ارمان سەرىكۇلى. قازىرشە ماعان سول عانا مەدەت

2670
Adyrna.kz Telegram

امانحان ءالىمۇلى  اعا، ءسىزدى ورتامىزدان كەتتى دەگەنگە سەنە الار ەمەسپىن. مىنا قارا ىندەتتىڭ كەسىرىنەن ءبىر ۋىس توپىراق سالا الماي، قوشتاسۋعا بارا الماي كوكىرەگىمىز قارس ايرىلىپ، قۇسالى كۇي كەشكەن جايىمىز بار. كەشىرشى ءبىزدى اعاتاي...

رۋحىڭىز مىقتى، جۇرەگىڭىز ءداتتى ەدى عوي. بالاشا الىپ-ۇشىپ تۇرار مىنەزىڭىز ءسىزدىڭ اپپاق جۇرەگىڭىزدەن، پەرىشتەدەي كوڭىلىڭىزدەن حابار بەرەتىن... ءسىزدى ولمەستەي، بۇل جالعاننان كەتپەستەي كورۋشى ەدىك.

راس، كەيىنگى كەزدەرى كوڭىلىڭىزدىڭ تۇبىندە الدەبىر مۇڭ، شەر بارى سەزىلۋشى ەدى. ءجيى كۇرسىنەتىندەيسىز.
بىلتىر بەيبىت نالىباەۆ (Beybit Nalibaev) بالاڭىزدىڭ مۇرىندىق بولۋىمەن ادىرنا بىرلەستىگى ۇيىمداستىرىپ، الماتىداعى مۇقاعالي اتىنداعى مەكتەپتە سىزبەن كەرەمەتتەي كەزدەسۋ ءوتىپ ەدى. بالاشا قۋانىپ ەدىڭىز سوندا. سوڭىندا ءسىزدى كولىكپەن جەتكىزىپ تاستاعاندا دا جانىڭىزدا الدەقانداي جايسىزدىق بارىن اڭعارتىپ قالعانداي بولدىڭىز. اقىن جانى تىم نازىك قوي، مانساپ پەن بايلىق قۋىپ، اق پەن قارانى شاتاستىرىپ العان، كوزدەرى شەل باسقان قوعامدا جان سىرىڭىزدى كىمگە ايتارىن بىلمەي اh ۇردىڭىز با ەكەن؟ وزەگىڭىزدى قارىعان وكسىكتى وت جالىنداي كۇيىك بويىڭىزدى تۇتاس شارپىپ، جانىڭىزدى دا جايلاپ بولعان ەكەن-اۋ😢.
سىزبەن تانىستىعىم قازىبەك يسا اعانىڭ "جاس قازاق ءۇنى" گازەتىندە جۇمىس ىستەگەن ستۋدەنتتىك شاعىمدا باستالىپ ەدى. سۇحباتقا باراردان بۇرىن اقىن-جازۋشىلاردىڭ ەڭبەكتەرىمەن تانىسۋىمىز قاجەت. ءسىز اي ءسوزىن، ايعا قاتىستى ۇعىمدار مەن تىركەستەردى ءجيى قولدانۋشى ەدىڭىز عوي. "اي نۇرى الاقانىمدا" اتتى كىتابىڭىزدا اي ءسوزى 117 رەت كەزدەسەتىنى تۋرالى ءبىر سۇراعىم ءسىزدىڭ كوڭىلىڭىزدى كوككە كوتەرىپ ەدى. سول ءبىر كەزدەن باستاپ امانحان اعا، ءسىز ەكەۋمىزدىڭ ارامىزدا سونداي ءبىر رۋحاني بايلانىس ورناپ ەدى. ول كەزدە "زاڭ" گازەتىندە قىزمەت ەتەسىز. ارا-تۇرا شاحمات ويناپ تۇراتىنبىز.

مەنى "زاڭ" گازەتىندەگى جاڭا باسشىلىققا تانىستىرىپ، جاۋاپتى حاتشى، ءتىپتى باس رەداكتوردىڭ ورىنباسارى ەتىپ قويماق بولعان اق نيەتىڭىزدىڭ ءوزى نەگە تۇرادى؟ ونداعىلار ءسىزدىڭ ۇسىنىسپەن كەلىسىپ مەنى اتاۋلى قىزمەتكە شاقىرعاندا قيقارلىعىما باسىپ "قالىپتاسقان وقىرماندارىمدى قيماي" بۇرىنعى جۇمىستا قالىپ قويعانىم كەيىن وكىنىشكە ۇلاسارىن كىم بىلگەن... ول كەزدە اۋىزدىقپەن الىسقان اساۋداي ەدىم عوي. كەيىن جالاقىسى قارىن تويدىرماسا دا، وقىرماندار لەبىزى كوڭىل تويدىرىپ جۇرگەن باسىلىم باسشىلىعىنان ادىلەتسىزدىك كورىپ، قۋعىندالا باستاعانىمدا، باسقا-باسقا ەمەس، ءدال ءسىزدىڭ تاعى دا اراشا ءتۇسىپ باس ديرەكتورعا حابارلاسقانىڭىز - ۇلكەن ازاماتتىعىڭىز ەكەن عوي. قۋ تىرشىلىكپەن ءجۇرىپ سول جاقسىلىقتارىڭىزدى دا ۇمىتىپ كەتكەنىم بە، اعاتاي😢. ودان بەرى قانشاما جىلدار ءوتتى، جىلعالاردان قانشاما سۋ اقتى. ال ءسىز سول باياعىشا ءوزىڭىز ءۇشىن ەمەس، وزگەلەر ءۇشىن كۇرەسكەن، اڭقىلداعان اق پەيىلىڭىزدەن ءبىر دە اينىپ كورگەن جوقسىز. بىراق سونى ءتۇسىنىپ، ءسىزدى قادىرلەپ ايالالاي المادىق. وزەككە وكىنىش كەپتەلەدى. ارپالىس، الىس-جۇلىس، قىم-قۋىت تىرشىلىكتە قاراپايىم عانا اقىننىڭ جان الەمىنە ۇڭىلگەن كىم بار؟

جاستارعا قامقور، ءبىر ادامدى بولسا دا كوڭىلىن كوتەرۋگە تىرىساتىن دالاداي كەڭ جۇرەكتى سىزدەي اعاتايىمدى قايدان عانا تابارمىز؟😢.

جۇرەكتەگى تەبىرەنىستى، كوز جاسىمدى، ءبىر كۇننىڭ ىشىندە كوڭىلىمدە ورناعان سىزگە دەگەن ساعىنىشىمدى رۋحىڭىز سەزەتىن شىعارسىز. قازىرشە ماعان سول عانا مەدەت...

پىكىرلەر