8 قىركۇيەكتە مەملەكەت باسشىسى قاسىم-جومارت توقاەۆ قازاقستان حالقىنا جىل سايىنعى ءداستۇرلى جولداۋىن جاريالادى. ەل دامۋىنىڭ جاڭا كەزەڭىن ايقىندايتىن ماڭىزدى قۇجاتتا ءبىلىم، عىلىم، تەحنولوگيا، ەكونوميكا سىندى باسىم باعىتتار كەڭىنەن قامتىلدى. جولداۋدى تىڭداۋعا ەلىمىزدىڭ ءار وڭىرىنەن ءتۇرلى سالا ماماندارى ارنايى شاقىرىلدى. سولاردىڭ ءبىرى – شىمكەنت قالاسىنىڭ تۇرعىنى، پەداگوگ ماماندىعىنىڭ يەسى مارات تاڭسىقباەۆ.
العاش رەت پرەزيدەنت جولداۋىنا قاتىسقان ۇستاز ءوز اسەرىمەن ءبولىسىپ، بۇل باسقوسۋ ونىڭ كاسىبي بولاشاعىنا تىڭ سەرپىن بەرگەنىن ايتتى.
— مەن ءۇشىن ەڭ اسەرلىسى — ءبىلىم سالاسىنا جانە جاڭا تەحنولوگيالارعا، ونىڭ ىشىندە جاساندى ينتەللەكتكە بەرىلگەن ەرەكشە نازار بولدى. پرەزيدەنت بۇل سالانىڭ ەل ەكونوميكاسى ءۇشىن ماڭىزدى قوزعاۋشى كۇش ەكەنىن اتاپ ءوتىپ، جاساندى ينتەللەكتتى وقۋ پروتسەسىنە ەنگىزۋ قاجەتتىگىن باسا ايتتى. سونىمەن قاتار، مۇعالىمدەردىڭ دە وسى باعىتتا بىلىكتىلىگىن ارتتىرۋى كەرەك ەكەنىن جەتكىزدى. بۇل سوزدەر مەنى جىگەرلەندىردى، ويتكەنى جاساندى ينتەللەكت تەك تەحنيكالىق سالا ماماندارىنا عانا ەمەس، ءبىز – پەداگوگتار ءۇشىن دە ءتيىمدى قۇرال بولا الادى، – دەدى مارات تاڭسىقباەۆ.
ونىڭ پىكىرىنشە، جولداۋدا كوتەرىلگەن ماسەلەلەر اسىرەسە ءبىلىم بەرۋ ساپاسىن ارتتىرۋعا باعىتتالعان. جاساندى ينتەللەكت كومەگىمەن وقۋ باعدارلامالارىن جاڭعىرتۋ، وقۋشىلار مەن ستۋدەنتتەردىڭ قابىلەتىن اشۋ جولدارىن جەتىلدىرۋ – قازىرگى زامان تالابىنا ساي باستامالار.
پەداگوگتىڭ ايتۋىنشا، جاساندى ينتەللەكت ارقىلى وقۋ پروتسەسىن جەكەلەپ جۇرگىزۋ، ءار وقۋشىنىڭ جەكە قابىلەتىن ەسكەرە وتىرىپ ءبىلىم بەرۋ – مۇعالىمدەر ءۇشىن ءتيىمدى قۇرال ءارى ۇلكەن كومەكشى.
— پرەزيدەنتتىڭ بۇگىنگى جولداۋى بارشا ۇستازدار ءۇشىن ۇلكەن موتيۆاتسيا بولدى دەپ ەسەپتەيمىن. ەل بولاشاعى – ءبىلىمدى جاستار مەن بىلىكتى مامانداردىڭ قولىندا ەكەنىن تاعى ءبىر مارتە ءتۇسىندىم. مەن دە ءوز تاراپىمنان جاساندى ينتەللەكتتى قولدانا وتىرىپ، وقىتۋ ادىستەرىمدى جاڭارتۋعا بار كۇشىمدى سالامىن، – دەدى ول.
ايتا كەتەيىك، مەملەكەت باسشىسى جولداۋدا ءبىلىم جانە عىلىم سالاسىنا ەرەكشە باسىمدىق بەرىپ، جاساندى ينتەللەكت پەن جاڭا تەحنولوگيالاردى ەنگىزۋ ارقىلى زاماناۋي ءارى ساپالى ءبىلىم بەرۋ جۇيەسىن قالىپتاستىرۋ قاجەتتىگىن اتاپ ءوتتى. بۇل باعىتتاعى ناقتى تاپسىرمالار الداعى ۋاقىتتا ىسكە اسىرىلۋى ءتيىس.
