شىمكەنت قالاسىندا قازاقستان حالىق كەڭەسىنىڭ وڭىرلىك مۇشەلەرى مەن قالالىق ەتنومادەني بىرلەستىكتەر وكىلدەرىنىڭ قاتىسۋىمەن كەزدەسۋ ءوتتى.
ءىس-شاراعا قالا اكىمىنىڭ ورىنباسارى سارسەن قۇرانبەك، قازاقستان حالىق كەڭەسىنىڭ مۇشەلەرى، ەتنومادەني بىرلەستىكتەردىڭ جەتەكشىلەرى مەن ەتنوس بەلسەندىلەرى، سونداي-اق «قوعامدىق كەلىسىم» مەكەمەسى جانىنداعى قوعامدىق قۇرىلىمداردىڭ باسشىلارى قاتىستى.
كەزدەسۋدىڭ نەگىزگى ماقساتى – جاڭا قوعامدىق ينستيتۋتتىڭ قىزمەتى مەن مىندەتتەرىن تالقىلاۋ، قوعامدىق كەلىسىم مەن جالپىۇلتتىق بىرلىكتى نىعايتۋ، مەملەكەت پەن ازاماتتىق قوعام اراسىنداعى بايلانىستى دامىتۋ جانە ءوڭىر تۇرعىندارىن تولعاندىراتىن وزەكتى ماسەلەلەردى ورتاعا سالۋ.
جيىندا ءسوز سويلەگەن قالا اكىمىنىڭ ورىنباسارى سارسەن قۇرانبەك قازاقستان حالىق كەڭەسىنىڭ قۇرىلۋى مەن ونىڭ قوعام ومىرىندەگى رولىنە توقتالدى.
سونىمەن قاتار جاڭا كونستيتۋتسيانىڭ ماڭىزى، مەملەكەت باسشىسىنىڭ قازاقستان حالقىنا جولداۋىندا بەلگىلەنگەن باسىم باعىتتار، كونستيتۋتسيالىق رەفورمالاردىڭ نەگىزگى مىندەتتەرى جانە جالپىۇلتتىق قۇندىلىقتاردىڭ ءمان-مازمۇنى جونىندە كەڭىنەن باياندادى.
اتاپ ايتقاندا، تاۋەلسىزدىك پەن وتانشىلدىق، بىرلىك پەن ىنتىماق، ادىلدىك پەن جاۋاپكەرشىلىك، زاڭ مەن ءتارتىپ، ەڭبەكقورلىق پەن كاسىبي بىلىكتىلىك، جاسامپازدىق پەن جاڭاشىلدىق سەكىلدى قۇندىلىقتاردى قوعام ساناسىنا ءسىڭىرۋدىڭ ماڭىزدىلىعى اتاپ ءوتىلدى.
سونداي-اق «ادال ازامات»، «تازا قازاقستان» باستامالارى مەن جاڭا قوعامدىق ەتيكانى قالىپتاستىرۋ ماسەلەلەرىنە نازار اۋدارىلدى.
كەزدەسۋ بارىسىندا مەملەكەت باسشىسىنىڭ جولداۋىندا ايقىندالعان ەكونوميكالىق دامۋ، ينفراقۇرىلىمدى جاڭعىرتۋ، تسيفرلاندىرۋ، جاساندى ينتەللەكت تەحنولوگيالارىن ەنگىزۋ، شاعىن جانە ورتا بيزنەستى قولداۋ، سونداي-اق «زاڭ مەن ءتارتىپ» قاعيداتىن جۇزەگە اسىرۋ باعىتتارى دا ءسوز بولدى.
بۇدان بولەك، جاقىندا وتكەن «قازاق ءتىلى» قوعامىنىڭ ح مەرەيتويلىق قۇرىلتايىنىڭ ماڭىزى مەن وندا كوتەرىلگەن ماسەلەلەر، مەملەكەتتىك ءتىلدىڭ قولدانىس اياسىن كەڭەيتۋ، ۇلتتىق قۇندىلىقتاردى دارىپتەۋ جانە قوعامدىق سانانى جاڭعىرتۋ باعىتىنداعى باستامالار تالقىلاندى.
ءوز كەزەگىندە قاتىسۋشىلار ەتنوسارالىق تاتۋلىقتى ساقتاۋ، قوعامدىق كەلىسىمدى نىعايتۋ، جاستار باستامالارىن قولداۋ، مەدياتسيا ينستيتۋتىن دامىتۋ، قوعامدىق ديالوگتى كەڭەيتۋ جانە مەملەكەتتىك ورگاندارمەن ءوزارا ىنتىماقتاستىقتى جەتىلدىرۋ جونىندەگى ۇسىنىس-پىكىرلەرىن ورتاعا سالدى.
جيىندا ەتنومادەني بىرلەستىكتەردىڭ قوعامداعى رولىنە دە ەرەكشە ءمان بەرىلدى. ولاردىڭ مادەني مۇرانى ساقتاۋ، ۇلتتىق داستۇرلەردى دارىپتەۋ، وسكەلەڭ ۇرپاق تاربيەسىنە ۇلەس قوسۋ جانە جالپىۇلتتىق بىرلىكتى نىعايتۋ باعىتىنداعى قىزمەتىن ودان ءارى جانداندىرۋ قاجەتتىگى اتاپ ءوتىلدى.
ايتا كەتەيىك، شىمكەنت قالاسىنان ءۇش ازامات قازاقستان حالىق كەڭەسىنىڭ قۇرامىنا ەندى. ولار – قالالىق تۇرىك ەتنومادەني بىرلەستىگىنىڭ توراعاسى لاتيپشا اسانوۆ، جۋرناليست، قالالىق قوعامدىق كەڭەستىڭ مۇشەسى ابدەز يمانقۇلوۆ جانە كوركەم گيمناستيكا شەبەرى، قازاقستان ۇلتتىق گيمناستيكا فەدەراتسياسىنىڭ پرەزيدەنتى ءاليا يۋسۋپوۆا.
كەزدەسۋ اشىق پىكىر الماسۋ فورماتىندا ءوتىپ، قاتىسۋشىلار وزدەرىن تولعاندىرعان ماسەلەلەردى كوتەرىپ، الداعى جۇمىس باعىتتارى بويىنشا ۇسىنىستارىن جەتكىزدى.
جيىن قورىتىندىسىندا قوعامدىق كەلىسىمدى ساقتاۋ، ەتنوسارالىق تاتۋلىقتى نىعايتۋ، ازاماتتىق قوعام ينستيتۋتتارىمەن ءوزارا ءىس-قيمىلدى دامىتۋ جانە ورتاق باستامالاردى جۇزەگە اسىرۋ باعىتىنداعى جۇمىستى جۇيەلى تۇردە جالعاستىرۋ قاجەتتىگى اتاپ ءوتىلدى.
