شىمكەنتتە فۋتبولدان قازاقستان چەمپيونى اتانعان «ورداباسى» كلۋبىنىڭ جەڭىسىنە ارنالعان مەرەكەلىك شارا ءوتتى. «استانا» الاڭىندا ۇيىمداستىرىلعان سالتاناتتى كەشكە قالا تۇرعىندارى مەن قوناقتارى جينالىپ، كوماندانىڭ تاريحي جەتىستىگىن بىرگە اتاپ ءوتتى.
قازاقستان رەسپۋبليكاسى تاۋەلسىزدىگىنىڭ 35 جىلدىعىنا وراي وتكەن شارادا كلۋب ويىنشىلارى مەن باپكەرلەر قۇرامىنا چەمپيوندىق التىن مەدالدار تابىستالىپ، جەڭىمپاز كۋبوگى سالتاناتتى تۇردە تاپسىرىلدى.
جيىندا شىمكەنت قالاسىنىڭ اكىمى عابيت سىزدىقبەكوۆ فۋتبولشىلاردى جەڭىسىمەن قۇتتىقتاپ، چەمپيوندىق جەتىستىكتىڭ ارتىندا ۇلكەن ەڭبەك پەن كوماندالىق بىرلىك تۇرعانىن اتاپ ءوتتى. سونداي-اق كلۋبقا قولداۋ كورسەتكەن «ينتەگرا» كومپانياسىنىڭ باسشىلىعىنا، باپكەرلەرگە جانە جانكۇيەرلەرگە العىس ءبىلدىردى.
ال كلۋب پرەزيدەنتى ءارى ديرەكتورلار كەڭەسىنىڭ توراعاسى دارحان قىزايباي بۇل جەڭىستىڭ بۇكىل قالا تۇرعىندارىنا ورتاق قۋانىش ەكەنىن جەتكىزدى. ونىڭ ايتۋىنشا، كوماندا سەگىز اي بويى دايىندالىپ، چەمپيوندىق ماقساتقا جەتۋ جولىندا ايانباي ەڭبەك ەتكەن. الداعى ۋاقىتتا «ورداباسىنى» حالىقارالىق دەڭگەيدە تانىتۋ كوزدەلىپ وتىر.
مەرەكەلىك كەشتە تانىمال ونەر يەلەرى قايرات نۇرتاس پەن Bayansulu ونەر كورسەتىپ، كوپشىلىككە كوتەرىڭكى كوڭىل كۇي سىيلادى. شارا سوڭى مەرەكەلىك وتشاشۋمەن تۇيىندەلدى.
ايتا كەتەيىك، 25 قازاندا وتكەن چەمپيوناتتىڭ قورىتىندى كەزەڭىندە 68 ۇپاي جيناعان «ورداباسى» مەرزىمىنەن بۇرىن قازاقستان چەمپيونى اتاندى. وسىلايشا، شىمكەنتتىك كلۋب ءوز تاريحىندا ەكىنشى رەت ەل بىرىنشىلىگىنىڭ التىن جۇلدەسىن يەلەندى. بۇل ناتيجە كومانداعا الداعى ماۋسىمدا ۋەفا چەمپيوندار ليگاسىنىڭ ىرىكتەۋ كەزەڭىندە ەل نامىسىن قورعاۋعا مۇمكىندىك بەرەدى.
