ءاردايىم قار ەرىپ، جاڭبىر جاۋعان سايىن استانا قالاسىنداعى قازاق ۇلتتىق ونەر ۋنيۆەرسيتەتىنىڭ عيماراتى سۋ ايدىنىنا اينالادى. شاتىردان عيماراتتىڭ ىشىنە قاراي تامعان سۋدى تولتىرۋ ءۇشىن قويىلعان شەلەكتەردىڭ سانىندا شەك جوق. ءبىلىم الىپ جاتقان ستۋدەنتتەرگە جاعداي جاسالماعان، ولاردىڭ قۇلشىنىسى قۇرىپ، مازاسى كەتكەن. ونىڭ ۇستىنە شىندىقتى سەرىك ەتكەن ستۋدەنتتەرگە قىسىم كورسەتىلگەن، دەپ حابارلايدى "ادىرنا" ۇلتتىق پورتالى.
توبەسىنەن سۋ اعىپ، عيمارات ءىشى كولشىككە اينالاتىن وقۋ ورنىنىڭ اكىمشىلىگى پلاستيك شەلەكتەر جيناۋعا اۋەس. كەيدە ۋنيۆەرسيتەت عيماراتىنىڭ بويىندا ورنالاستىرىلعان بۇل شەلەكتىڭ سانى ونداعى مۋزىكالىق اسپاپتاردىڭ سانىنان اسىپ تۇسەتىندەي اسەر قالدىرادى. ستۋدەنتتەر ساباققا جەتۋ ءۇشىن ءتۇرلى كەدەرگىلەردەن وتەدى. وقۋعا مالماڭداي سۋ بولىپ بىراق كىرەمىز دەيدى ولار.
باسشىلىقتىڭ بەيقامدىعى مەن مەجەنتوپايلىعىنا شىداماعان "جاڭا ادامدار" ۇيىمىنىڭ بەلسەندىلەرى جيىن وتكىزدى. جيىندا قولعا شەلەك الىپ، مادەنيەتتى تۇردە شاعىمىن جەتكىزگەن. شەلەكتىڭ ءتۇبىن ۇرعىلاپ، باسشىلىقتىڭ "تۇگىن" قالدىرماي ادەپ جونىمەن سىنعا الدى. دەگەنمەن، باسشىلىق تاراپى ستۋدەنتتەردىڭ ءبىر جاعىنا شىعىسقاننىڭ ورنىنا قىسىم كورسەتىپ، وزدەرىنە قارسى شاپقان. بۇل جايلى بەلسەندى Yel Muzafar حابارلادى.
استاناداعى ۇلتتىق ونەر ۋنيۆەرسيتەتىنىڭ ستۋدەنتتەرى ءبىر اپتانىڭ ىشىندە ەكى رەت ۋنيۆەرسيتەت اكىمشىلىگىنە قارسى بەيبىت پروتەست وتكىزدى. ەشقانداي اگرەسسياسىز، مادەنيەتتى جانە كرەاتيۆتى تۇردە رەكتورعا وقۋ كورپۋسىنداعى شاتىرلاردان اعاتىن سۋ ماسەلەسىن شەشۋدى سۇراپ وتىر. ۇراندارى - “شەلەك شابىتتى قۇرتادى”. مينۋستى جويۋدىڭ ورنىنا قاۋىپسىزدىك قىزمەتىن پلاكاتتى الىپ تاستاۋعا جىبەرگەن مەنەدجمەنتتى قالاي ادەكۆات دەپ باعالاۋعا بولادى؟!تەك ءبىر كەم دۇنيە بەلسەندى جاستىڭ سانى از. باسقا ستۋدەنتتەردىڭ كورىپ تۇرىپ وحدەرىنە تىكەلەي قاتىستى شارانى قولداماۋى نەشە ءتۇرلى ويعا جەتەلەيدى. سوۆەتتىك ۇرپاقتىڭ ورنىنا تاۋەلسىزدىك ۇرپاقتارى كەلگەندە ساياسي ءومىر، جالپى ازاماتتىق قوعام باسقاشا بولادى دەگەن تۇجىرىمدارعا كۇمان پايدا بولا باستادى. ۋنيۆەر دەڭگەيىندەگى ماسەلەلەردى اشىق ايتا الماعان ادامداردان بولاشاقتا ساياسي تالاپتار قويا الاتىن ەلەكتورات شىعۋى 50/50, - دەپ كۇيىندى الەۋمەتتىك جەلىدە اۆتور.
