شىمكەنت قالاسىنىڭ اكىمى عابيت سىزدىقبەكوۆتىڭ توراعالىعىمەن قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ «قازاقستاننىڭ جاڭا تاريحي كەزەڭدەگى وزەكتى مىندەتتەرى» اتتى جولداۋىن تالقىلاۋعا ارنالعان قالالىق اكتيۆ وتىرىسى ءوتتى.
جيىنعا جەرگىلىكتى اتقارۋشى جانە وكىلدى ورگانداردىڭ باسشىلارى، زيالى قاۋىم وكىلدەرى، ساياسي پارتيالار مەن قوعامدىق ۇيىمداردىڭ مۇشەلەرى قاتىستى.
وتىرىستى اشقان قالا اكىمى مەملەكەت باسشىسىنىڭ جولداۋى ەلىمىزدىڭ الداعى دامۋىنداعى ستراتەگيالىق باعدارلاردى ايقىنداپ، وڭىرلەرگە ەكونوميكانى نىعايتۋ، ينفراقۇرىلىمدى جاڭارتۋ جانە حالىقتىڭ ءومىر ءسۇرۋ ساپاسىن ارتتىرۋ بويىنشا ناقتى مىندەتتەر جۇكتەيتىنىن اتاپ ءوتتى. ونىڭ ايتۋىنشا، پرەزيدەنت بەلگىلەگەن باعىتتار جەرگىلىكتى دەڭگەيدە جۇيەلى جۇمىس جۇرگىزۋدى جانە ناقتى ناتيجەگە باعدارلانۋدى تالاپ ەتەدى.
قالا اكىمى الەۋمەتتىك ينفراقۇرىلىمدى دامىتۋ، باسپانا قۇرىلىسى، كولىك جانە ەنەرگەتيكا جۇيەلەرىن جەتىلدىرۋ، ينۆەستيتسيا تارتۋ، كاسىپكەرلىكتى قولداۋ جانە شىمكەنتتىڭ ونەركاسىپتىك الەۋەتىن ارتتىرۋ ماسەلەلەرىنە ەرەكشە نازار اۋداردى.
جيىن بارىسىندا قالالىق قوعامدىق كەڭەستىڭ توراعاسى بۇحارباي پارمانوۆ، قازاقستان حالىق كەڭەسىنىڭ مۇشەسى ابدەز يمانقۇلوۆ، شىمكەنت قالاسى كاسىپكەرلەر پالاتاسىنىڭ ديرەكتورى سابيرا ادامبەكوۆا ءسوز سويلەدى. قاتىسۋشىلار جولداۋدىڭ نەگىزگى باعىتتارى بويىنشا پىكىرلەرىن ءبىلدىرىپ، وزەكتى دامۋ ماسەلەلەرىن كوتەردى جانە ءتيىستى سالالارداعى جۇمىستى جەتىلدىرۋگە قاتىستى ۇسىنىستارىن ورتاعا سالدى.
تالقىلاۋدى قورىتىندىلاعان قالا اكىمى عابيت سىزدىقبەكوۆ شىمكەنتتىڭ الداعى دامۋ باعىتتارىن ايقىنداپ، تاياۋ جىلدارعا ارنالعان جوسپارلارىمەن ءبولىستى.
اتاپ ايتقاندا، الەۋمەتتىك جانە ينجەنەرلىك ينفراقۇرىلىمدى ودان ءارى دامىتۋ، ءبىلىم بەرۋ، دەنساۋلىق ساقتاۋ، سپورت جانە قوعامدىق قاۋىپسىزدىك نىساندارىن سالۋ، باسپانا قورىن كەڭەيتۋ، جول جەلىسى مەن ەنەرگەتيكالىق كەشەندى جاڭارتۋ ماسەلەلەرى ءسوز بولدى.
سونداي-اق، قالانىڭ ينۆەستيتسيالىق الەۋەتىن ارتتىرۋعا، كاسىپكەرلىكتى قولداۋعا، وندىرىستىك قۋاتتاردى كەڭەيتۋگە جانە جاڭا جۇمىس ورىندارىن اشۋعا باسىمدىق بەرىلدى. بۇل باعىتتار شىمكەنت ەكونوميكاسىن نىعايتىپ، قالا تۇرعىندارىنىڭ ءومىر ءسۇرۋ ساپاسىن ودان ءارى ارتتىرۋعا مۇمكىندىك بەرەدى.
جيىن قورىتىندىسىندا مەگاپوليس باسشىسى قاتىسۋشىلارعا مازمۇندى تالقىلاۋ مەن ۇسىنىستارى ءۇشىن العىس ايتىپ، باسشىلاردى جۇكتەلگەن مىندەتتەردى جاۋاپكەرشىلىكپەن ورىنداۋعا، ءوزارا ۇيلەسىمدى جۇمىستى قامتاماسىز ەتۋگە جانە ءار باعىت بويىنشا ناقتى ناتيجەلەرگە قول جەتكىزۋگە شاقىردى.
