اجارلىم ماعزۇم: ونەر جولى - ءوزىڭدى ۇنەمى دالەلدەۋدى تالاپ ەتەدى

5667
Adyrna.kz Telegram

م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ اكتريساسى اجارلىم ماعزۋممەن سۇحبات

- تانىمال بولۋ ادامدى قانشالىقتى وزگەرتەدى؟

- تانىمالدىلىق ءار كىمگە ءار ءتۇرلى اسەر ەتەدى. ءوز باسىم تانىمال بولىپ، بويىمنان كەرەمەتتەي وزگەرىستەردى بايقاعان ەمەسپىن، سەبەبى ءوزىمدى تانىمال اكتريسامىن دەي المايمىن. بىراق، كوپ جاعدايدا تانىمال ادامدار وتە قاراپايىم بولىپ كەلەدى. ارينە جۇلدىز اۋرۋى دەپ جاتامىز. مەنىڭشە، ونەر ادامى بۇل ۋاقىتتان دا ءوتۋى كەرەك سەكىلدى. تانىمالدىلىق ادامدى ءوزىن-ءوزى قامشىلاپ تاربيەلەۋگە، حالىق الدىنداعى بەدەلىنىڭ قالىپتاسۋىنا دا سەپتىگىن تيگىزەدى. پەندە بولعاسىن ءار ادامنىڭ ءوز شىندىعى بولادى، ەشكىم ءوزىن پەرىشتەمىن دەي المايدى. الايدا قانشا تانىمال بولساڭ دا،قاراپايىم قالپىڭدا قالۋىڭ كەرەك. بۇل سەنىڭ ادام بوپ قالىپتاسۋىڭنىڭ بەلگىسى.

- ساحنادا نە نارسەدەن قورقاسىز؟

- كىشكەنتاي كەزىمدە ءتۇرلى قىزىقتار باستان وتكەن ( كۇلىدى).ەڭ العاش ساحناعا شىققان كەزىم ەسىمە ءتۇسىپ وتىر. مەن ول كەزدە بارىنشا دايىندالعان بولاتىنمىن،بىراق ساحناعا شىققاندا قاتتى قوبالجىدىم.ول كەزدە ساحنادا تۇرعان ءوزىم ەمەس، باسقا ءبىر ادام مەن ءۇشىن ساحنادا جۇرگەندەي سەزىلدى. ءتىپتى  قاتتى ۋايىمداعاننان مۇرنىمنان قان كەتكەن بولاتىن. ەسسىز ويناپ شىققان كەزىم دەسە دە بولادى، نە ايتقانىمدى دا بىلمەيمىن. سونداي قىزىقتار دا باسىمنان وتكەن.

-   ونەر ادامى جەكە ومىرىنە قانشالىقتى كوڭىل بولەدى؟

- ونەر جولى كەز- كەلگەن ادامنىڭ ۋىسىنا تۇسە بەرمەيدى. بۇل ماماندىققا كەلگەن ادام رۋحاني ماحابباتتى تولىقتاي سەزىنە المايدى. باسقا ماماندىقتان ەرەشەلىگى دە سوندا. جالپاق تىلمەن ايتقاندا ونەر جولىن تاڭداعان ادام وسى جولدىڭ ارتىنان كەتەدى. سول ءۇشىن دە ونەر  ادامى جەكە ومىرىنە تولىقتاي ۋاقىت بولە المايدى. ارينە، ونەر جولى ءبىر توبە دەسەك تە جەكە ءومىردى ىسىرىپ تاستاۋعا دا بولمايدى. ونەر جولى-ۇلى جول، بۇل ماماندىققا جۇرەگىندە تۇگى بار جاندار كەلەدى.

- وزىڭىزگە ۇناماعان ءرولدى سومداعان كەزىڭىز بولدى ما؟

- مەن سىرت كوزگە مومىن، ليريك ادام بولىپ كورىنەمىن. بىراق ءوزىمنىڭ ىشكى حاراكتەرى بار اداممىن. كەيدە تابيعاتىڭا جات ءرولدى سومداۋعا تۋرا كەلەتىن كەزدەر بولادى. بىراق، اكتريسا رەتىندە  كەز-كەلگەن ءرولدى جانىممەن قابىلداپ، بارىنشا ءساتتى شىعۋىنا جاعداي جاسايمىن. سومداعان ءرولىمنىڭ بارلىعى كوڭىلىمنەن شىعادى.

- كورەرمەننىڭ قازىرگى تالابى قانداي، سىن قابىلداي الاسىز با؟

- سىن ايتىلعان جەردە ناتيجە بار. تەاترىمىزعا ەڭبەگى سىڭگەن اكتريسالار، قويىلىمنان كەيىن ءوز اقىلىن ايتىپ جاتادى. بۇل مەنى قۋانتادى. كەيدە، جۇمىسىما سىن ايتىلماسا رەنجيمىن. كوپ جاعدايدا قاتەلىكتى ءوز بويىمنان ءوزىم ىزدەيتىن اداممىن. ارينە، سىن ايتىلعان جاقسى.

قازىرگى كورەرمەننىڭ تالابى وتە جوعارى. كورەرمەن قويىلىمدى الدىن الا تالعاپ، تالداپ كەلەدى. سپەكتاكلدەن كەيىن كورەرمەندەر ءبىزدىڭ الەۋمەتتىك جەلىگە ءوز پىكىرى مەن لەبىزدەرىن جازىپ جاتادى. سولاردى وقىپ وتىرساڭ، تۋرا ءبىر سىنشى دەرسىڭ. قازىرگى كورەرمەندەردىڭ تالابى دا تالعامى دا جوعارى، ءبىز دە سوعان لايىق جۇمىس جاساۋعا تىرىسامىز.

- تەاترعا قانشالىقتى كوڭىلىڭىز تولادى، ءبىزدىڭ تەاترعا نە جەتىسپەيدى؟

- تەاتر ءسوز ونەرى. اعا بۋىننىڭ تەاترداعى ەڭدەكتەرىن بەينە تاسپادان ءجيى كورىپ تۇرامىز. ول كىسىلەر ناعىز ونەردىڭ سارا جولىن قالىپتاستىرعان تۇلعالار. بىراق، ۋاقىت وتە كەلە ءار زاماننىڭ ءوز تالابى قالىپتاسادى. سول سەكىلدى دە تەاتر جولدان-جىلعا تولىعىپ، تولىسىپ كەلەدى. جاقىندا عانا ورال قالاسىنا ءىس ساپارعا باردىق. مەنىڭ ريزا بولعان سەبەبىم، كورەرمەندەر قويىلىمدى جوعارى دەڭگەيدە قابىل الدى. قازىرگى ۋاقىتتا قازاق تەاترىنىڭ جۇلدىزى جارىق. اكەم تەاترعا تەڭەسىپ كەلەتىن وبلىس تەاترلارىن كورگەندە جۇزىڭە قۋانىش سىيلايدى. بۇل دەگەنىڭ تەاتر ونەرنىڭ قۇندىلىعى بارعان سايىن ارتىپ كەلە جاتقانىن بايقاتادى. كەرىسىنشە قازاق تەاترى ءوز باعىتىن جالعاستىرىپ، قۇندىلىعىن كەڭىنەن جايىپ كەلەدى.

- ساحنادا ءسوزىڭىزدى ۇمىتىپ قالعان كەزىڭىز بولدى ما، ونداي سيتۋاتسيادان قالاي شىعاسىز؟

 -كەيدە بويىڭا سىڭگەن ءسوزىڭدى ءبىر مەزەتتە ۇمىتىپ قالاتىن كەزدەر بولادى. بۇنداي جاعدايدا پارتنەرىڭ كومەكتەسەدى. سەنىڭ كوزىڭە قاراپ، ايتەۋىر بىردەڭەنى ويلاپ تابادى. سوزگە تارتىپ، ارى قاراي ويناتىپ الا كەتەدى.ءتىپتى، ەشقانداي شيكىلىك بايقالمايدى. وسى تۇرعىدا ءوز پارتنەرلەرىمە راقمەت ايتقىم كەلەدى.

- قازاق كورۋى كەرەك ءۇش سپەكتاكل!

- ءار قازاق كورۋى كەرەك سپەكتاكل: "اباي"," قاراكوز", "توميريس". كەيدە كۇيبەڭ تىرشىلىكتىڭ ورتاسىندا ءجۇرىپ، كىتاپ وقۋعا ۋاقىت تابا بەرمەيمىز. مەن كورەرمەندەردى وسى ءۇش سپەكتاكلدى  كورۋگە شاقىرامىن. بۇل ناعىز قازاقى ءيىس اڭقىعان تۋىندىلار. بارلىق ادامعا رۋحاني بايلىق سىيلايتىنى ءسوزسىز.

-  قىز بالاسىنا ونەر جولى اۋىر دەپ جاتادى، قانشالىقتى راس؟

- ونەر جولىندا ءجۇرۋ وڭاي ەمەس. ونەر جولى باسقالارعا ءوزىڭدى ۇنەمى دالەلدەۋدى تالاپ ەتەدى. بۇل ماماندىقتا ارتقا قاراي شەگىنۋ جوق. بايگەگە قوسقان جۇيرىك اتتاي ۇنەمى قامشىلانىپ تۇرۋىڭ كەرەكسىڭ. ءبىر ۋاقىتتا ءوزىڭدى بوساتىپ جىبەرسەڭ، وندا كوشتەن قالدىڭ دەگەن ءسوز. ارتىمىزدا وكشەمىزدى باسىپ كەلە جاتقان جاس بۋىندار جەتەرلىك. ءوز ۋاقىتىم كەلگەنشە، ەشتەڭەنى جوعالتپاي بابىمدا جۇرۋگە ءتيىسپىن. ۇنەمى ءوزىڭدى دالەلدەۋمەن وتەسىڭ.

- سۇحباتىڭىز راقمەت. شىعارماشىلىق شابىت تىلەيمىن!

 

سۇحباتتاسقان الگوجاەۆا ميا

( ت.جۇرگەنوۆ ات. قازۇوا، ءى كۋرس، كينوتەلەدراماتۋرگ)

 

 

 

 

پىكىرلەر