16 ناۋرىزدا ەل اۋماعىندا توتەنشە جاعداي جاريالانىپ، بىرقاتار قۇرىلىمدار كۇشەيتىلگەن رەجيمدە جۇمىس ىستەۋگە كوشكەنى بەلگىلى. وسىعان وراي، سوڭعى ءبىر ايدان بەرى تۇرعىنداردىڭ قاۋىپسىزدىگى مەن دەنساۋلىعىن ساقتاۋ جولىندا ەڭبەكتەنىپ جۇرگەن شىمكەنتتىك باتىرلار تۋرالى بايانداۋدى ءجون ساناپ وتىرمىز.
بۇگىن شىمكەنت قالالىق پوليتسيا دەپارتامەنتى پاترۋلدىك پوليتسيا پولكى 8-روتاسىنىڭ اعا ينسپەكتورى قازىبەك قۇتتىباەۆ تۋرالى باياندايتىن بولامىز.
1992 جىلى دۇنيەگە كەلگەن ق.جاڭابايۇلى 2015 جىلدان ىشكى ىستەر ورگاندارى جۇيەسىندە ەڭبەك ەتەدى. اعا ينسپەكتور كۇندەلىكتى ساعات 07.00 مەن 17.00 ارالىعىندا قالاداعى N.Nazarbaev داڭعىلى مەن س.بايتەرەكوۆ كوشەسى قيىلىسىندا كولىك قوزعالىسىن رەتتەپ، باقىلاۋ-تەكسەرۋ جۇمىستارىن جۇرگىزەدى.
– مەملەكەت باسشىسىنىڭ جارلىعىمەن قازاقستان اۋماعىنا توتەنشە جاعداي جاريالانىپ، كارانتين ەنگىزىلگەن تۇستا وسالدىق تانىتقانىمىز بىزگە سىن. ءبىز ەلگە قىزمەت ەتۋ ءۇشىن انت قابىلدادىق. ال بەرىلگەن انتتىڭ ۇدەسىنەن شىعۋ – بارشامىزعا ورتاق مىندەت، - دەيدى پوليتسيا لەيتەنانتى.
كارانتين جاريالانعالى وتباسىنداعى ۇل-قىزىن سيرەك كورەتىنىن جەتكىزگەن اعا ينسپەكتور:
– بۇل – ۋاقىتشا قيىندىق. ءبىز بىرلەسسەك، بار قيىندىقتى جەڭىپ شىعامىز. سوندىقتان قالا تۇرعىندارىنان كارانتين تالاپتارىن ساقتاپ، ۇيلەرىندە وتىرۋىن سۇرايمىن، - دەيدى قازىبەك قۇتتىباەۆ.
شىمكەنت
