Ramazan STAMǴAZY, Qazaqstannyń eńbek sińirgen qaıratkeri, T.Júrgenov atyndaǵy Qazaq ulttyq óner akademııasy «Dástúrli mýzykalyq óner» kafedrasynyń meńgerýshisi, ánshi, ustaz:
- Ótken ǵasyrda qurylǵan úlken óner birlestikteri, ortalyqtar, kitaphanalar jabyldy. Bul bizdiń janymyzdy jeıtin nárse. Óıtkeni, Eldiń bári Almatydan Astanaǵa kóship ketken joq. Almatyda negizin qalaǵan adamdardyń tuǵyrlyq dúnıesin keıingi urpaqqa jetkizetin sanaly urpaq otyr. 62 tamyrynda ónerdiń ulttyq rýhy jaıylǵan jastarymyz bar. Óner akademııasynda, konserýatorııada bálenbaı bala oqıdy. Endigi aýyz salý –solardy qysqartý, qazirgi memlekettiń maqsaty. Olardy qysqartsa ǵasyrdan kele jatqan jyr, terme, dastan, halyq jáne halyq kompozıtorlarynyń ánderin kim aıtady? Oshaǵymyzdyń ulttyq alaýyn óshirgennen ne paıda? Qazir halyq «senderden keıin kim bar?» – dep suraıdy. Nege joq? Bar. Biraq, olardyń shyǵatyn, kórinetin jeri joq. Al olardyń bizge keregi joq desek, erteń qazaq kim bolady? Olardyń tamyryna balta shapsaq erteń kim bolamyz? Qazirgi jastar jaı jastar emes, oryndaýshylyq mádenıetimen qosa ǵylymı izdenisi jasaıtyn jastarymyz bar.
Memlekettik tapsyrys boıynsha barlyq deńgeıden ótip joǵary oqýdy tolyq aıaqtaǵansha ónerpazdarymyz 30-35 jasqa keledi. Al konerttik, óner birlestikteri adam qabyldaǵanda «18-20 jas aralyǵyndaǵy jastar qabyldanady» degen shart qoıady. Sonda sonsha jyl oqý oqyp, eńbek etip, ǵylymmen aınalysqan, úlken óner adamdarynyń tálim-tárbıesin alǵan, ustazdarynyń muralaryn jınaǵan adamdar qaıda barý kerek? Olar ógeıden týyp pa edi? Nege olar qaıyr tilep bazarǵa ketý kerek? Mamandyǵyn aýystyrý kerek pa? Qazaqtyń qasterli, kúmis kómeı aq dombyrasyn ilip qoıyp nege basqa mamandyqqa ketý kerek? Bizdiń memleket nege soǵan qaramaıdy? Mádenıet mınıstrligi qaıda qaraıdy? Bizdiń qazirgi mádenıetimiz estrada, djaz, rok, sımfonııa emes qoı. Biz qazaq bolý úshin ózimizdiń ulttyq dúnıemiz kerek...
Jazyp alǵan Jarqyn SÁLENULY
20-sáýir kúni "Adyrna" ulttyq-etnografııalyq birlestigi" qoǵamdyq qorynyń uıymdastyrýymen Almatydaǵy Ǵ.Músirepov atyndaǵy balalar men jasósipirmder teatrynda ulttyq óner máselesine arnalǵan baspasóz máslıhatynda aıtylǵan ózekjardy oı-pikirden úzindi.
