بۇگىن ۇلتتىق مەرەكە – رەسپۋبليكا كۇنىنە ارنالعان مەرەكەلىك كونتسەرت «استانا» الاڭىندا قايتا جالعاستى. كونتسەرتتىك باعدارلامادا وتاندىق ەسترادا جۇلدىزدارى مەن جەرگىلىكتى ونەرپازدار قالا تۇرعىندارى مەن قوناقتارىنا اسەم اندەرىن تارتۋ ەتىپ، مەرەكەنى سەزىندىردى.
اتاپ ايتقاندا، ساحنا تورىندە جۇبانىش جەكسەنۇلى، نۇرجان كەرمەنباەۆ، ءمادينا سادۋاقاسوۆا، داستان ورازبەكوۆ جانە تاعى باسقا تانىمال انشىلەر ونەر كورسەتتى.
شىمكەنت قالاسىنىڭ اكىمدىگى ۇيىمداستىرعان اۋقىمدى مادەني ءىس-شارا ۇلتتىق قۇندىلىقتاردى دارىپتەۋ، ەل بىرلىگى مەن تاۋەلسىزدىكتىڭ، ۇلتتىق مەرەكەنىڭ ماڭىزىن ناسيحاتتاۋدى ماقسات ەتكەن.
رەسپۋبليكا كۇنى وتكەندى باعامداپ قانا قويماي، ەل بولاشاعىنا جاۋاپكەرشىلىكپەن قاراپ، جاڭارۋ مەن جاسامپازدىققا ۇمتىلۋعا ۇندەيتىن ماڭىزدى مەرەكە. بيىل بۇل مەرەكە قازاقستاننىڭ جاڭا تاريحي بەلەسى – تاۋەلسىزدىكتىڭ 35 جىلدىعىمەن تۇسپا-تۇس كەلىپ وتىر. ايتۋلى مەرەكە شىمكەنت قالاسىندا كەڭ اۋقىمدا اتالىپ ءوتتى.
وسىلايشا ەكى كۇنگە جالعاسقان مەرەكەلىك كەشتىڭ سوڭى جارقىن وتشاشۋمەن قورىتىندىلاندى.
