كۋنستكامەرا قازاقستاننىڭ باتىرى كەيكىنىڭ باس سۇيەگىن قايتارۋعا ءازىر، دەپ حابارلادى "راديو بالتيكا" راديوسى رعا ۇلى پەتر اتىنداعى انتروپولوگيا جانە ەتنوگرافيا مۋزەيى ديرەكتورىنىڭ ورىنباسارى ەفيم رەزۆانعا سىلتەمە جاساي وتىرىپ.
ونىڭ ايتۋىنشا، رەسەيدىڭ فەدەرالدىق تىزىمىندەگى جادىگەردى فەدەرالدىق زاڭعا سايكەس نەمەسە رەسەي پرەزيدەنتىنىڭ جارلىعىمەن قايتارىلۋى ىقتيمال. مۇراجاي باسشىلىعى پەەتربورداعى قازاقستان كونسۋلىنا نىساندى قايتارۋ ءۇشىن نە ىستەۋ كەرەكتىگىن ايتىپ بەرگەن.
«كەيكى باتىردىڭ باس سۇيەگى بىزدە. ونى ءبىز جاسىرعان ەمەسپىز. ول قوردا ساقتاۋلى، ەشقاشان كوپشىلىك نازارىنا ۇسىنىلماعان. ەگەر دە وسىنداي جارلىق شىقسا، ونى بەرمەۋگە باسقالاي كەدەرگى جوق»، - دەپ ءتۇسىندىردى رەزۆان.
مۇراجاي باسشىسىنىڭ ورىنباسارى كۋنستكامەرادا كەنەسارىنىڭ باسى ساقتالماعاندىعىن جەتكىزدى. باس سۇيەكتىڭ قايدا ەكەندىگى ازىرگە بەلگىسىز، دەپ مالىمدەدى مۋزەيدەگىلەر.
«بىزگە قازاقستاننىڭ مادەنيەت ءمينيسترى كەلگەن، وعان بارلىق قوردى كورسەتتىك. سونداي-اق قازاقستاننان كەلگەن ارىپتەستەر مۋزەيگە كەلىپ تۇسەتىن جادىگەرلەردى تىركەيتىن قۇجاتتاردى قاراپ شىقتى. ءارى ولار كەنەسارىنىڭ باس سۇيەگى بىزدە بولماعانىنا كوز جەتكىزدى»، - دەدى رەزۆان.
كەيكى باتىر 1923 جىلى ساۋىردە ولتىرىلگەن، ۇلت-ازاتتىق كوتەرىلىس باسشىسىنىڭ باس سۇيەگى رەسەيگە جىبەرىلگەن. قازاقتىڭ كەنەسارى حانى 1847 جىلى قازا تاپقان. ونىڭ باسىن رەسەيگە الىپ كەتكەن، الايدا ول ءالى تابىلماعان.
ەسكە سالا كەتسەك، كەشە قازاقستان پرەمەر-ءمينيسترى كارىم ءماسىموۆ رف پرەمەر-ءمينيسترى دميتري مەدۆەدەۆپەن كەزدەسۋىندە وسىنداي ماسەلە كوتەرگەن بولاتىن.
«ۇلت ازاتتىق كوتەرىلىس جەتەكشىلەرىنىڭ ءبىرى بولعان كەيكى باتىردىڭ رعا ۇلى پەتر اتىنداعى انتروپولوگيا جانە ەتنوگرافيا مۇراجايىنداعى باس سۇيەگى تۋرالى ماسەلەنىڭ انىق-قانىعىن ءبىلىپ بەرۋگە تاپسىرما بەرسەڭىز. ونىڭ سۇيەگىن قازاقستان توپىراعىندا جەرلەۋ ءۇشىن قايتارىپ بەرۋ ماسەلەسىنىڭ شەشەمىن تابۋ مۇمكىندىگىن قاراستىرساق»، - دەدى ك.ءماسىموۆ.
ول بۇل ماسەلە قازاقتار ءۇشىن وتە ماڭىزدى ەكەنىن ايتتى.
سونىمەن قاتار، قازاقستاندىق تاراپ تاعى ءبىر ۇلت ازاتتىق كوتەرىلىس جەتەكشىسى كەنەسارى حاننىڭ باس سۇيەگىن وتانىنا قايتارۋ ماسەلەسىن كوتەردى.
رەسەي پرەمەرى بۇل سۇراقتى رەتتەۋگە اتسالىساتىنىن ايتىپ، ۋادە بەردى.
«كۇماندانباڭىز، مەن اۋىزشا، كەرەك بولسا، حات جۇزىندە بۇل ماسەلە تۋرالى تاپسىرما بەرەمىن، سوسىن سىزبەن تەلەفون ارقىلى حابارلاسىپ، ورتاق شەشىم قابىلدايمىز»، - دەدى د.مەدۆەدەۆ.
قازاقپارات
