م.اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ «مۇحتارتانۋ» عىلىمي-زەرتتەۋ ورتالىعى حاكىم ابايدىڭ 180 جىلدىعىنا وراي «اباي. مۇرسەيىت قولجازبالارىنا سۇيەنىپ جاسالعان ترانسكريپتسيا» اتتى جاڭا عىلىمي ەڭبەكتى جارىققا شىعاردى.
قۇندى زەرتتەۋ ەلىمىزدىڭ جەتەكشى باسپالارىنىڭ بىرىنەن 2000 دانا تارالىممەن باسىلىپ شىقتى.
اۆتورلارى – فيلولوگيا عىلىمدارىنىڭ كانديداتى، دوتسەنت اقجول قالشابەك جانە PhD دوكتورانت ءازىمحان يسابەك. جوبانىڭ جارىققا شىعۋىنا قر پارلامەنتى ءماجىلىسىنىڭ دەپۋتاتى ارداق نازاروۆ دەمەۋشىلىك كورسەتىپ، باستامانىڭ كەڭ اۋديتورياعا جەتۋىنە ىقپال ەتتى.
عىلىمي ەڭبەكتە اباي شىعارمالارىنىڭ نەگىزگى كوزى سانالاتىن مۇرسەيىت بىكىۇلىنىڭ قولجازبالارى تەكستولوگيالىق جانە تەرمينولوگيالىق تۇرعىدا سارالانىپ، سالىستىرمالى تۇردە تالدانعان. سونىمەن قاتار، اقىننىڭ ءىنىسى حاليوللاعا جازعان حاتىنىڭ تۇپنۇسقاسى مەن ترانسكريپتسياسى، سونداي-اق اباي شىعارمالارىن كوشىرگەن راحىم جاندىباەۆ پەن ورازكە ۋاقبايۇلىنىڭ
ەڭبەكتىڭ تاعى ءبىر قۇندىلىعى – ابايدىڭ 1910 جىلى جازىلعان قولجازباسىنىڭ تولىق فاكسيميلە نۇسقاسىنىڭ العاش رەت جاريالانۋى.
جوبا اۆتورلارىنىڭ ايتۋىنشا، كىتاپقا قازاقستاننىڭ مەملەكەتتىك سىيلىعىنىڭ يەگەرى، پروفەسسور مەكەمتاس مىرزاحمەتۇلى رەتسەنزيا جازىپ، ءوز باتاسىن بەرگەن. اۆتور ءازىمحان يسابەكتىڭ سوزىنە سۇيەنسەك، بۇل ەڭبەك – ۇزاق جىلدارعا سوزىلعان عىلىمي-زەرتتەۋ جۇمىسىنىڭ ناتيجەسى.
اباي شىعارمالارىن تۇپنۇسقا نەگىزىندە تولىق ءارى ساۋاتتى ترانسكريپتسيالاۋ – ۇلى جازۋشى مۇحتار اۋەزوۆتىڭ كوزى تىرىسىندە ارمان ەتكەن ءىسى بولاتىن. بۇگىندە سول مۇرات ورىندالىپ وتىر، – دەدى ول.
ابايدىڭ 180 جىلدىق مەرەيتويىنا ارنالعان بۇل ىرگەلى ەڭبەك 712 بەتتى قۇرايدى جانە ابايتانۋ سالاسىنداعى ماڭىزدى جاڭالىق رەتىندە باعالانۋدا.
