Kýnstkamera Qazaqstannyń batyry Keıkiniń bas súıegin qaıtarýǵa ázir, dep habarlady "Radıo Baltıka" radıosy RǴA Uly Petr atyndaǵy Antropologııa jáne etnografııa mýzeıi dırektorynyń orynbasary Efım Rezvanǵa silteme jasaı otyryp.
Onyń aıtýynsha, Reseıdiń federaldyq tizimindegi jádigerdi federaldyq zańǵa sáıkes nemese Reseı prezıdentiniń jarlyǵymen qaıtarylýy yqtımal. Murajaı basshylyǵy Peetrbordaǵy Qazaqstan konsýlyna nysandy qaıtarý úshin ne isteý kerektigin aıtyp bergen.
«Keıki batyrdyń bas súıegi bizde. Ony biz jasyrǵan emespiz. Ol qorda saqtaýly, eshqashan kópshilik nazaryna usynylmaǵan. Eger de osyndaı jarlyq shyqsa, ony bermeýge basqalaı kedergi joq», - dep túsindirdi Rezvan.
Murajaı basshysynyń orynbasary Kýnstkamerada Kenesarynyń basy saqtalmaǵandyǵyn jetkizdi. Bas súıektiń qaıda ekendigi ázirge belgisiz, dep málimdedi mýzeıdegiler.
«Bizge Qazaqstannyń mádenıet mınıstri kelgen, oǵan barlyq qordy kórsettik. Sondaı-aq Qazaqstannan kelgen áriptester mýzeıge kelip túsetin jádigerlerdi tirkeıtin qujattardy qarap shyqty. Ári olar Kenesarynyń bas súıegi bizde bolmaǵanyna kóz jetkizdi», - dedi Rezvan.
Keıki batyr 1923 jyly sáýirde óltirilgen, ult-azattyq kóterilis basshysynyń bas súıegi Reseıge jiberilgen. Qazaqtyń Kenesary hany 1847 jyly qaza tapqan. Onyń basyn Reseıge alyp ketken, alaıda ol áli tabylmaǵan.
Eske sala ketsek, keshe Qazaqstan Premer-Mınıstri Kárim Másimov RF Premer-mınıstri Dmıtrıı Medvedevpen kezdesýinde osyndaı másele kótergen bolatyn.
«Ult azattyq kóterilis jetekshileriniń biri bolǵan Keıki batyrdyń RǴA Uly Petr atyndaǵy antropologııa jáne etnografııa murajaıyndaǵy bas súıegi týraly máseleniń anyq-qanyǵyn bilip berýge tapsyrma berseńiz. Onyń súıegin Qazaqstan topyraǵynda jerleý úshin qaıtaryp berý máselesiniń sheshemin tabý múmkindigin qarastyrsaq», - dedi K.Másimov.
Ol bul másele qazaqtar úshin óte mańyzdy ekenin aıtty.
Sonymen qatar, qazaqstandyq tarap taǵy bir ult azattyq kóterilis jetekshisi Kenesary hannyń bas súıegin otanyna qaıtarý máselesin kóterdi.
Reseı premeri bul suraqty retteýge atsalysatynyn aıtyp, ýáde berdi.
«Kúmándanbańyz, men aýyzsha, kerek bolsa, hat júzinde bul másele týraly tapsyrma beremin, sosyn sizben telefon arqyly habarlasyp, ortaq sheshim qabyldaımyz», - dedi D.Medvedev.
QazAqparat
