قازاقستان رەسپۋبليكاسى ۇلتتىق كىتاپحاناسى الەۋمەتتىك جەلىلەر مەن بىرقاتار باق-تا تاراعان «مۇحتار اۋەزوۆتىڭ عىلىمي كابينەتى جابىلدى» دەگەن حابارلامانى رەسمي تۇردە تەرىسكە شىعاردى، دەپ حابارلايدى "ادىرنا" ۇلتتىق پورتالى.
مەكەمە ءباسپاسوز قىزمەتىنىڭ مالىمەتىنشە، 2014 جىلى ۇلتتىق كىتاپحانا مەن جازۋشىنىڭ وتباسى مۇشەلەرىنىڭ قولداۋىمەن اشىلعان مۇحتار اۋەزوۆتىڭ عىلىمي كابينەتى بۇگىندە ءوز جۇمىسىن ادەتتەگىدەي جالعاستىرىپ كەلەدى.
"كابينەتتىڭ ماقساتى — جازۋشىنىڭ باي شىعارماشىلىعىن زەردەلەۋ جانە ونىڭ ادەبي مۇراسىن ناسيحاتتاۋ. مۇندا مۇحتار اۋەزوۆتىڭ جەكە كىتاپتارى مەن ونىڭ شىعارماشىلىعىنا ارنالعان ەڭبەكتەر جيناقتالعان", — دەلىنگەن ۇلتتىق كىتاپحانانىڭ رەسمي حابارلاماسىندا.
ءباسپاسوز قىزمەتى اتاپ وتكەندەي، 2025 جىلدىڭ قىركۇيەگىندە جازۋشىنىڭ نەمەرەسىنىڭ باستاماسىمەن قالا اكىمدىگى مۇحتار اۋەزوۆ اتىنداعى جاڭا كىتاپحانانى اشۋ تۋرالى شەشىم قابىلداعان. مادەنيەت باسقارماسى مەن قالا اكىمىنىڭ ورىنباسارىنىڭ كەلىسىمى نەگىزىندە جازۋشىنىڭ ەسىمى الماتى قالاسىنىڭ ورتالىقتاندىرىلعان كىتاپحانا جۇيەسىنىڭ №4 فيليالىنا بەرىلدى.
"مۇحتار اۋەزوۆ اتىنداعى كىتاپحانانىڭ اشىلۋىنا بايلانىستى، ۇلتتىق كىتاپحاناداعى جازۋشىنىڭ عىلىمي كابينەتىندەگى ۋاقىتشا ساقتاۋدا بولعان جەكە زاتتار مەن كىتاپتار جاڭا كىتاپحاناعا تاپسىرىلدى", — دەپ حابارلادى مەكەمە وكىلدەرى.
ۇلتتىق كىتاپحانا قازىرگى تاڭدا مۇحتار اۋەزوۆتىڭ عىلىمي-زەرتتەۋ كابينەتى ەكسكۋرسيالىق باعىتقا ەنگىزىلىپ، قالىپتى رەجيمدە جۇمىس ىستەپ تۇرعانىن مالىمدەدى.
