شىمكەنت قالاسىندا كوپقاباتتى تۇرعىن ۇيلەردىڭ تەحنيكالىق جاعدايىن جاقسارتۋ، ينجەنەرلىك ينفراقۇرىلىمدى جاڭعىرتۋ جانە تۇرعىنداردىڭ قاۋىپسىزدىگىن قامتاماسىز ەتۋ باعىتىنداعى جۇمىستار كەزەڭ-كەزەڭىمەن جۇزەگە اسىرىلۋدا. بيىل تۇرعىن ءۇي قورىن كۇردەلى جوندەۋدەن وتكىزۋگە جانە ورتاق پايدالانىلاتىن نىسانداردى جاڭارتۋعا باسىمدىق بەرىلگەن.
2026 جىلى قالاداعى 31 تۇرعىن ءۇيدى كۇردەلى جوندەۋدەن وتكىزۋگە 2,7 ملرد تەڭگە ءبولىندى. قازىرگى ۋاقىتتا ونىڭ 23-ىندە قۇرىلىس جۇمىستارى تولىق اياقتالعان. قالعان نىساندارداعى جوندەۋ جۇمىستارىن جىل سوڭىنا دەيىن اياقتاۋ جوسپارلانىپ وتىر.
الداعى جىلعا ارنالعان دايىندىق جۇمىستارى دا باستالعان. 2027 جىلى 28 تۇرعىن ۇيدەگى 41 ءليفتىنى اۋىستىرۋ جانە 31 كوپقاباتتى ۇيگە كۇردەلى جوندەۋ جۇرگىزۋ ءۇشىن جوبالىق-سمەتالىق قۇجاتتاما ازىرلەۋ كوزدەلگەن. سونىمەن قاتار جۇمىس ىستەيتىن جاستار باعدارلاماسى بويىنشا بوساتىلعان 639 پاتەردى جوندەۋگە بيۋدجەتتىك ءوتىنىم ۇسىنىلۋدا.
قالا كەلبەتىن جاقسارتۋ ماقساتىندا كوپقاباتتى تۇرعىن ۇيلەردىڭ قاسبەتتەرىن جاڭارتۋ ماسەلەسى دە قولعا الىنعان. وسى باعىتتا بىرىڭعاي ساۋلەتتىك كەلبەت تۇجىرىمداماسى ازىرلەنىپ، ءتيىستى جۇمىستاردى 2027 جىلى باستاۋ جوسپارلانىپ وتىر. بۇل باستاما تۇرعىن ۇيلەردىڭ سىرتقى كورىنىسىن بىرىزدەندىرىپ، قالالىق ورتانىڭ ەستەتيكالىق ساپاسىن ارتتىرۋعا باعىتتالعان.
تۇرعىن ءۇي قورىن ءتيىمدى باسقارۋ دا ماڭىزدى باعىتتاردىڭ ءبىرى. قازىرگى تاڭدا شىمكەنتتە 2 595 كوپقاباتتى تۇرعىن ءۇي تىركەلگەن. ونىڭ ىشىندە 139 ۇيدە مۇلىك يەلەرى بىرلەستىگى جۇمىس ىستەيدى. ال 1 247 تۇرعىن ۇيدە تىكەلەي بىرلەسىپ باسقارۋ ءتاسىلى تاڭدالىپ، باسقارۋشى كومپانيالارمەن كەلىسىمشارت جاسالعان. مۇنداي باسقارۋ تەتىكتەرى تۇرعىنداردىڭ ورتاق مۇلكىن كۇتىپ ۇستاۋ جانە ءۇيدى پايدالانۋ ماسەلەلەرىن جۇيەلى ۇيىمداستىرۋعا مۇمكىندىك بەرەدى.
كوپقاباتتى ۇيلەردىڭ تەحنيكالىق قاۋىپسىزدىگىنە دە ەرەكشە كوڭىل بولىنۋدە. قالادا بۇگىندە 1 748 ليفت، 218 ەسكالاتور جانە 14 تراۆولاتور پايدالانىلىپ كەلەدى. ولاردىڭ قاۋىپسىز ءارى تالاپقا ساي جۇمىس ىستەۋى تۇراقتى باقىلاۋدا. تۇرعىنداردىڭ وتىنىشتەرى نەگىزىندە باسقارۋشى ۇيىمداردىڭ قىزمەتىنە دە تەكسەرۋلەر جۇرگىزىلىپ، انىقتالعان ماسەلەلەر بويىنشا ءتيىستى شارالار قابىلدانۋدا.
ينجەنەرلىك قاۋىپسىزدىكتىڭ ماڭىزدى بولىگى سانالاتىن گاز جابدىقتارىن پايدالانۋ ماسەلەسى دە نازاردان تىس قالعان جوق. جىل باسىنان بەرى «شىمكەنت قالالىق گاز تەحنيكالىق قىزمەتى» مەكەمەسىنىڭ ماماندارى 158 077 ءۇيدى ارالاپ، تۇرعىندارعا گاز قۇرىلعىلارىن دۇرىس پايدالانۋ، قاۋىپسىزدىك تالاپتارىن ساقتاۋ جانە جابدىقتاردى ۋاقتىلى تەكسەرۋ جونىندە ءتۇسىندىرۋ جۇمىستارىن جۇرگىزگەن. تەكسەرۋ كەزىندە ادام ومىرىنە قاۋىپ ءتوندىرۋى مۇمكىن اقاۋى بار 134 ابونەنت انىقتالىپ، ءتيىستى قاۋىپسىزدىك شارالارى قابىلداندى. قازىرگى تاڭدا اتالعان نىساندارداعى بارلىق اقاۋلار تولىق جويىلعان.
تۇرعىن ءۇي قورىن جاڭعىرتۋ مەن قاۋىپسىزدىكتى قامتاماسىز ەتۋ جۇمىستارىنىڭ ءوزارا بايلانىسى زور. سەبەبى كوپقاباتتى ۇيلەردىڭ ساپالى جوندەلۋى، ليفتىلەردىڭ جاڭارتىلۋى جانە ينجەنەرلىك جۇيەلەردىڭ تالاپقا ساي جۇمىس ىستەۋى تۇرعىنداردىڭ كۇندەلىكتى ومىرىنە تىكەلەي اسەر ەتەدى.
وسى باعىتتاعى جۇمىستار الداعى ۋاقىتتا دا جالعاسىپ، تۇرعىن ۇيلەردىڭ تەحنيكالىق جاعدايىن جاقسارتۋ، باسقارۋ جۇيەسىن جەتىلدىرۋ جانە قاۋىپسىزدىك تالاپتارىن ساقتاۋ ماسەلەلەرى تۇراقتى باقىلاۋدا بولادى.
