توتەنشە جاعداي كەزىندەگى الەۋمەتتىك تولەمگە ءوتىنىم بەرگەندەردىڭ كوبىسىنىڭ تۇراقتى جۇمىسى بار بولىپ شىقتى
مەملەكەتتىك كوميسسيانىڭ شۇعىل شتابى 42 500 تەڭگە الەۋمەتتىك كومەكتى تاعايىنداۋ بويىنشا ەسەپ بەردى، دەپ حابارلايدى Sputnik قازاقستان.
رەسمي مالىمەتكە سايكەس، توتەنشە جاعداي كەزىندە تابىسىنان ايىرىلعان 3 ميلليوننان استام ادامعا 42 500 تەڭگەنىڭ الەۋمەتتىك تولەمى اۋدارىلدى. قارجىنىڭ جالپى كولەمى – 127 ميلليارد تەڭگە.
حالىقتان بارلىعى 5,9 ميلليون ءوتىنىم تۇسكەن. سونىڭ ىشىندە 2,15 ميلليون، ياعني 37% بويىنشا تولەم تاعايىندالعان جوق.
نەگىزگى سەبەپتەرى:
- 157 مىڭعا جۋىق وتىنىمدە ادامنىڭ جەكە دەرەگى دۇرىس كورسەتىلمەگەن. ءبىر ارىپتە نەمەسە ساندا قاتە كەتسە، الەۋمەتتىك تولەم تاعايىندالمايدى;
- 80 مىڭعا جۋىق وتىنىمدە بانك دەرەكتەرى دۇرىس جازىلماعان. ءوتىنىم بەرگەندە بانك اتاۋى مەن IBAN-دى (شوتتىڭ 20 بەلگىدەن تۇراتىن ءنومىرى) كورسەتۋ قاجەت. كوبىسى بانك كارتاسىنىڭ ءنومىرىن جىبەرە سالعان;
- ءوتىنىم بەرۋشىنىڭ تۇراقتى جۇمىسى بار بولىپ شىققان. ولاردىڭ ىشىندە مەملەكەتتىك قىزمەتكەرلەر جانە بيۋدجەتتىك ۇيىمداردىڭ قىزمەتكەرلەرى دە بار;
- 863 مىڭعا جۋىق ءوتىنىمدى زەينەتاقى جانە جاردەماقى الۋشىلار جىبەرگەن. ولار توتەنشە جاعدايعا دەيىن رەسمي جۇمىس ىستەمەگەن;
- 1,16 ميلليون ءوتىنىم بويىشا سوڭعى 12 ايدا ەشقانداي الەۋمەتتىك اۋدارىم جاسالماعان، ءبىر رەت بولسا دا، بىرىڭعاي جيىنتىق تولەم اۋدارماعان. وندايدا 42 500 تەڭگە بەرىلمەيدى;
- 534-كە جۋىق ءوتىنىم قايتىس بولعان ادامداردىڭ اتىنان نەمەسە قازاقستاننان تىس جەردە تۇراتىنداردىڭ اتىنان جىبەرىلگەن.
