Árdaıym qar erip, jańbyr jaýǵan saıyn Astana qalasyndaǵy Qazaq Ulttyq óner ýnıversıtetiniń ǵımaraty sý aıdynyna aınalady. Shatyrdan ǵımarattyń ishine qaraı tamǵan sýdy toltyrý úshin qoıylǵan shelekterdiń sanynda shek joq. Bilim alyp jatqan stýdentterge jaǵdaı jasalmaǵan, olardyń qulshynysy quryp, mazasy ketken. Onyń ústine shyndyqty serik etken stýdentterge qysym kórsetilgen, dep habarlaıdy "Adyrna" ulttyq portaly.
Tóbesinen sý aǵyp, ǵımarat ishi kólshikke aınalatyn oqý ornynyń ákimshiligi plastık shelekter jınaýǵa áýes. Keıde ýnıversıtet ǵımaratynyń boıynda ornalastyrylǵan bul shelektiń sany ondaǵy mýzykalyq aspaptardyń sanynan asyp túsetindeı áser qaldyrady. Stýdentter sabaqqa jetý úshin túrli kedergilerden ótedi. Oqýǵa malmańdaı sý bolyp biraq kiremiz deıdi olar.
Basshylyqtyń beıqamdyǵy men mejentopaılyǵyna shydamaǵan "Jańa adamdar" uıymynyń belsendileri jıyn ótkizdi. Jıynda qolǵa shelek alyp, mádenıetti túrde shaǵymyn jetkizgen. Shelektiń túbin urǵylap, basshylyqtyń "túgin" qaldyrmaı ádep jónimen synǵa aldy. Degenmen, basshylyq tarapy stýdentterdiń bir jaǵyna shyǵysqannyń ornyna qysym kórsetip, ózderine qarsy shapqan. Bul jaıly belsendi Yel Muzafar habarlady.
Astanadaǵy Ulttyq óner ýnıversıtetiniń stýdentteri bir aptanyń ishinde eki ret ýnıversıtet ákimshiligine qarsy beıbit protest ótkizdi. Eshqandaı agressııasyz, mádenıetti jáne kreatıvti túrde Rektorǵa oqý korpýsyndaǵy shatyrlardan aǵatyn sý máselesin sheshýdi surap otyr. Urandary - “Shelek shabytty qurtady”. Mınýsty joıýdyń ornyna qaýipsizdik qyzmetin plakatty alyp tastaýǵa jibergen menedjmentti qalaı adekvat dep baǵalaýǵa bolady?!Tek bir kem dúnıe belsendi jastyń sany az. Basqa stýdentterdiń kórip turyp óhderine tikeleı qatysty sharany qoldamaýy neshe túrli oıǵa jeteleıdi. Sovettik urpaqtyń ornyna táýelsizdik urpaqtary kelgende saıası ómir, jalpy azamattyq qoǵam basqasha bolady degen tujyrymdarǵa kúmán paıda bola bastady. Ýnıver deńgeıindegi máselelerdi ashyq aıta almaǵan adamdardan bolashaqta saıası talaptar qoıa alatyn elektorat shyǵýy 50/50, - dep kúıindi áleýmettik jelide avtor.
