرۋىمەن الماتىداعى ع.مۇسىرەپوۆ اتىنداعى بالالار مەن جاسوسىپىرمدەر تەاترىندا ۇلتتىق ونەر ماسەلەسىنە ارنالعان ءباسپاسوز ءماسليحاتىندا ايتىلعان وزەكجاردى وي-پىكىردەن ءۇزىندى.
