2026 جىلعى 6 قاراشادا شىمكەنت قالاسىنىڭ كاسىپكەرلەر پالاتاسىندا ساۋدا سالاسىنىڭ وكىلدەرى مەن شاعىن جانە ورتا بيزنەس سۋبەكتىلەرىنىڭ قاتىسۋىمەن مەملەكەت باسشىسىنىڭ حالىققا جولداۋىندا بەلگىلەنگەن باسىم باعىتتاردى تالقىلاۋعا ارنالعان كەزدەسۋ ءوتتى.
جيىنعا قالاداعى بازارلار مەن ساۋدا-ويىن-ساۋىق ورتالىقتارىنىڭ باسشىلارى، كاسىپكەرلەر جانە بيزنەس قاۋىمداستىعىنىڭ وكىلدەرى قاتىسىپ، ەل ەكونوميكاسىن دامىتۋعا قاتىستى وزەكتى ماسەلەلەردى ورتاعا سالدى.
كەزدەسۋدىڭ نەگىزگى وزەگى – پرەزيدەنت جولداۋىندا بەلگىلەنگەن ەكونوميكالىق مىندەتتەردى جۇزەگە اسىرۋ، كاسىپكەرلىككە قولايلى ورتا قالىپتاستىرۋ جانە وتاندىق بيزنەستىڭ الەۋەتىن ارتتىرۋ بولدى. اتاپ ايتقاندا، ەكونوميكانى ءارتاراپتاندىرۋ، ينۆەستيتسيالىق احۋالدى جاقسارتۋ، كاسىپكەرلىك باستامالاردى قولداۋ جانە بيزنەس جۇرگىزۋ ۇدەرىسىن جەڭىلدەتۋ ماسەلەلەرىنە باسىمدىق بەرىلدى.
تالقىلاۋ بارىسىندا شاعىن جانە ورتا بيزنەستىڭ ۇلتتىق ەكونوميكاداعى ورنىنا ەرەكشە نازار اۋدارىلدى. بۇگىندە بۇل سەكتور جالپى ىشكى ءونىمنىڭ 40 پايىزىن قامتاماسىز ەتىپ، ەلدىڭ ينۆەستيتسيالىق الەۋەتىن ارتتىرۋعا ەلەۋلى ۇلەس قوسىپ وتىر. سوندىقتان كاسىپكەرلىكتى قولداۋ شارالارىن جەتىلدىرۋ، اسىرەسە ورتا بيزنەستىڭ دامۋىنا سەرپىن بەرۋ ماڭىزدى مىندەتتەردىڭ ءبىرى رەتىندە قاراستىرىلدى.
وسى باعىتتا ورتا كاسىپورىنداردى ۇزاق مەرزىمدى قارجىلاندىرۋ، ولاردىڭ وندىرىستىك جانە تەحنولوگيالىق مۇمكىندىكتەرىن كەڭەيتۋ، ءىرى كومپانيالارمەن كووپەراتسيالىق بايلانىستارىن نىعايتۋ ماسەلەلەرى تالقىلاندى. مۇنداي تەتىكتەر بيزنەستىڭ باسەكەگە قابىلەتتىلىگىن ارتتىرىپ قانا قويماي، جاڭا جۇمىس ورىندارىن اشۋعا جانە ەكونوميكالىق ءوسىمنىڭ تۇراقتىلىعىن قامتاماسىز ەتۋگە مۇمكىندىك بەرەدى.
كاسىپكەرلەر ءۇشىن ماڭىزدى تاعى ءبىر ماسەلە – اكىمشىلىك كەدەرگىلەردى ازايتۋ. جيىنعا قاتىسۋشىلار بيزنەستى نەگىزسىز تەكسەرۋلەردەن قورعاۋ، كاسىپكەرلىك قىزمەتكە زاڭسىز ارالاسۋعا جول بەرمەۋ، مەملەكەتتىك قولداۋ تەتىكتەرىنىڭ تيىمدىلىگىن ارتتىرۋ جانە نارىقتا ءادىل باسەكەلەستىك قالىپتاستىرۋ جونىندەگى پرەزيدەنت باستامالارىنىڭ وزەكتىلىگىن اتاپ ءوتتى. اسىرەسە ميكرو جانە شاعىن بيزنەستىڭ ەركىن دامۋىنا جاعداي جاساۋ ەكونوميكانىڭ تۇراقتى ءوسۋىنىڭ نەگىزگى العىشارتتارىنىڭ ءبىرى ەكەنى ايتىلدى.
سونىمەن قاتار ساۋدا سالاسىنىڭ ينفراقۇرىلىمىن جاڭعىرتۋ، ساۋدا نىساندارىنىڭ قىزمەتىن جەتىلدىرۋ، زاماناۋي تسيفرلىق تەحنولوگيالاردى ەنگىزۋ جانە كاسىپكەرلەردىڭ قارجىلاندىرۋ كوزدەرىنە قولجەتىمدىلىگىن كەڭەيتۋ ماسەلەلەرى دە نازاردان تىس قالمادى. ويتكەنى ساۋدا سالاسىنىڭ تيىمدىلىگى تەك تاۋار اينالىمىمەن عانا ەمەس، قىزمەت كورسەتۋ ساپاسى، تەحنولوگيالىق جاڭارۋ جانە نارىق تالاپتارىنا بەيىمدەلۋ مۇمكىندىگىمەن دە ولشەنەدى.
كەزدەسۋ اشىق پىكىر الماسۋ فورماتىندا ءوتىپ، كاسىپكەرلەر وزدەرىن تولعاندىرعان ماسەلەلەردى كوتەرىپ، ۇسىنىستارىن ءبىلدىردى. قاتىسۋشىلاردىڭ پىكىرلەرى مەن باستامالارى نازارعا الىنىپ، بيزنەس وكىلدەرى مەن ءتيىستى قۇرىلىمدار اراسىنداعى ءوزارا بايلانىستى نىعايتۋدىڭ ماڭىزدىلىعى اتاپ ءوتىلدى.
جالپى، ساۋدا سالاسى – شىمكەنت قالاسىنىڭ الەۋمەتتىك-ەكونوميكالىق دامۋىنا ايتارلىقتاي ۇلەس قوسىپ وتىرعان ماڭىزدى سەكتور. سوندىقتان كاسىپكەرلەردىڭ باستامالارىن قولداۋ، ساۋدا ينفراقۇرىلىمىن جەتىلدىرۋ جانە بيزنەستىڭ دامۋىنا كەدەرگى كەلتىرەتىن ماسەلەلەردى جۇيەلى تۇردە شەشۋ قالانىڭ ەكونوميكالىق الەۋەتىن ارتتىرۋعا جول اشادى. پرەزيدەنت جولداۋىندا بەلگىلەنگەن مىندەتتەردى ىسكە اسىرۋ وسى باعىتتاعى جۇمىستاردىڭ ماڭىزدى باعدارى بولماق.
