شىمكەنت حالىقارالىق اۋەجايىندا وڭتۇستىك كورەيادا وتكەن ساداق اتۋدان الەم چەمپيوناتىندا جەڭىسكە جەتكەن سپورتشىلاردى جەرلەستەرى سالتاناتتى تۇردە قارسى الدى. ۋلسان قالاسىندا ءداستۇرلى ساداق اتۋدان تاريحتا العاش رەت ۇيىمداستىرىلعان الەم چەمپيوناتى ءوز مارەسىنە جەتتى. بايراقتى باسەكەگە الەمنىڭ 38 ەلىنەن 690 سپورتشى قاتىسىپ، ءوزارا مىقتىنى انىقتادى.
قازاقستان ۇلتتىق قۇراماسى چەمپيوناتتا جوعارى ناتيجە كورسەتىپ، كوماندالىق ەسەپتە بىرنەشە التىن مەدال جەڭىپ الدى.
الەم چەمپيوناتىندا شىمكەنت سپورتشىلارى دا ءساتتى ونەر كورسەتىپ، كوماندالىق ەسەپتە 2 كۇمىس جانە 2 قولا مەدال يەلەندى. ال، جەكەلەي سىندا جانىبەك قۇلمىرزاەۆ «پۋتا» نىساناسىنا وق اتۋ سايىسىندا قولا جۇلدەگە قول جەتكىزدى.
بۇل الەم چەمپيوناتىندا شىمكەنت قالاسىنىڭ نامىسىن ماقسات ابدىكارىموۆ، سابيرا جاپپار، مانزۋرا ەسەنوۆا جانە زابيت ساتوەۆ قورعادى.
جەڭىمپازداردى اۋەجايدان تۋعان-تۋىستارى، جاقىندارى، سپورت قاۋىمداستىعىنىڭ وكىلدەرى، جاتتىقتىرۋشىلار مەن جانكۇيەرلەر كۇتىپ الدى. چەمپيونداردى كوپشىلىك قوشەمەتپەن قارسى الىپ، قازاقستاننىڭ حالىقارالىق سپورت ارەناسىنداعى ابىرويىن اسقاقتاتقانى ءۇشىن ءوز ريزاشىلىقتارىن ءبىلدىردى.
سونداي-اق، سپورتشىلاردى جوعارى دەڭگەيدە دايىنداپ، جەڭىسكە جەتۋىنە زور ۇلەس قوسقان جاتتىقتىرۋشىلار مەن تالىمگەرلەردىڭ دە ەڭبەگى ەرەكشە اتاپ ءوتىلدى.
